1 Yo, dhuwalanydja gay dhäruk Garrayyu wekaŋala djawarrkmirriwala yäkuwala * ObadiahWupatayawala, ga dhiyaŋuyinydjayi dhärukthu ḻakarama yukurra ŋunhi dhuwurr‐yätjmirrinhana miṯtjinha † EdomYedambuyŋunhana. Yo, ŋayi Garrayyu liŋguna djuy'yurrunana nhanŋuwaynydja ŋayi dhäwu'mirrinha walalanha ŋurikalayi mulkuruwalanydja miṯtjiwala, ga liŋguna walala ŋäkulana nhanŋu dhäwuny'tja. Ga walala ŋunhi miṯtjinydja waŋa yukurra bitjanna, “Gul' ŋilimurru gaŋgathirrina, ga marrtjina‐wala. Ŋilimurru yurru baḏuwaḏuyunna ŋunhana miṯtjinha Yedambuyŋunhanydja.”

2 Yo, Garray waŋa yukurra Yedambuyŋuwalanydja miṯtjiwala bitjanna, “Nhäku nhuma ŋuli be ŋurr'yundja, ga märr‐winya'yundja nhumalaŋgalay nhuma? . . . ga ḻakaranhamirri nhumalanhay nhuma be bathala ḏäl‐ḻakaranhamirrinydja? Liŋgu ŋarranydja nhumalanha yalŋgi'kuŋala ganydjarrmiriwyaŋala; bukmakthuna yolŋuyu walalay nhumalanha yurru waŋa ḻakaramanydja ŋunhi nhumanydja yumurrku'na nhäŋiniŋ'mirrina. 3 Nhumanydja dhuwala ḻanydjat‐ḏilkurruna, yurru yuwalk nhumanydja mayali'‐wilkthunarawuy ŋuriŋi bili nhokalay djarrpi'kunharayu guyaŋinyarayu. Nhenydja yukurra nhina ŋunha be‐wala garrwar wal'ŋu, ga wäŋanydja nhuŋu dhärra yukurra wuṉḏaŋarrnha ŋanyana, bitjan guṉḏa. Bala nhuma ŋuli waŋanharamirri nhumalanhay nhuma bitjanmirrina, ‘Ŋarranydja dhuwalanydja, ḏäl warray ŋarra, mirithirri warray, yakana yurru ŋarranhanydja ŋula yolthu warryun galkinyamarama munatha'lilinydja.’ 4 Yo, nhenydja yukurra garrwarkunharamirrina wirrkina wal'ŋu nhunapinyay nhe, ga nhinanydja nhe yukurra bena gärakŋurana, rrambaŋina nhuma ganyu'na walala, yurru ŋarranydja nhuna warryun warray yurru dhipuŋuruyi, galkinyamarama warray,” bitjarra ŋayi Garraynydja waŋana.

5 “Yo, ŋunhi ŋuli manaŋgandja yolŋu marrtji munhakunydja, manaŋirrinydja ŋayi ŋuli girri', yurru märr‐ḻurrkun' yana, ga wiripunydja ŋayi ganan yurru, gonha'yun. Ga ŋunhi ŋayi ŋuli gulkthun borumdja marrtji yolŋuyu, wiripu ŋayi ŋuli märramanydja, ga wiripunydja ŋayi ŋuli ganan ŋunhiwala dharpalili. Yurru ŋarranydja warrpam' warray djaw'yurruna nhokalaŋuŋurunydja, ga dhiyaŋunydja‐wala nhe bäyŋuna, dhäparknha. 6 Yo, nhuma Yedambuy yolŋu walala, ŋunhi nhuma yarraṯaŋuru beŋuru ‡ EsauYetjuwala, ŋarrakalanydja miriŋuyu warrya'yurrunana ḻarruŋalana ŋuliwitjarra nhumalaŋgala wäŋakurrunydja, ga djaw'‐djawyurrunanydja walala warrpam' yana, nhä nhuma yukurrana ŋayathaŋala, ga yakana walala ŋula gonha'yurrunanydja waŋgany. 7 Yo, ŋuriŋinydja walalay ŋunhi walala ŋäthili nhumalaŋgu ḻunduthina, walalanydja nhumalanha yänguŋala yukurrana goŋnha yana dhäparknha. Ga wiripu‐guḻkuny'tja nhumalaŋgala bitjarra ŋurruk‐manapanmina, yurru dhiyaŋunydja‐wala nhumalanha walala gukuŋalana, ŋuparana bena‐wala. Ŋäthilinydja ŋunhinydja, walala ŋuli ḻukanha ŋatha rrambaŋi nhumalaŋgala ḻundukunhaminya, yurru walalanydja nhumalanha gaṯmaraŋala warray, ga gaṯpurr'kuŋala warray, bitjarra nhumalaŋgu walala gitkitthunmina warray, warku'yurruna warray nhumalanha, waŋana bitjarra warray, ‘Nhumanydja ŋuli ḻakaranhamirri be djambatjmirri ŋiniya. Wanhaka dhika be nhumalaŋgu djambatjtja guyaŋinyarawuy?’ bitjarra.”

