1 Yo, dhuwalanydja djorra' wukirriwuy ŋarrakuŋu Djawuḻpa'wuŋu. Ŋarra wukirrinydja yukurra dhuwala nhumalaŋgu Godkalaŋuwu ŋurrukku, ŋunhi nhumanydja balanyara bitjan dhäyka Godkuŋuna djarr'yunara ga yumurrku'na nhanŋu. Yuwalk yana ŋarra nhumalaŋgu märr-ŋamathirrinydja yukurra, yurru yaka yana ŋunhi ŋarrapinydja nhumalaŋgu yukurra märr-ŋamathirri, ŋunhinydja' walala yolŋu'-yulŋu bukmak yana ŋunhi walala marŋgi yuwalkku, ŋunhiyinydja walala märr-ŋamathirri yana nhumalaŋgu yukurra, 2 liŋgu ŋilimurru yukurra ḏälkumana Godku yuwalktja rom, ga ŋunhiyi yuwalktja yurru dhärra yukurra ŋilimurruŋgala bitjanna liŋguna yurru, gupaḏalnha-wala. 3 Yo, Godkalanydja märr-ŋamathirriyu ga djäkayu ŋuli yukurra gämana ḻatju'kumana dhikana ŋilimurrunha. Ŋayinydja mel-wuyunaramirri ŋilimurruŋgu, ga nhanukalaynydja ŋilimurru yurru nhina yukurra ŋayaŋu-yal'yunarana. Godtja Bäpanydja ga Djesu-Christtja, Godku Gäthu'mirriŋunydja yurru yukurra bitjanna liŋguna ŋilimurruŋgalanydja, ŋurikalanydja ŋunhi ŋilimurru yukurra ŋayathama yuwalkŋu rom, ga märr-ŋamathinyaramirri bala-lili'yunmirri.

4 Yo, wirrki yana ŋarranydja ŋayaŋu-djulŋithirri yukurra, liŋgu ŋarra ŋäkula nhumalaŋgu yumurrku'nha wiripu-guḻku'nhanydja, ŋunhi walala yukurra nhina yuwalkŋuŋura yana romŋura, bitjan yana liŋgu bitjarra ŋayi Gunhu'yu ŋilimurruŋgu rom nherrara. 5 Bala ŋarra waŋanydja yukurra nhumalanha bitjanna, “Märr-ŋamathinyamiya walala bala-lili'yunmiya.” Dhuwalayinydja yaka yuṯa rom ŋarra nhumalaŋgu yukurra wekama, ŋunhiyi liŋgu ŋupanayŋu dhuwala yulŋunydja ŋunhi Garrayyu ŋayipi nherrara ŋunhi ŋäthili wal'ŋu ŋurruŋura.

6 Ga dhuwalana ŋunhi yuwalktja märr-ŋamathinyara gam', ŋilimurru yurru malthun marrtji bala Garraywalaŋuwu romgu ŋuriki, ŋunhi ŋayi nherrara ŋilimurruŋgu ŋunhiyi, ga dhuwalana ŋunhi romdja nhuma ŋäkula ŋunhi ŋurruthaŋalanydja gam', “Yuwalkkuŋa yana märr-ŋamathinyamiyanydja bala-lili'yunmiya.” 7 Liŋgu guḻku'na ŋunhi mayali'-wilkthunaramirrinydja yolŋu walala barrkuwatjthina yukurrana dhika wäŋalili ga wäŋalili. Ŋuriŋi walalay mayali'-wilkthunaramirriyu yolŋuyu walalay yakana yukurra dhunupa ḻakarama Djesu-Christnhanydja; walalanydja ŋuli waŋa ḻakaramanydja bitjanna, “Ŋunhi Godkunydja gäthu'mirriŋu bäyŋu ŋayi dhawal-wuyaŋina yolŋunydja rumbal, yaka ŋayi ŋunhi yuwalktja marrtjina rumbalnydja wal'ŋu yolŋunydja,” bitjanna. Ŋunhi ŋayi ŋuli waŋa bitjandhiyinydja ŋula yol, ŋunhiyinydja mayali'-wilkthunaramirrina yolŋu, ga miriŋuna ŋayi Garraywu, ŋunhana bala wiripuŋurana gali'ŋura. 8 Ga biyaka gurrum'thurra yulŋunydja nhumalaŋguway nhuma. Ŋuli nhuma yurru mäkiri'-witjun walalaŋgunydja dhärukku ŋuriki mayali'-wilkthunaramirriwunydja walalaŋgu, nhumanydja yurru yakana märrama nhä ŋamakurru' Godkuŋunydja. Ŋayathaŋanydja baṯ biyaka yana ŋunhiyi liŋgu dhäruk ŋunhi nhuma märraŋala ŋuliwitjandhiyi ŋilimurruŋgalay djämayu, märr yurru nhuma märrama muka yulŋunydja nhä malanha ŋamakurruny'tja ŋunha Godthu yukurra ŋayathama nhumalaŋgu.

