5
Wäthun yukurra Godkalaŋumirriwunydja yolŋu'‐yulŋuwu roŋiyinyarawuna bilyunarawu
5:1–27 (Calling God’s people to repent)
1 Nhuma * IsraelYitjuralpuyŋu yolŋu walala, mäkiri'‐witjurra walala yana ŋarraku, ŋarranydja yurru dhuwala miyaman bäpurru'wuynha manikaynydja nhumalaŋgu bukmakkunydja, bitjan gam'.
2 Wäŋa Yitjuralnydja märr‐winya'yurrunana bitjarrana yukurrana,
yurru ŋunhiyi wäŋanydja ŋaṯtjarrkthurrunana ŋayi galkina,
ga yakana yurru ŋayi biyapul ŋunhiyi gaŋgathirrinydja.
Warrpam'thu yana ŋanya ŋunhi gonha'yurrunanydja,
ga gänana ŋayi ŋunha yulŋunydja ŋayipina,
yakana ŋanya yurru ŋula yolthu guŋga'yundja.
3 Yo, Garraynydja waŋana ŋurikala yolŋu'‐yulŋuwala Yitjuralpuyŋuwalanydja bitjarra, “Yo, mirithirri guḻku' nhumalaŋgu yurru yuḏayuḏanydja ḏarramuwurru marrtji marililinydja, gulmaranharawu ŋuriki miriŋuwunydja walalaŋgu, yurru märr‐ḻurrkun'nha ŋunhiyi yurru roŋiyirrinydja lilinydja walŋamirrinydja, liŋgu bukmakthirrinydja ŋunhi yolŋu walala yurru burakirrina ŋunhili mariŋurana.”
4 Biyapul ŋayi Garray waŋa yukurra Yitjuralpuyŋuwala yolŋu'‐yulŋuwala bitjan, “Go, roŋiyiyana walala lili ŋarrakalana, märr nhuma yurru nhina yukurra walŋathirrina wal'ŋu. 5 Yaka marrtjiya ŋunha † BethelBithullilinydja wo ‡ GilgalGilkallili wo birrka'mirrilili; yakana biyapulnydja buku‐ŋal'yurra ŋuriki be nhäkunydja wiripuŋuwunydja waŋarrwu. Yolŋu'‐yulŋu ŋurikiynydjayi wäŋawuy yurru garrpiṉarawuynha walala ŋurikiŋi miriŋuwuŋuna, bitjan walalanha yurru djaw'‐djawyunna bena‐wala barrkulilina mulkuruwalana wäŋalili, ga wäŋanydja ŋunhiyi yurru bitjan wiraŋdhirrina, bäyŋuthirrina yolŋumiriwyirrina.”
6 Biyaka ḻarruŋa gal'ŋu warrya'yurra Godkunydja Garraywunydja mirithiya, marrtjiyana nhanukala lili roŋiyiyana, ga nhenydja yurru nhina yukurra walŋana. Ga ŋuli nhuma yurru yakanydja bilyun roŋiyirri nhanukala lili, ga ŋayinydja yurru marrtji bitjanna bitjan gurtha ŋunhi, bitjan yurru ŋayi baḏuwaḏuyunna warrpam'thunna nhumalanha Yitjuralpuyŋunhanydja yolŋu'‐yulŋunha ga nhumalaŋgu be nhä waŋarr malanha, ga ŋuriŋinydja be nhumalaŋgala waŋarryunydja, yakana ŋayi yurru ŋunhi ŋultjikuma gurthanydja. 7 Yo, mirithirrina nhuma yana yätjmirrina gal'ŋu yulŋunydja, ga yaka nhuma ŋuli djäma rom‐waŋganydhirrinydja; yakana ŋula yolthu waŋganydhu ŋuli djäma rom‐dhunupanydja gal'ŋu. 8 Yo, ḻarruŋa gal'ŋu warrya'yurra Garraywu, ŋurikinydja waŋarrwu ŋunhi ŋayi djäma ŋunha ganyu' malanha djiwarr'lili. Ŋayi ŋuli Garrayyu bilmarama munhanydja walupuykumana, ga walunydja ŋuli ŋunhi bilyun munhayirri ŋuriŋiyi liŋgu nhanukala yana ganydjarryunydja; märrama ŋayi ŋuli gapunha ŋulaŋuru moṉukŋuru, ga rarryun wäŋalilina ŋarakalilina. Yo, yäkunydja ŋayi Garray wal'ŋu Ganydjarr‐ḏumurru biyapul. 9 Waḏutja yana dhika ŋayi yurru baḏuwaḏuyundja ŋunhinydja yolŋunha ŋunhi ŋayi ḏäl‐ḻakaranhamirri ŋuli be gal'ŋu, ga dhunupana ŋayi yurru ḏaw'‐ḏawyunna yana wal'ŋu ŋunhi walalaŋgu ḏälmirrinydja wäŋanha.
