1 Ga ŋulinyaramirriyunydja waluyu ŋayi * King DavidGiŋ Daypit yukurrana nhinana ḻatju'ŋurana ŋanyana dhikana buṉbuŋura, buta'na dhikana djana'mirrina, ga Garraynydja yukurrana nhanŋu djäkayi yana, gungaŋala ŋanya yukurrana miriŋuwala. 2 Ŋayi Giŋ Daypit waŋana ḏarramuwala dhäwu'‐gänharamirriwala yäkuwala † NathanNaythangala bitjarra, “Dhuwalana ŋarranydja yukurra nhina dhiyalaŋumina gay' walaŋŋurana dhikana wäŋaŋura, ga ŋunhi Dhawu'‐nherraṉminyarawuynydja Bathi Garraywu ga ŋunha yana ḏälkunhamirri yukurra ḏalwaḏalwa'ŋura. Nhä warray ŋuli ŋarra dhuḻ'yurru buṉbu ḻatjuny'tja nhanŋu Garraywu?”

3 Ga ŋayi Naythandja waŋana bitjarra, “Nhe yurru djäma yana ŋunhi nhaltjan nhe yukurra guyaŋirri ga nhä nhokala ḻiyaŋura guyaŋinyarawuy, liŋgu Garraynydja dhuwali warray nhokala galki,” bitjarra. 4-7 Ga ŋulinyaramirriyu munhakuna ŋayi Garray waŋana Naythangala bitjarrana gam'. “Gatjuy marrtjiya, ga ḻakaraŋa ŋarrakalaŋuwa djämamirriwa Daypitpa biyaka, ‘Yaka dhuwala nhenydja dhuḻ'yun yurru buṉbu ŋarraku nhinanharawu.’ 8 Ga ḻakaraŋanydja nhanbala biyakayi Daypitku, ‘Ŋäthilinydja ŋunhi nhe ga wäyin djäkamirriŋga, bala ŋarra nhuna djarr'yurrunana, ga nherrara nhuna ŋurruŋuna ŋarrakalaŋuwu malawu Yitjuralpuyŋuwuna. 9 Ŋarranydja bitjarra liŋgu galki yukurrana marrtjina nhokala, ga ŋarranydja yukurrana djuḻkthunmaraŋala miriŋunha malanha nhuŋu. Yo, yäkunydja nhe yurru yindithirrina, ga bukmakthuna nhuna yurru ḻakarama dharrpalnydja yolŋu, bitjan. 10-11 Ŋarra djarr'yurruna dhuwalanydja wäŋa ŋarrakalaŋuwu miṯtjiwu, ga dhiyalana walala yurru yukurra nhina walŋanydja yana; ŋarra yurru gungamanydja walalanha miriŋuwalana, bala walala yurru nhinanydja gunganharana ŋayaŋu‐wurrkurrum'nha. Ŋarra yurru guḻku'kumana nhuŋunydja miṯtji, miṯtji‐gaŋdhunmaramana nhuna. 12 Ga ŋunhi nhe yurru rakunydhirrinydja ya', ga nhuŋu mala‐wunharawuynydja yurru wapthun dharapullilinydja nhokalana. 13 Ga ŋayina yurru ŋuriŋina yolŋuyuna dhuḻ'yun buṉbunydja ŋarraku, bala nhinanydja ŋayi yurru yukurra buŋgawana ŋayi wal'ŋu ŋurruŋuna yanana. 14 Ŋarranydja yurru nhanŋu bäpa'mirriŋuna, ga ŋayinydja yurru gäthu'mirriŋuna ŋarraku. Ŋuli ŋayi yurru ŋula nhä rom‐djarrpiny'tja djäma, ŋarranydja yurru ŋanya dhä‐ḏir'yunna, bitjan yana liŋgu bitjan ŋuli bäpa'mirriŋuyu nhanŋuway ŋayi gäthu'mirriŋunha raypirri'yun yätjŋuru ŋuriŋi dhä‐ḏir'yunarayu. 15 Yurru ŋarranydja yurru yaka warray ganan ŋanya gonha'yun wal'ŋu, bitjarra ŋarra gonha'yurruna ŋanya Djolnha. 16 Nhokuŋu malawunharanydja bitjan liŋgu yurru malawunharamirrina marrtji bala, gupaḏalŋuna yurru weyinŋumirrina; yakana yurru ŋayi bukunydja mulka bitjanna liŋguna yurru dhärra yukurra dhawar'yunamiriwnha.’ Gatjuy, nhe marrtjiyana ga ḻakaraŋa Daypitpana dhuwalayi.”

