1 Ga walalanydja ŋunhiyi * CanaanGaynanbuyyunydja yolŋu'‐yulŋuyu ŋäkulana walalanhanydja † IsraelYitjuralpuyŋunhanydja miṯtjinha, ŋunhi walalanydja yukurrana marrtjinana lili galkithinana, bala walala yana marrtjinana bunharawuna walalaŋgu. Bunharaminanydja walala yukurrana, bala ŋuriŋiyi Gaynanbuyŋuyunydja yolŋu'‐yulŋuyu djaw'‐djawyurrunana marrtjina wiripu‐guḻku'nhanydja Yitjuralpuyŋunha, walala bini djaw'‐djawyuna balayi walalaŋgalaynha walala wäŋalili.

2 Ga walalanydja ŋunhiyi dhunupana yana Yitjuralpuyŋunydja gawaw'yurruna märrliliyaŋala Godkalana, waŋana bitjarrana, “Garray, guŋga'yurra ŋanapurrunha,” bitjarrana. “Ŋunhi nhe yurru guŋga'yun ŋanapurrunhanydja, märr yurru ŋanapurru djuḻkmaramana ŋunhayi Gaynanbuyŋunhanydja miṯtjinha yolŋu'‐yulŋunha, ga ŋanapurruna yurru walalambala baḏuwaḏuyun ŋunhiyi wäŋanydja warrpam'thunna; ŋanapurru yurru dhuŋgur'yun gurthayuna bukmaknha nhä malanha ŋunhalayinydja nhuŋuna.”

3 Bala ŋayi Garrayyunydja ŋäkula ŋunhiyi rirrakaynydja walalanha, bala ŋayi guŋga'yurrunana yana dhunupana walalanha, bala yuwalkthi yana walala ŋunhi baḏuwaḏuyurruna ŋunhiyi wäŋanydja ŋuriŋiyinayi bili Godkalana ganydjarryu.

4 Nhinana muka walala yukurrana ŋunhala bäyma bukuŋura ‡ HorWurwuyŋura, ga ŋuliŋurunydja dhurrwaraŋuru walala ḻaw'yurrunana, wiripulilina wäŋalili giṯthurruna, yurru marrtjinanydja walala yukurrana gilipuŋala § EdomYedamgurru gali'kurru yana. Marrtjinana yukurrana ga‐ga‐ga‐ga‐a‐a, ḻiw'maraŋalana marrtjina, ga ŋunhalanydja bala gandarrŋuranydja, walala ŋunhi yolŋu'‐yulŋunydja djawaryunminana, 5 bala marrtjina ŋarrtjurruna Garraynhana ga * MosesMawtjitjnhana. “Nhäkuŋga nhe ŋanapurrunha dhawaṯmaraŋala ŋulaŋuru † EgyptYetjipŋurunydja ŋunhi? . . . dhiyaku murrmurryunarawu? . . . Ŋanapurru yurru raku'‐rakunydhirri dhiyala ŋanhdharkthinyarayu? Ŋathamiriwnha dhuwalanydja wäŋa, ga gapumiriwnha, räwaknha. Ŋanapurrunydja dhuwala djawaryunna marrtji waŋganydhunydja ŋathayu ḻukaranharayu ŋupanayŋuyuna, ŋunhina bili ŋatha manana.”

6 Bala Garrayyunydja djuy'yurruna marrtjina moḻ'ŋu warray dhirrimuknha bäyma dhika, guḻku'na dhaŋaŋnha, maḏakarritjmirrinhana dhikana, walala marrtjina bumarana ḻäwu'‐ḻawuŋala yolŋu'‐yulŋunhana, ga guḻku'na mirithirrina yolŋunydja marrtjina raku'‐rakunydhina. 7 Bala walala yolŋu'‐yulŋuyunydja withiyara Mawtjitjnhana, bala waŋanana marrtjina bitjarrana, “Ŋanapurru yana rom‐yätjthinanydja, ŋunhi ŋanapurru bitjarrayi marrtjina waŋana ŋarrtjurruna Garraynha ga nhuna. Nhe mak bukumirriyaŋa ŋi' Garraywala, märr yurru ŋayi yarrkmaramana bäyŋukumana dhuwala moḻ'ŋunhanydja miṯtjinha.”

Yuwalkthi ŋayi Mawtjitjtja bukumirriyaŋala waŋana Garraywalana ŋuriki yolŋu'‐yulŋuwuna, 8 bala ŋayi Garraynydja buku‐ruŋiyinmaraŋala nhanukala Mawtjitjkalanydja bitjarrana, “Gatjuy moḻ'ŋukuŋa nhenydja djäma lätuŋnha, bala nhe yurru ŋal'maramanydja garrwarlili ŋunha dharpalili. Ŋunhi yurru ŋula yolnha moḻ'ŋuyunydja ḻäwuma, ŋayinydja yurru ŋuriŋinydja yolŋuyu bakurumana, bala nhämana ŋanya ŋunhiyi moḻ'ŋunhanydja liŋguwuynha dhuḻ'yunara, bala yurru ŋayi ŋunhiyinydja yolŋu walŋana nhina, yakana yurru ŋayi rakunydhirrinydja.”

9 Yuwalkthi ŋayi Mawtjitjthunydja djämana‐wala yana ŋunhi moḻ'ŋu lätuŋdja, bala yana ŋal'maraŋala dharpalilina, ŋunha wal'ŋu garrwarlili. Ga ŋula yol yolŋu ḻäwunharanydja moḻ'ŋuwuŋu, ŋayinydja ŋuriŋiyinydja yolŋuyu nhäŋala bakuruŋalana ŋunhi moḻ'ŋunydja dhuḻ'yunarana liŋguwuynha, bala yana ŋayi ŋunhiyinydja yolŋu baḏarraŋ'thinana.