10 Yo, wiripunydja nhuma ŋuli nyinyaŋdhun ŋurikinydja yolŋuwu ŋunhi ŋayi ŋuli nhäma nhumalaŋgu rom, bala yätj‐ḻakaramana waŋa, ga bitjandhi nhuma ŋuli nyinyaŋdhundhi ŋuriki yolŋuwu ŋunhi ŋayi ŋuli ḻakarama yuwalkŋu gal'ŋu dhunupa dhäwu'. 11 Ga muŋdhu'‐muŋdhunna nhuma ŋuli yolŋu'‐yulŋunha ŋunhinydja ŋurruwuykmirrinhanydja, ga djaw'‐djawyunna gombumana walalaŋgu ŋathana malanha ŋula nhäna, ga dhiyakuyinayi märrwu ŋarra yurru nhumalanha dhä‐ḏir'yundja yana. Nhuma ŋuli buṉbu djäma dhapirrkkuma dhika wal'ŋu nhumalaŋguway nhuma, yurru yakana nhuma yurru nhinanydja yukurra ŋunhiliyi, muŋbunumanydja yurru, ga yakana yana nhuma yurru ḻuka yukurra weyikany'tja ŋuliŋuruyi nhumalaŋgalaŋuŋuru borumdja malanha, ŋunhi nhuma yurru ŋuthanmarama. 12 Ŋarranydja nhäma yukurra ŋunhi yätjtja malanha ŋunhi nhuma ŋuli yukurra djäma. Nhuma ŋuli ŋayaŋu‐yätjkuma yukurra rom‐ŋamakurru'mirrinhanydja ŋunhi yolŋunha walalanha, ga ŋunhi ŋuli ŋayi ŋurruwuyk yolŋu mariŋuranydja, nhenydja ŋuli yakana marrtji guŋga'yunarawunydja nhanŋu. 13 Yo, balanyaramirriyunydjayi waluyu ŋunhinydja yolŋu ŋunhi ŋayi marŋgi wal'ŋu ŋunha ŋayaŋu nhanŋu Garraywu, ŋunhinydjayi yolŋu ŋayi yurru nhina dhäruk‐mukthunna, liŋgu dhuwalanydja wäŋa yätjnha yanana gal'ŋu, yakana ŋamakurru'.
14 Yo, nhe ŋuli waŋa bitjan, “Garraynydja dhuwala dhiyalami ŋilimurruŋgala galki,” bitjan, yurru yaka warray ŋayinydja ŋuli nhokala. Biyaka djambi wiripukunhamiya ḻiyanydja nhunapinyay nhe, ga djäma nhäyinyara ŋamakurru' wal'ŋu ga ŋunhina liŋguna, märr yurru nhe yukurra nhina yuwalk yana walŋa wal'ŋu, bala ŋayinydja yurru ŋunhi Garraynydja yuwalknha gal'ŋu yana nhokala. 15 Yo, nyinyaŋdhurrana ŋurikinydja yätjkunydja gal'ŋu, ga märryu‐ḏapmaraŋana nhäyinyara ŋamakurru' ga dhunupa ga yuwalk gal'ŋu. Djäma yana rom‐waŋganydhiyana gal'ŋu, märr yurru ŋuruŋu birrka'mirriyunydja märramana nhä ŋunhi ŋamakurru' wal'ŋu; ŋayi mak yurru Garray maŋutji‐wuyunna ŋurikinydja yolŋu'‐yulŋuwu ŋunhi walala yukurra mukthun walŋamirri nhina dhiyaŋu‐wala.