17 Yuwalkthi ŋayi Naythandja marrtjinana, ga bur‐bunana Daypitku, bala ḻakaraŋalana yukurrana ŋunhiyi liŋgu dhäruktja yana ŋunhi ŋayipi Garray maḻŋ'maranhamina Naythangala.

18-19 Ga dhäŋuru ŋuliŋurunydja Giŋ Daypit marrtjinana bala ŋunhimalayina ḏalwaḏalwa'lilina ŋunhi Garray ŋayipi ḏälkunhamina yukurrana ŋunhili. Ga ŋayi Daypittja nhinanana, bala bukumirriyaŋalanydja yukurrana bitjarra gam'. “Garray, nhenydja dhuwala ŋurruŋu wal'ŋu. Ŋarranydja dhuwala yaka ŋamakurru', yurru nhe warray ŋamakurruny'tja. Nhe djäma ŋamathaŋala ŋarrakuway ga ŋarrakalaŋuwu yumurrku'wu, ga ḻakaraŋala nhe ŋarraku dhunupamirriyaŋala, ŋunhi walala yurru ŋarrakuŋu mala‐wunhara, nhinana yukurra weyinŋumirrina‐wala, mala‐ḏälkuma yurru nhuŋu malanha weyinŋumirrina. 20-21 Garray nhe marŋgi ŋarrakunydja, nhokalaŋuwu djämamirriwu, ga marŋgikuŋala nhe ŋarranha walaŋguŋala. 22 Nhenydja dhuwala biyapulnha wal'ŋu Waŋarr, yakana wiripunydja balanyarayi bitjan nhe wal'ŋu. 23-24 Ŋanapurrunydja ‡ 7:23–24 IsraelYitjuralpuyŋunydja nhuŋuwayŋga yolŋu'‐yulŋu, ŋunhi nhepiŋga ŋanapurrunha walŋakuŋalanydja, dhawaṯmaraŋalanydja garrpiṉminyaraŋurunydja romŋuru ḏirrwiḏirrwiŋurunydja. Nhepiŋga märraŋalanydja ŋanapurrunha nhuŋuwayliliyaŋala, ga djäma ŋanapurruŋgu ḻatju'kuŋala dhika ganydjarr ḏumurru yana rom maḻŋ'maraŋala. Nhe ŋupara gukuŋala wiripuŋunhanydja bäpurru'nha yolŋunha walalanha dhipuŋurunydja wäŋaŋuru, ga bitjarrayi nhe djalkthurruna walalambalanydja waŋarrnha walalanha. Ŋanapurrunydja Yitjuralpuyŋunydja yolŋu'‐yulŋu yurru nhina yukurra nhuŋuwaynha yana yolŋu'‐yulŋu, gupaḏalnha‐wala, ga nhepina yurru ŋanapurruŋgu Waŋarr Godtja.

25-26 “Garray, nhenydja dhuwala Waŋarr God. Biyakana yana liŋgu djämanydja ŋunhi nhe dhawu'‐nherrara ŋarranha, märr yurru ŋuruŋu yolŋu'‐yulŋuyunydja nhokala ḻakarama yäkunydja nhuna yindikumana.

27-29 “Garray, nhe wekaŋala ŋarraku ŋunhiyi ḻatju' dhawu'‐nherraṉara, ga ŋarra nhuna yukurra waŋana, nhe yurru guŋga'yunna dhuwala ŋarrakuŋu mala‐wunharanydja, märr yurru walalanydja bitjanna liŋguna dhärranydja nhuŋuwaynha yanana, märr yurru walala yukurra nhinanydja nhokiyingalana yana djäkaŋuranydja gupaḏalnha. Garray, ŋunhi ŋuli nhe guŋga'yundja, ḻatju'kuma warray dhika gämanydja miṯtji‐wunharanydja ŋarrakuŋu weyinŋumirrina.” Ga bitjarra ŋayi yukurrana Daypitthu bukumirriyaŋalanydja Garraynha.