1 Ŋunhi ŋayi dhäwu'mirrinydja yolŋu bunana ŋunhili, bala ŋayi Yelatjiyanydja waŋana nhanukala bitjarrana, “Mäkiri'‐witjurra dhuwalanydja Garraywu dhäruk. Goḏarrny'tja boŋguŋu ŋathamirriyina dhuwala Djamariyanydja wäŋa. Yolŋu'‐yulŋuyunydja boŋguŋu ŋathana wuŋiḻi'yurru, ga ḻukina marrtji.”

2 Yurru waŋganydja giŋgu djämamirri waŋana bitjarra, “Dhuwalanydja yaka warray ŋuli biyaku. Bäyyi ŋunhi ŋuli gäthuranydja ŋula waltjaṉ buni Garraywuŋu djuy'yunara, ŋunhi ŋuli mukthurrunydja ŋathamiriw wäŋa.”

Ga ŋayi Yelatjiyayunydja waŋana bitjarra, “Nhäŋu nhe boŋgaŋuŋga, yurru yakana nhenydja boŋguŋu ḻuki.”

3 Yo, warraŋul ŋunhiliyi Djamariya wäŋaŋura yukurrana nhinana ḏämbumiriw ḏarramuwurru, yurru burrpuymirri walala; yaka walala ŋuli yukurranha nhinanha ŋunhili djinawany'tja gal'ŋu Djamariya. Walalanydja bitjarra yana liŋgu marrya'mirri ḏäpthurruna nhinana, bäyŋu ŋula ŋatha walalaŋgu ḻukanharawu, ga walala waŋanharamina bitjanminana, “Nhaltjanna dhika ŋilimurru yulŋunydja yurru? Nhäku ŋilimurru yukurra dhuwala galkun dhiyalanydja bili? Ŋilimurrunydja dhuwala murrmurryunna yurru djaṉŋarrthinyarayuna. 4 Ŋunhi ŋilimurru ŋuli marrtji bala djinawa'lilinydja gulŋiyi bala'mirrililinydja, ŋunhanydja bäyŋu yana, ŋathamiriw wäŋa. Ga ŋunhi ŋilimurru ŋuli marrtji bala Djiriyawuywala yolŋu'‐yulŋuwala, walala mak ŋilimurrunha ŋuli baymatthurruna rakunyguna, mak walala ŋuli wekaŋu ŋilimurruŋgu ŋathana.”

5-6 Bala yana walala gaŋga'‐gaŋgathinana, bala wäŋgaŋalana, withiyara Djiriyawuyŋunhana. Ga ŋunhi walala bunananydja ŋunhala, marrtjina nhäŋala, bäyŋu warray yolŋunydja, wiraŋ warray, yolŋumiriwnha, warrpam'nha yolŋu bena‐wala winya'‐winyayurruna, liŋgu Garrayyu walalanha beyaṉu‐wukuŋala, be nhä walala ŋäkula rirrakay bitjan miriŋu marrtji walalaŋgu yukirri, guḻku'na dhika miriŋunydja nyäṉ'thurruna bay'. 7 Bala yana walalanydja wirrkina beyaṉiyina, bala bena‐wala gundupuŋalana, gonha'yurruna warrpam'nha dhika wäŋanydja, buṉbunydja ḏalwaḏalwany'tja, dhika nhä girri' ga ŋatha ŋunhiwala bäymana gonha'yurruna.

8 Ŋunhiyi ḏämbumiriw burrpuymirri walala yolŋu'‐yulŋu bunananydja ŋunhili, nhäŋalanydja wiraŋ warray, yolŋumiriw warray, bala walala nhinanana gay', ḻukanana dhika ŋathana, wurrkthurruna gapuna, yanana liŋgu ḏulpu'‐ḏulputhina. Marrtjinanydja yukurrana walala buṉbulili ga buṉbulili, gulŋiyinanydja marrtjina, djoṉguŋalana marrtjina dhika rrupiyana dhika nhä garwarrwarr'mirrina girri', ga wiripu malanha bena dhika.

