1 Yo gutha walala, ŋanapurru ḻakarama yukurra nhumalaŋgu ŋunhinha ŋilimurruŋguway Garraynha Djesu-Christnhana ŋunhi ŋayi yurru marrtji lili, ga ḻuŋ'marama yurru ŋitjalanha märramana nhanukalaynha ŋayi ŋunhana wäŋalili. Buku-djulŋimirri, mäkiri'-witjurra yana yulŋunydja walala dhiyakuyi. 2 Yaka märr-yuwalkthiya ŋurikinydja yulŋuwu ŋunhi ŋayi yurru waŋa bitjan yanapi Garraywunydja walu liŋguna bunanana, ŋunhiyinydja ŋunhi Gunhu'yu yurru wirrkina wal'ŋu dhikana dhä-ḏir'yun yolŋu'-yulŋunha yätjmirrinhanydja. Yaka yana waḏutjanydja galyurra ŋuriŋiyi dhärukthu, ga yaka ŋayaŋunydja wilwilyurra barrariyanydja. Wanhaŋuru dhuwaliyi dhäwuny'tja?... Yolkuŋu? Mak ŋurikiŋi yolŋuwuŋu bay',... ŋunhi ŋayi ŋuli djarrpi'kuma ḻakarama, nhanukuŋuway guyaŋinyara, mak ŋula mokuywuŋu dhäruk wekanhara, mak ŋula gonha djorra'ŋuru yanapi ŋanapurruŋguŋuna wukirriwuy. Yaka dhunupa yana ŋäkanydja, bala märr-yuwalkthiyanydja ŋurikiyi. 3 Bulnha guyaŋiyanydja ŋi' walala, märr nhumalanha yurru yaka mayali'-wamanydja bothinyarayŋuyunydja ŋula dhäwu'yu. Liŋgu ŋäthilinydja dhuwala boŋguŋu yolŋuyu walalay guḻku'yu mirithirri ganurruna, ga yurruna ŋayinydja boŋguŋu maḻŋ'thurru warraŋulthina ŋunhi Rom-yätjmirrinydja Yolŋu, ŋunhiyinydjayi ŋunhi ŋayi yurru Godthu ŋayipina ŋanya buwayakkuma warrpam'thundja. 4 Yo, ŋunhiyinydja Rom-yätjtja Yolŋu yarryunna yukurra nyinyaŋdhunna Godkunydja, ga bitjandhi liŋgu ŋayi yukurra nyinyaŋdhundhi ŋuyulkthirriyi bukmakkunydja ŋunhi nhä malanha nhanukalaŋuwu Godkalaŋuwu. Bala ŋayi yurru ŋunhiyi ŋanyapinyay ŋayi garrwarkunharamirri waŋarrkunharamirrina, bala yana Godkalana dharapullili wapthun, bala nhina yukurra yurru ŋunhala Godkalana Buṉbuŋuranydja. Ga ḻakaranhamirri ŋayi yurru ŋanyapinyay ŋayi ŋunhiyinydja bitjanmirrina, “Ŋarrapi yana dhuwala Godtja; ŋarrakuway nhuma yurru buku-ŋal'yundja yukurra,” bitjandhina ŋayi yurru waŋanydja yukurra.

5 Ga ḻakaraŋalanydja ŋarra yukurrana nhumalaŋgu bitjarrayi, ŋunhi ŋarra nhumalaŋgala dhiyali ŋäthili. Guyaŋiya dhuwalayinydja malanha, bala marŋgithiyana. 6 Yuwalk dhikayinydja Rom-yätjmirrinydja Yolŋu boŋguŋu maḻŋ'maranhami ŋanyapinyay ŋayi warraŋulkunharami, yurru yaka ŋayi dhiyaŋunydja-wala yurru maḻŋ'maranharamirri, liŋgu ḏaḏawmarama yukurra ḏirrwiḏirrwi-mulka ŋanya ŋunhinhayi ŋula nhäyu yana, Godkalanydja ŋuriŋiyi miṯtjiyu, märr yurru ŋayi milkunhamirri ŋunhi Rom-yätjtja ŋunhiyi liŋgu yana ŋunhi Gunhu'yu ŋäthili walu-nherrara dhikaŋuwuyi yolŋuwu. 7 Liŋguna ŋuriŋiyi yätjkalanydja ganydjarryu djämana yukurra dhiyala munatha'ŋuranydja dhuwala, yurru dhika gayul wal'ŋu, yaka warraŋulnydja, liŋgu ŋuriŋiyinydja ŋanya yukurra walalay ḏaḏawmaramana yurru, ḻayḻaymaramana yurru, yana liŋgu-u-u ga ŋunhiyi yurru ḏirrwiḏirrwi-mulkanharamirrinydja marrtji gonha'yunna dhuwalanydja wäŋanha. 8 Ga dhäŋuru ŋuliŋurunydja ŋunhi walala yurru ŋunhiyi ḏirrwiḏirrwi-mulkanharamirri walala marrtjina, bala ŋayinydja yurru ŋunhiyi Rom-yätjmirrinydja Yolŋu wapthun baṉarra'lilina, maḻŋ'maranhamirrina yurru ŋanyapinya ŋayi. Bala ŋayi yurru Garrayyu Djesuyunydja ŋayipinydja ŋanya bumana murrkay'kumana, ŋuriŋina walŋayu ŋunhi yurru dhawaṯthun nhanukala dhurrwarakurru. Liŋgu Garraynydja yurru ŋayipinydja warraŋulthirri maḻŋ'thunna ḻatju'na dhikana wal'ŋu, bala ŋuriŋiyinydjayi dhunupana yurru nhanukalay ŋayi djarraṯawun'mirriyunydja djeŋarra'yunydja wal'ŋu buwayakkumana winya'yunmaramana ŋunhiyinhanydjayi Yätjnhanydja Yolŋunha.

