1 Ga dhurrwaraŋuru ŋuliŋuruyinydjayi ŋayi garr'yurruna ŋarranha bitjarra bala gali'lili dhimurru'lili, ŋarra yukurrana dhärrananydja galki dhurrwaraŋura ŋunhili ḻoḻuŋura yana. 2 Ga ŋuliŋuruyinydja ŋarra nhäŋala biyapul'nha dhikana djarraṯawun'tja, ŋayi yukurrana marrtjina lili Godnha ŋayipina nhanukalay ŋayi djarraṯawun'thunydja; marrtjinanydja ŋayi yukurrana ŋuliŋuru dhimurru'ŋuru, ga rirrakaynydja nhanŋu ŋunhi balanyarana bitjan ḏowu dhaḻawan biyapulnha wal'ŋu, ga ŋunhiyi wäŋanydja birrka'mirri ḻiw'marama djäriyuna dhika bathara, warrpam'nha djarraṯawun'kuŋala. 3-4 Ŋarra nhäŋalanydja ŋunhi, bala bukunydja‐djaw'yunminana, bala ŋarra galkinana yana bukunydja ŋunha munatha'lilina, ga yana liŋgu ga djarraṯawun' ŋunhiyi djuḻkthurruna. Marrtjinanydja ŋayi yukurrana ŋunhiyi, ga gulŋiyina ŋuliwitjarrayi dhurrwarakurru, bala ŋunhana‐wala gulŋiyina djinawa'lilina wal'ŋu Buṉbulilina Godkalana ŋunhana.

5 Ga dhurrwaraŋuru ŋuliŋuruyinydjayi Godkala Walŋayu ŋuriŋi Birrimbirryu gaŋgathinyamirriyaŋala dhawuṯmaraŋala ŋarranha, bala gäŋalana yukurrana balayina ŋunhiwalayina Buṉbulili Godkalana, warraŋullili wal'ŋu ŋunhi nherrara. Bala ŋarra ŋuliŋuruyinydja nhäŋala ŋunhiyi Buṉbunydja djinawany'tja wal'ŋu, biyapulnha wal'ŋu dhaŋaŋnha nhanŋu djeŋarrany'tja ḻatjuny'tja Garraywu. 6-7 Ga ḏarramunydja ŋunhiyi yukurrana dhärrana ŋarrakala galki gali'ŋura, bala ŋarra ŋäkula rirrakaynha ŋanya Garraynha, ŋayi waŋananydja yukurrana ŋarrakala beŋuruyi Buṉbuŋuru bitjarra, “Yolŋu, dhuwalanydja gay' wäŋa ŋarraku nhinanharamirrina wal'ŋu, ga bitjandhi liŋgu ŋarra yurru ḻuku‐wurrumanydja yukurra dhiyala wäŋaŋura. Yo, nhinanydja ŋarra yurru wäŋaramana yukurra dhiyalayina ŋarrakalaŋuwalana miṯtjiwala yolŋu'‐yulŋuwala Yitjuralpuyŋuwalana gupaḏalnha‐wala yana. Yakana yurru biyapul Yitjuralyu yolŋu'‐yulŋuyu ga walalaŋgala ŋurru'‐ŋurruŋuyu djäma yukurra dhuwurr‐yätjtja malanha; yakana yana biyapulnydja walala yurru yukurra buku‐ŋal'yun wiripuŋuwunydja waŋarrwu, ga baḏuwaḏuyun dhuwalayi ŋarrakunydja Buṉbu ŋuriŋiyinydja ŋula nhäyu maḏayin'thunydja malaŋuyu, bäyŋuna yana. 8 Ŋäthilinydja ŋunhinydja ŋuriŋiyi nhumalaŋgala ŋurru'‐ŋurruŋuyu guyaŋina yanapi ŋarranydja ŋula nhä, balanyara bitjan dhiyakuy munatha'wuy waŋarr, bala walala nherrara maḏayin' be dharpa malanha, bala buku‐ŋal'yurruna yukurrana ŋurikiyina be nhäkuna wiripuŋuwuna waŋarrwu ŋarrakalana galkina wal'ŋu ŋunhili Buṉbuŋura. Ŋarranydja dhuwala ḏarrtjalk warray wal'ŋu God Waŋarr, yurru walalanydja ŋunhi ŋarranha ŋuli yolŋu'‐yulŋuyunydja nhäŋiniŋ'‐ḻakaramana, liŋgu ŋuriŋi walalaŋgalay be nhäyuna yätjthuna dhuwurryu djämayu, ga dhiyakuyina märrwu ŋunhi ŋarra ŋaramurryinanydja walalaŋgu, bala baḏuwaḏuyurrunana walalanha. 9 Ga ŋunhi walala yurru ganan gupaḏalkuma wal'ŋu ŋunhiyi waŋarrnha wiripuŋunha, ḏupthun wal'ŋu be nhä maḏayin'nhanydja dharpanha malaŋunha ŋula nhänha, bala ŋarrapinydja yurru nhinana yukurra walalaŋgala gupaḏalnha‐wala.”

10-11 Bala ŋayi Garray waŋana biyapul bitjarra, “Yolŋu, lakaraŋa ŋuripa ŋarrakalaŋuwanydja yolŋu'‐yulŋuwa Yitjuralpuyŋuwanydja nhäyinyara dhuwala gay Buṉbu ŋarrakunydja, ga nhäyinyara rom ŋarraku dhiyaku Buṉbuwu, märr yurru walalanydja gorana walalaŋgalay ŋuriŋi be nhäyunydja romdhu, bala ŋanydjaḻa'yunna, gonha'yunna gupaḏalnha‐wala yana. Wukirrina yana yulŋunydja dhuwalayi djorra'lilina, märr yurru walala nhämana, bala mulka baṯ bitjanna dhuwalayi ŋarraku romdja, bukmakkumana yurru. 12 Yo, dhuwalanydja Buṉbu ŋarrakunydja mirithirri wal'ŋu dharrpal yana, ga ŋunhayi bukukurru ḻiw'marama balanyarayi liŋgu dharrpalyi, ḏarrtjalk yana bitjan ŋarrapi. Ga dhuwala ŋarraku ŋunhi romdja gam'. Yakana yurru ŋula yol moy'mirrinydja galkithirri marrtji ŋarrakala; ŋunhina liŋguna marrtji yurru galkithirrinydja ḏarrtjalknha yana wal'ŋu.” Ga bitjarra ŋayi Garrayyu ḻakaraŋalanydja ŋarrakala.