16-17 Yo, God Waŋarr Ganydjarr‐ḏumurrunydja waŋa ŋuli yukurra bitjan, “Ŋunha birrka'mirriŋuranydja wäŋaŋura malaŋumi yolŋu walala yurru marrtji nyä'yunmirrina, nyarrŋayunmirri yurru ŋurikina ŋunhi marrtji murrmurryun, liŋgu ŋarranydja marrtjina yukurra dhuwala lili dhä‐ḏir'yunarawuna nhumalaŋgu,” bitjarra ŋayi Garray waŋananydja. 18-20 Wiripu‐guḻkuny'tja nhuma ŋuli waŋa bitjan, “Ŋanapurrunydja yukurra dhuwala wirrkina yana dhukarr‐nhämanydja goŋmirriyirrina dhikana wal'ŋu, gatjpu'yundja ŋurikiyi ŋunhi ŋayi yurru Garray marrtji lili.”
Nhäku warray nhuma yukurra dhukarr‐nhämanydja be gatjpu'yun märranharawu ŋamakurru'wunydja? Ŋulinyaramirriyunydjayi dhuwalanydja wäŋa yurru monyguma warrpam'nha warumukthuna munhayuna, yakana yurru biyapul djarraṯawun'thirri.
21-22 Yo, Garraynydja waŋa yukurra bitjan, “Bitjan warray liŋgu nhumanydja yukurra ḻuŋ'marama warray, be nhäku warray malaŋuwu djämawu, dharrpalwu warray romgu, yurru ŋarranydja ŋuli nyinyaŋdhun, ŋapa‐nherraṉmirri ŋurikiyi romgu. Nhuma ŋuli yukurra gäma mundhurrnha ŋarraku ŋathana ga wäyinnha, ga bathan wäyinnha ŋunha barŋlilinydja, yurru yakana ŋarranydja yurru ŋunhiyi märrama nhumalaŋguŋu, yakana nhuma yurru ŋayaŋu‐yal'yunaranydja liŋgu ŋuriŋinayi nhumalaŋgala mundhurr‐wekanharayuna. 23 Be manikay nhuma ŋuli wiripunydja miyaman, yurru yanana ŋunhiyinydja rirrakaynha waŋganynha. Dhäruk‐mukthurrana, yaka ŋarranydja ḏukṯuk dhiyakinydjayi rirrakaywu. 24 Dhiyaku gal'ŋu ŋarra yuwalktja djäl gam'. Nhuma yurru djäma rom‐waŋganydhirri yana wal'ŋu, ga nhina ŋayaŋu‐dhunupa bitjan liŋgu wal'ŋu. 25 Nhuma Yitjuralpuyŋu yolŋu walala, yaka ŋarra nhumalanha ŋunhi waŋana ŋäŋ'thurruna mundhurr‐wekanharawunydja ŋarrakuway ŋulinyaramirriyunydja ŋunhi ŋarra nhumalanha gäŋala yukurrana ŋuliwitjarra ŋanhdharkkurru wäŋakurru. Ŋarranydja djäl nhuŋuway yana, yaka ŋurikiyinydjayi mundhurrwunydja.
26-27 “Yo, yana märraŋana nhumalaŋguway be waŋarrnhanydja ŋunhi goŋbuynydja djämawuy, bala gäŋana djaw'yurrana bena‐wala, barrkulilina wäŋalili ŋunhana, liŋgu ŋarranydja djuy'yun yurru miriŋunhana lili, ga ŋayinydja yurru nhumalanha garrpiṉna, bala djaw'yunna bena‐wala nhanukiyingalana ŋayi wäŋalili.” Ga bitjarra ŋayi Garray waŋananydja.