1 Yo, Garraynydja Godtja yukurra waŋa bitjan gam'. “Ŋäka dhuwala dhäruk. Galki yurru ŋunhi ḻanydjat‐ḏumurrunydja wal'ŋu yolŋu ga dhuwurr‐yätjnhanydja ŋunhinydja baḏuwaḏuyunna warrpam'thunna, nhärana yurru‐wala warrpam'nha gurthayuna ŋuriŋina. Yo, yolŋuyu ŋuli barrkuwatjkuma ŋathanha ŋuliŋuru dhukun'ŋurunydja, ga dhuŋgur'yunna ŋayi yurru ŋunhi dhukun'nhanydja gurthayuna, ga bitjandhina ŋarra yurru ŋunhi yolŋu'‐yulŋunha ḻanydjat‐ḏilkurrunhanydja, ŋunhi ŋayi ŋuli garrwar‐ḻakaranhamirri ŋanyapinyay ŋayi, ga ŋunhinha walalanha ŋunhi walala ŋuli djäma yätj wal'ŋu dhuwurr, yana ŋarra yurru warrpam'thunna baḏuwaḏuyundja walalanha dhawar'maramana, ga yakana yurru ŋula waŋganydja nhina yukurra walŋa.

2 “Ga ŋurikalayinydjayi walalaŋgala ŋunhi walala ŋuli dhäruk märrama ŋarranha, ga rom‐wiyaṉiyirri ŋarraku yäkuwu, ŋarrakunydja yurru ŋayaŋu‐dhunupayinyarayunydja ŋunhi walalanha baḏarraŋ'kumana walŋakumana, bitjanna bitjan ŋuli walu gaŋgathirri, bala bathanna ŋayi yurru, walŋa‐wekamana ŋuriŋiyi goŋdhuna. Bala nhe yurru nhinanydja yukurra walŋana yanana ŋarrakalana ŋuriŋina walŋayu, ga dhawaṯthundja nhuma yurru yänana‐wala, wapthu'‐wapthunna dhikana goŋmirriyirrina galŋa‐djulŋithirrina, bitjanna bitjan wäyin buliki yuṯa ŋuli wapthu'‐wapthun yukurra galŋa‐djulŋithirrina, ŋunhi ŋayi yurru dhawaṯthundja‐wala yänana ŋuliŋuruyi ḻoḻuŋurunydja. 3 Yo, ŋulinyaramirriyunydjayi ŋunhi ŋarra yurru djäma dhawar'marama bukmak nhä malanha ŋunhi ŋarra dhawu'mirriyaŋala, nhumanydja yurru muŋdhu'‐muŋdhunna ŋunhi marrtji dhuwurr‐yätjmirrinhanydja wal'ŋu, bitjanna bitjan yolŋuyu ŋuli dhukun'nha ŋunhi muŋdhu'‐muŋdhun nhanukalay ŋayi djalkiriyu.

4 “Guyaŋiya ŋunhi romnha ŋunhi ŋarra wekaŋala ŋarrakalaŋuwala djämamirriwala * MosesMawtjitjkala ŋunhala ŋunhi bukuŋura † SinaiDjäniya yäkuŋura. Dhäruktja märraŋa ŋunhiyi, ŋunhi ŋarra wekaŋala nhanukala bukmakku yana ŋarrakalaŋuwu yolŋu'‐yulŋuwu ‡ IsraelYitjuralpuyŋuwunydja, ga biyaka marrtjiyanydja yukirriya ŋuriŋi bili yana romdhunydja.

5 “Yuwalk yana ŋarra yurru djuy'yundja nhumalaŋgu djawarrkmirrinha yolŋunha § ElijahYelatjanha yäkunha, ŋayi yurru marrtji ŋäthilinydja, ga yurruna ŋunhiyinydja walu Garraywunydja yurru buna, ŋunhiyinydja ŋunhi ŋayi yurru Godthu warrpam'thunna baḏuwaḏuyun yana yätjnhanydja ŋunhi, ŋuriŋina nhanukalay ŋayi bathalayuna wal'ŋu ganydjarryu. 6 Yo, ŋuriŋiyi djawarrkmirriyunydja yurru bilmarama ŋayaŋuna ŋunhinha bäpa'mirriŋunhana walalanha, märr yurru walala yuwalkkuma yana märryu‐ḏapmaramanydja walalaŋguway walala yumurrku'nhanydja. Ga bitjandhi liŋgu ŋayi yurru bilmaramayi ŋayaŋu ŋunhinydja walalaŋguway yumurrku'nhanydja, märr yurru walala yuwalkkuma yana märryu‐ḏapmarama märr‐ŋamathirrinydja wal'ŋu walalaŋgalaŋuwu ŋäṉḏi'mirriŋuwunydja walalaŋgu ga bäpa'mirriŋuwunydja. Ŋuli walala yurru yolŋu'‐yulŋu yakanydja bilyun ga nhina waŋganyŋuranydja, ŋuriŋi bili ŋarrakalanydja romdhu, bala dhuwalanydja wäŋa yurru baḏuwaḏuyunna yanana, warrpam'thunna yurru, ŋulinyaramirriyunydjayi waluyu ŋunhi ŋarra yurru marrtji lili.” Ga bitjarra ŋayi Garray waŋananydja.

Ga dhuwalanydja dhawar'yunna yukurra * MalachiMalakaywuŋunydja dhäwu'.