1 Yo, dhuwalanydja gay dhäruk Garrayyu wekaŋala * JoelDjawulwala, dhuwala gam'. 2 Mäkiri'‐witjurra ŋäka nhuma ŋaḻapaḻmirri yolŋu walala, ga nhuma dhuwali yolŋu walala † JudahDjudawuy wäŋawuy, ŋäka dhuwala dhäruk. Yaka nhuma ŋäkula balanyarayi dhäwu' ŋäthilinydja. 3 Mäkiri'‐witjurranydja ŋamathaŋa yana, märr nhumanydja yurru ḻakarama nhumalaŋgalaŋuwa yumurrku'wana, ga walalanydja yurru nhumalaŋgalaŋuyunydja yumurrku'yu marrtji weka'‐wikamana bala, gupaḏalnha‐wala.

4 Yo, dhuwala wäŋanydja liŋguwuynha baḏuwaḏuyunarana, ga ŋathanydja malanha liŋguna ḻukanhara dhawar'maranharana warrpam'puynha ŋurikiŋina ḏetjkuŋuna. Yo, ŋurruŋu ŋäthili walala marrtjina, ga ḻukana ŋunhiyi ŋatha, ŋula nhämunha'yu miṯtjiyu ḏetjthu malaŋuyu. Ga biyapul dhuḏiŋunydja marrtjina ŋula nhämunha'yi yana miṯtji biyapul, ga ḻukana ŋunhi bäythinyarawuynha, dhawar'maraŋala yana, ga biyapul wiripu‐guḻkuny'tja marrtjina yukurrana, yana liŋgu ga warrpam' ŋunhi nhä malanha dhawar'yurruna wiraŋdhina.

5 Bira'yurrana nhuma ŋunhi leŋumirrinydja walala! Ŋäthiyana nhumanydja, ŋunhinydja walala ŋunhi nhuma ŋuli ḻuka yukurra ŋänitji borum weyika'. Yakana nhuma yurru biyapulnydja ḻuka yukurra, liŋgu borumdja ŋunhi liŋguna dhawar'yurrunana, liŋguwuynha baḏuwaḏuyunarana warrpam'puynha ŋurikiŋina ḏetjkuŋuna.

6 Yo, ŋunhiyi miriŋunydja marrtjina dhipala ŋilimurruŋgalanydja wäŋalili, ŋula nhämunha'na miṯtji, biyapulnha gal'ŋu dhaŋaŋ, ga biyapulnha wal'ŋu gumurr‐ḏälmirrina, ga miriŋunydja ŋunhiyinydjayi balanyara bitjan läyin ḻirra‐raywal ga dharirr‐weyin'mirri, marrtjina ŋayi lili baḏuwaḏuyunarawu ŋilimurruŋguna. 7 Liŋguna ŋunhi miriŋunydja bunanana, ga baḏuwaḏuyurruna ŋarraku borum dharpa, ḏaw'‐ḏawyurruna marrtjina baṉdja'‐baṉdjanydja borum ŋunhi, ga yarrar'maraŋalana marrtjina ŋunhi barrwaṉ'tja malanha ŋurikiy borumbuy dharpawuy, ga dharpanydja ŋunhi dhärra yukurra warraŋulnha yana, ŋula nhämiriwnha.

8 Way yolŋu walala! Ŋäthiyana nhumanydja, biyakana bitjan wirrkuḻ ŋunhi yolŋu ŋäthi ŋuli nhanukalaŋuwu ŋayi yuṯawu dhuway'mirriŋuwu ŋunhi yurru ŋayi rakunydhirri. 9 Dhuwala wäŋanydja wiraŋnha ŋathamiriwnha; yakana yurru ŋula yolthu yolŋuyu gäma ŋatha mundhurrnydja ŋunha Godkalanydja Buṉbulili, ga ŋunha ḏalkarra'mirrinydja yolŋu yukurra nhina galŋa‐yätjthirrina yana wal'ŋu, liŋgu bäyŋuna walalaŋgala goŋŋura ŋunhi walala yurru mundhurr‐wekama nhanŋu Garraywu. 10 Dhuwalanydja wäŋa baṉḏanynha wiraŋnha, ŋula nhämiriwnha, ga munathany'tja dhuwala wäŋa yukurra galŋa‐yätjthirrina dhikana wal'ŋu, liŋgu ŋathanydja ŋunhi liŋguna baḏuwaḏuyunarana warrpam'puynha, ga bäyŋuna borumdja weyika', liŋguna räwaknha baṉḏanynha.