8 Yo, Garraynydja waŋa yukurra bitjan, “Ŋulinyaramirriyunydjayi dhä‐yawar'yunarayunydja waluyu, ŋarranydja yurru dhä‐ḏir'yunna yana ŋunhinydja miṯtjinha dhuwurr‐yätjmirrinhandja Yedambuyŋunhanydja, yanana ŋarra yurru baḏuwaḏuyunna ŋunhi ḻiya‐djambatjmirrinhanydja walalaŋgu yolŋu'‐yulŋunha, ga baḏuwaḏuyunna warrpam'nha be nhä djambatjtja wal'ŋu rom walalaŋgu yurru. 9 Walalanydja yurru ŋunhi ḏarramuwurru ḏälmirrinydja waṉḏirri barrarimirrina wal'ŋu yanana, ga burakirrinydja walala yurru warrpam'thunna yana baduwaḏuyundja.

10 “Yo, nhuma Yedambuy miṯtji yarraṯaŋuru beŋuru Yetjuwala, yurru ŋäthilinydja ŋunhinydja nhuma bumara nhumalaŋguway gutha'mirriŋunha, ŋunhinha ŋunhi walala yarraṯaŋuru § JacobDjaykupkala, bala nhuma yurru mirithirrina yana goranydja; Godthunydja nhumalanha yurru bitjan gulkthunna gupaḏalnha‐wala yanana, ga yakana nhuma yurru biyapulnydja miṯtji, 11 liŋgu yaka nhuma guŋga'yurruna nhumalaŋguway gutha'mirriŋunha ŋunhi * IsraelYitjuralnhanydja. Ŋäthilinydja ŋunhinydja ŋunhi miriŋu marrtjina, bala ḏaw'‐ḏawyurrunana marrtjina ŋunhi buṉbunydja walalaŋgu, bala djaw'yurrunana yana nhumalaŋgu gutha'mirriŋunhanydja bena‐wala barrkumalana birr' wäŋalili garrpiṉarana, ga nhumanydja yukurrana nhinana gali'ŋuranydja, waŋana bitjarra, ‘Murr' muka, manymaknha ŋunhinydja,’ bitjarra. Yo, ŋuriŋiyi miriŋuyunydja malaŋuyu barrkuwatjkuŋalana marrtjina nhänydja malanha girriny'tja ŋunhi, ŋunhi walala djaw'‐djawyurruna beŋuru † JerusalemDjurutjalamŋuru, ga nhumanydja ŋunhiliyi galki walalaŋgala. 12 Nhumanydja bini ŋunhi guŋga'yuna muka nhumalaŋguway gutha'mirriŋunhanydja, yolŋu'‐yulŋunha ŋunhi miṯtjinha ‡ JudahDjudapuyŋunhanydja, ŋunhi walala mariŋuranydja bitjarrayi, ga nhumanydja ŋunhi galŋa‐djulŋithina warray nhäŋalanydja. Nhuma bini yaka muka ŋayaŋu‐djulŋithinyanydja, ŋunhi bitjarrayi wäŋa baḏuwaḏuyurruna ŋuriŋi miriŋuyu, ga yaka muka bini nhuma warku'yuna, ŋunhi walala yukurrana ŋayaŋu‐yätjthina burakina bitjarrayi. Yo, nhuma marrtjina ga gulŋiyina ŋunhiwalayi walalaŋgala wäŋalilinydja, ga yana nhuma yukurrana gitkitthunmina warray, ŋunhi walala yukurrana ŋayaŋu‐yätjthina burakina bitjarrayi. 13 Yana nhuma yukurrana djaw'‐djawyurrunana nhänydja malanha walalaŋgu, ŋuriŋiyinydjayi ḏaykun'thu ŋunhi walalanha ŋuriŋi miriŋuyu djuḻkmaraŋala bumara. 14 Yo, wiripu‐guḻkuny'tja yolŋu walala gundupuŋala be‐wala winya'‐winyayurruna beŋuruyi ŋurikala miriŋuwala walalaŋgala, gonha'yurruna walalanha, yurru nhumanydja mulkana warray walalanha, bala wekaŋala balayi ŋunhi miriŋuwala walalaŋgala. Yo, ŋunhiyi romdja nhumalaŋgu yätjnha yanana mirithirrina, ga dhiyakuyinayi märrwu ŋunhi ŋarra yurru dhä‐ḏir'yundja yana nhumalanha, warrpam'thunna yana baḏuwaḏuyundja.” Ga bitjarra ŋayi Garray waŋananydja.