9 Yo, ŋunhi ŋayi boŋguŋu ŋunhiyi Rom-yätjmirrinydja Yolŋu maḻŋ'maranhami, ŋayi boŋguŋu ganydjarrnydja gäŋu ŋutu'na dhikana, yurru ŋulaŋuru Mokuywu ganydjarrnydja Satangu; bala ŋayi boŋguŋu djäma dhika nhä ganydjarr-ḏumurru rom, ṉirryunaramirrina dhika. Yurru bothi warray ŋayi boŋguŋu ŋunhi djäma, yanapi ŋayi biyapul wal'ŋu garrwar ga bathala ŋayi, bitjan God. 10 Ga ŋuriŋiyinydjayi nhanukala ganydjarryunydja ŋayi yurru mayali'-wilkthunna ŋunhinhanydja dhuwurr-yätjmirrinha yolŋunha walalanha, ŋunhi walala yukurra marrtji rakunydhinyaralili, liŋgu walala yaka ḏukṯuk ŋurikiyi yuwalkŋuwu; yaka walala märraŋala ŋunhiyi yuwalkŋu dhäwu' Christnhanydja, märr walala bini walŋathinya. 11 Ga dhiyakuyina ŋayaŋuwu Godthu yukurra walalanha dhayuŋana ŋurikalanydja goŋlili yätjkalanydja wal'ŋu, ŋurikalanydja ŋunhi walala djarr'yurruna ŋanya malthunarawu nhanŋu, bala ŋayi yurru ŋuriŋiyi Yätjthunydja mayali'-wilkthunna walalanha, liŋgu walala yurru ŋunhi märr-yuwalkthirri ŋunhiyi, bothinyaramirri nhanŋuna. 12 Bala ŋayi yurru Godthunydja walalanha rom-nyamir'yunna yana yätj-ḻakaramana, bala yarrkmaramana walalanha ŋunhiwalana yätjkalana wäŋalili gupaḏalkumana yurru, bukmaknhana yana ŋunhi walala yurru yaka märr-yuwalkthirri yuwalktja dhäwu' Christnhanydja, liŋgu walala wirrkinydja ḏukṯukthirri yukurra yätjkuna wal'ŋu yanana.

13 Yo gutha walala, Garraynydja ŋayipinydja märr-ŋamathirri yukurra nhumalaŋgunydja, ga bitjanna liŋguna ŋanapurrunydja yukurra buku-wurrpanna Godnhanydja nhumalaŋgu, liŋgu Godthu ŋayipi djarr'yurruna nhumalanhanydja, bala walŋakuŋalana yanana. Ga nhumanydja dhuwala ŋurruŋumirri wal'ŋu yana yolŋu'-yulŋu ŋunhi ŋayi Godthu märraŋala nhanŋuwayliliyaŋala ŋayi, ŋuriŋiyina ŋunhi nhuma märr-yuwalkthina, bala märraŋalana yana yuwalkŋunydja ŋunhiyi dhäwu' Djesunha. Bala ŋayi ḏarrtjalkkuŋalana nhumalanha ŋuriŋi nhanukalaynydja ŋayi Birrimbirryu Garrkuḻukthunydja, bala nherrara ganaŋ'maraŋalana Godkuna nhanŋuwaynha. 14 Yo, dhiyakuyina ŋunhi ŋayi wäthurrunanydja nhuŋu ŋuliwitjarrayi dhärukkurru ŋunhi ŋanapurru ḻakaraŋala nhumalaŋgu Christnha yukurrana; ŋayinydja ḏukṯuk nhumalaŋgu, nhuma yurru yukurra nhina nhanukalana Garraywala Djesu-Christkala djeŋarra'ŋura ḻatju'ŋurana wal'ŋu dhikana. 15 Bala dhärriya yana mukthurra ŋoy-wuṉḏaŋarryiyana, ga ŋayathaŋa baṯ biyakana ŋunhiyi liŋgu yana dhäwu' ŋunhi nhuma ŋäkula ŋanapurruŋguŋu, ŋunhi ŋanapurru yukurrana ḻakaraŋala marŋgikuŋala nhumalanha ŋanapurruŋgalay ŋäṉarryu, ga yananydja djorra'kurrunydja ŋuli ḻakaranha nhumalaŋgu.

16-17 Yo, wirrki yana ŋayi Godtja märr-ŋamathirri yukurra ŋilimurruŋgu, bala ŋayi yänana wekaŋalanydja nhanŋuway ŋayi ŋunhi Garrkuḻuktja Walŋa ŋilimurruŋgu, märr yurru ŋilimurru nhinanydja yukurra marrparaŋ'thirrina gupaḏalkumana, bala gatjpu'yunna yukurra yurru yulŋunydja, dhukarr-nhämana ŋuriki ŋamakurru'wunydja ŋunhi ŋayi dhawu'mirriyaŋala ŋilimurrunha. Ŋanapurru yukurra bukumirriyamanydja ŋäŋ'thun nhumalaŋgu, märr ŋayi yurru Djesu-Christ ŋilimurruŋgu Garray ga God ŋilimurruŋgu Bäpa bämara'mirrinydja nhumalaŋgu, märr yurru nhuma dhärra yukurra ŋoy-ḏälthirrina ga barrarinyamiriwnha, bala nhuma yurru djämana-wala yana ŋamakurruny'tja, ga waŋa yurru yukurra ŋamakurruny'tja dhäruk.