11-12 Nhuma ŋatha‐dholkunharamirrinydja walala, ŋäthiyana walala, liŋgu ŋathanydja ŋunhi liŋguwuynha baḏuwaḏuyunarana, warrpam'thunarana gal'ŋu, ga borumdja ŋunha dharpa binydjitjnha, räwakthinyarana. Ga bukmaknha yolŋu walala nhina yukurra ŋunha galŋa‐yätjthirrinydja, yakana ŋula yol nhina yukurra galŋa‐djulŋithirrinydja dhiyaŋu‐wala.

13 Ŋäthiyana nhuma ŋunhi ḏalkarra'mirrinydja yolŋu walala, ŋunhi nhuma Godku djämamirri mala. Marrtjiya ŋunha yolŋu'‐yulŋuwalana wal'ŋu, ga ŋäthiyanydja yukirriya munha‐ŋuparra yana, liŋgu bukmak ŋathanydja malanha ga weyikany'tja winya'yurruna liŋguna, dhawar'yurrunana; yakana ŋilimurru yukurra dhika ŋayathamanydja buku‐wekanharawunydja mundhurr nhanŋu Godku. 14 Yo, gawaw'yurrana ŋuruku yolŋu'‐yulŋuwunydja, waŋgany‐manaparrana walalanha, ga ḻakaraŋanydja walalambala walala yurru bukumirriyamanydja ŋoy‐ŋathamiriw yukurra yana. Waŋgany‐manaparra ŋunhi ŋaḻapaḻmirrinha wal'ŋu, ga bukmaknha ŋunhi yolŋunha walalanha ŋunhi walala nhina yukurra ḻiw'marama ‡ JudeaDjudiya wäŋaŋura, walala yurru marrtji bukmakthirri yana ḻaw'yun ŋunhiwala Godkala Buṉbulili, ga gawaw'yun yurru Godkala märrliliyama guŋga'yunarawunydja. 15 Liŋgu walu Garraywunydja dhuwala galkina yanana; galkina yurru ŋunhi Garrayyu ganydjarr‐ḏumurruyunydja waŋarryu Godthu baḏuwaḏuyunna yanana warrpam'thunna yurru dhuwurr‐yätjmirrinhanydja yolŋu'‐yulŋunha. Yo, ŋunhiyinydjayi walu yurru biyapul'nha barrarimirrina dhikana wal'ŋu, liŋgu ŋayipi Godthunydja yurru dhä‐ḏir'yun ŋunhinydja yolŋu'‐yulŋunha, rom‐waŋganydhirrina yana yurru ŋuriŋiyinydjayi waluyu.

16 Yo, ŋilimurru nhäma yukurra ŋathanhanydja malaŋunha liŋguwuynha baḏuwaḏuyunarana, räwakthinyarana binydjitjthinyarana, liŋgu bäyŋuna waltjaṉ, ga ŋilimurrunydja dhuwala ganydjarrmiriwnha, yakana ŋilimurrunydja yurru ŋunhi gaŋgathinyamirriyama walŋathinyamirriyama. Yakana ŋula yol yolŋu marrtji ŋuli ŋayaŋu‐djulŋithirrinydja ŋunha Godkala Buṉbulili. 17 Yo, ŋatha maŋutjinydja liŋguna rakunynha dhiyalaŋumi munatha'ŋuranydja, liŋgu dhuwala munathany'tja baṉḏanynha ganbarknha, ga ŋunha bala ŋathawuynydja buṉbu dhärparknha, ŋathamiriwnha, bak‐bakmaranharana liŋguwuynha. 18 Ga ŋunha bulikiny'tja walala yukurra mor'yunmirrina, liŋgu ŋuriŋina marrya'yinyarayuna, liŋgu bäyŋuna walalaŋgu mulmu ŋatha ḻukanharawu, ga balanyara liŋgu bembinydja malanha wäyindja murrmurryundhi marrtji.

19 “Garray, dhuwalana ŋarranydja, märrliliyama ŋarra yukurra gawaw'yun nhokalana guŋga'yunarawunydja, liŋgu wäŋanydja dhuwala warrpam'puynha baṉḏa'‐baṉḏanydhinyarana ganbarkthinyarana; mulmu dhuwala ga dharpa marwat räwaknha binydjitjthinyarana, rakunymirrina liŋguna, 20 ga bitjandhi ŋunha warrakandja malanha gawaw'yundhi yukurra nhokala guŋga'yunarawu, liŋgu ŋunha mayaŋ'tja gapu baṉḏa'‐baṉḏanynha, bäyŋuna gapu walalaŋgu ḻukanharawu.”