9 Bala walala waŋanhamina walalanhawuynha walala bitjanminana, “Dhuwalanydja yakana ŋamakurru' ŋilimurruŋguwaynydja. Gul' ŋilimurru marrtjina yana, ga ḻakaramana manymaknha dhuwalanydja walalaŋgu. Ŋunha walalanydja yukurra marrya'mirriyi yana nhina. Gul' ŋilimurru marrtjina yana dhunupana go, ga ḻakaramana.”

10 Bala walala roŋi'‐ruŋiyinayi balayi Djamariyalili, ga bunana nhanŋu djäkamirriwu ŋunhili wäŋaŋura, ŋayinydja ŋunhi yukurrana dhärrana yana dhurrwaraŋura ŋunhili buṉbu‐mäypamirriŋura yulŋunydja. Bala walala waŋana nhanukala ŋunhili djäkamirriwalanydja bitjarrana ḻakaraŋala, “Wäy, liŋgu ŋanapurru marrtjina bala Djiriyapuyŋuwalanydja wäŋalili, ga yolŋumiriwnha nhäŋala. Yolŋu'‐yulŋunydja ŋunhi ga bena‐wala gundupuŋalana, ga ŋunhanydja yana wäŋana waŋganynha djingaryun yukurra.”

11-12 Bala ŋayi ŋunhiyi djäkamirrinydja marrtjinana bala giŋgalana, ga ŋayi giŋdja yakana märr‐yuwalkthina ŋunhi ŋäkula; ŋayinydja guyaŋina yanapi walala ŋunhi Djiriyapuyŋunydja gundupunha ga djuḻu'‐djuḻuḻyunana, märr bini ŋunhi yolŋu'‐yulŋu marrtjinya ŋuliŋuru dhawaṯthuna ŋathawu ŋula, ga walalanydja bini ŋulaŋuru bunhana walalanha.

13 Yurru ŋunhi dhäwu'mirrinydja waŋana bitjarra, “Ŋunhi ŋilimurru yurru nhina yukurra dhiyalanydja bili djinawany'tja yana, ŋilimurru yurru murrmurryunna yana. Gul' ŋilimurru marrtji bitjan ya' dhawaṯthun, ga nhäma ŋunhayi.” 14-15 Bala ŋayi giŋdhunydja djuy'yurruna märr‐ḻurrkun'nha yolŋunha, ga maḻŋ'maraŋalanydja walala ŋunhi yuwalk warray yulŋunydja. Walala marrtjina nhäŋalanydja girri'na dhika burruḻ'yunarana, ŋunhi walala gundupuŋalanydja, yurru bäyŋuna ŋula yolŋunydja yukurrana nhinana. Bala walala balayi roŋi'‐ruŋiyina, ga ḻakaraŋala giŋgu. 16 Bala marrtjina ŋunhi yolŋu'‐yulŋunydja walmanana dhika gundupuŋala Djamariyaŋurunydja, ga märraŋalana marrtjina ŋathana dhika, djoṉguŋala girri'na malanha. Yo, märr‐yuwalkthinana ŋunhiyi dhäruktja ŋunhi nhaltjarra Garrayyu ḻakaraŋala, ŋunhiyi maḻŋ'thurrunana; liŋguna ŋathamirrina ŋunhiyi wäŋa Djamariyawuynydja.

17-20 Ga ŋunhiyinydja ḏarramu ŋunhi ŋayi yaka märr‐yuwalkthina ya' nhaltjarra yukurrana Yelatjiyayu ḻakaraŋala ŋäthili, ŋayinydja ŋunhi nhina‐dharrana ŋunhala galki dhurrwaraŋura ḻoḻuŋura. Walala yolŋunydja walala guḻku'na dhika gundupuŋala, bala galkinyamaraŋalana ŋanya, ga muŋdhu'‐muŋdhurrunana wapthu'‐wapthurrunana dharrana gundupuŋalana, bala ŋayi rakunydhinana ŋunhi yulŋunydja; nhäŋala warray ŋayi ŋuriŋi yolŋuyunydja, ŋunhiyi maḻŋ'thunarawuynha liŋguna, yurru ŋayi yakana ŋula ŋathanydja ḻukana, ŋunhiyinydja yana dhäruk ŋunhi Yelatjiyayu ḻakaraŋala ŋäthili.