9 Yo, wiripu-guḻkuny'tja yolŋu walala marŋgimirri ŋurikiyi dhäwu'wu, ŋunhi ŋayipi Djesu-Christthu ḻakaraŋala marŋgikuŋala, yurru walalanydja ŋunhiwalayina bukulili ŋal'marama bala ŋuli marrtji walalaŋguwaynha guyaŋinyara. Ŋunhi ŋayi ŋuli yolŋuyu bitjandhiyinydja, ga yakana ŋayi ŋuli nhina yukurra ŋunhiliminydja liŋgu dhäwu'ŋura ŋunhi Garrayyu ŋayipi gäŋala ŋilimurruŋgu, yakana ŋayi ŋunhiyinydja yolŋu marŋgi wal'ŋu Godku, yakana ŋayi yukurra nhina waŋganyŋura Godkalanydja. Ga ŋunhi ŋayi yukurra ŋula yol yolŋu nhina ŋunhiliminydja liŋgu Christkalanydja dhäwu'ŋura, ŋunhiyinydjayi yolŋu nhina ŋayi yukurra yuwalknha yana Gunhu'walana ga nhanukalaŋuwala gäthu'mirriŋuwala Djesu-Christkalana. 10 Ŋuli ŋayi balaŋu yurru ŋula yol yolŋu marrtjinydja ga marŋgikumanydja nhumalanha, yurru ŋayi wiripukumana ŋuli marŋgikumanydja ḻakaramanydja nhuŋu, yakana ŋayi yurru ḻakarama dhuwalayi yuwalktja wal'ŋu dhäwu' Garraywu, bala yakana yana ŋurikiyi gumurr-ŋamathinyanydja ga märraŋanydja ŋanya nhokiyingala wäŋalili. 11 Yo, ŋuli nhe yurru gumurr-ŋamathirrinydja ga märramanydja ŋanya, ŋunhiyinydja bitjan nhumana maṉḏa waŋganyŋurana ŋunhilina ŋunhi ŋayi yukurra djäma yätj.

12 Guḻku' mirithirri dhuwala yulŋunydja ŋarra nhumalaŋgu bini ḻakaranhanydja, yurru yakana ŋarra yurru wukirrinydja dhipala djorra'lilinydja. Ŋarra yukurra gatjpu'yundja marrtjinyarawu dhipali nhumalaŋgala galkina, märr yurru ŋilimurru yukurra waŋganyŋurana waŋanharamirri dhiyakuyi malaŋuwu, märr ŋilimurru yurru märr-ŋamathinyaramirrina bala-lili'yunmirrina.

13 Nhumalaŋgala yapa'mirriŋuwalanydja yumurrku'yu, Godkalanydja ŋurrukthu dhipuŋurunydja djuy'yurruna märr-ŋamathinyara nhumalaŋgu. Ga liŋguna.