15 Liŋgu walu Garraywunydja dhuwala galkina gal'ŋu yanana, galkina ŋayi yurru mala‐yarr'yunna marrtji bäpurru'nhanydja miṯtjinhanydja. Yo, Garray waŋana bitjarra, “§ EdomYedam, ŋarranydja nhumalanha yurru buma baḏuwaḏuyunna warrpam'thunna, bitjan yana liŋgu bitjarra nhuma bumara baḏuwaḏuyurruna ŋarraku yolŋu'‐yulŋunha, nhenydja yurru märrama balanyarayi liŋgu ŋupanayŋuyi yana, bitjarra nhuma djäma yätjkuŋala walalaŋgu. 16 Yo, ŋunhalayi dharrpalŋuranydja wal'ŋu ŋarrakalanydja wäŋaŋura bukuŋura, nhuma dhuwurr‐yätjthina ŋarrakalaŋuwunydja yolŋu'‐yulŋuwu miṯtjiwu, bala walala ŋayaŋu‐yätjthinana burakinana, ga nhumapinydja ga wiripu‐guḻku' miṯtji ga bäpurru yurru bitjandhi liŋgu ŋayaŋu‐yätjthirriyi burakirri bitjarra walala, ga bitjandhiyi nhumalanha yurru baḏuwaḏuyundhi yulŋunydja warrpam'thundhi, ŋuriŋiyi dhä‐ḏir'yunarayunydja. Nhuma yurru winya'yunna‐wala yana gupaḏalkumana.

17 “Yurru * JerusalemDjurutjalamdja wäŋa yurru yakana buwayakthirri winya'yun, yakana yurru baḏuwaḏuyun warrpam'thun bitjandhiyi, liŋgu märr‐ḻurrkun'nha nhina yurru walŋamirrinydja yukurra. Ga ŋunhiyinydjayi wäŋa † ZionDjäyandja buku yurru dharrpalnha gal'ŋu, dhärra yukurra yurru ganaŋ'maranharana ŋarrakalayŋuwuna ŋarra yolŋu'‐yulŋuwu yana. Yo, ŋunhiyinydjayi wäŋa yurru ŋurikina walalaŋgu ŋunhi walala yarraṯaŋuru beŋuruna ‡ JacobDjaykupkalana, gupaḏalnha‐wala nhinanydja walala yurru yukurra yana ŋunhiliyi wäŋaŋuranydja. 18 Yo, mala‐wunharawuyyunydja ŋuriŋiyi yarraṯaŋuru Djaykupkalanydja ga § JosephDjotjipkalanydja yurru baḏuwaḏuyunna‐wala yana warrpam'thunna * EsauYetjuwuŋunydja ŋuliŋurunydja mala‐wunharawuynha, bitjanna bitjan yurru gurthayu nhära mulmu räwak ŋunhi warrpam'thunna‐wala; yakana yana waŋgany ŋula Yetjuwuŋunydja mala‐wunharawuy yurru nhina yukurra walŋamirri, warrpam'nha yurru yana‐wala murrmurryunna, liŋgu ŋarrapi Garrayyu waŋana dhäruk‐nherraranydja dhuwalayi.” Bitjarra ŋayi Garray waŋananydja.

19 Yo, † IsraelYitjuralpuyŋunydja yurru miṯtji marrtji djalathaŋŋuru gali'ŋuru wäŋaŋuru ‡ JudahDjudaŋuru, ga nhinanydja walala yurru yukurra Yedamnha wäŋaŋura, ga bitjandhi yurru Yitjuralpuyŋuyunydja roŋinyamaramayi märrama wäŋanha § PhilistiaBilitjiyawuyŋuwunydja ga * EphraimBurayimbuyŋuwunydja ga † SamariaDjamariyapuyŋuwunydja, dhuwalayinydja malanha yurru wäŋa malanha walalaŋguwaynha yanana wal'ŋu dhulŋuŋuna, Yitjuralpuyŋuwuna miṯtjiwu. 20 Ga ŋunhiyi yolŋu walala Yitjuralpuyŋu bäpurru' miṯtji, ŋunhi walala yukurrana nhinana be‐wala barrku wäŋaŋura, walalanydja yurru gumurr‐roŋiyirrina lilina, ga märrama walala yurru gumurryu‐märramanydja bukmak yana wäŋanydja malanha, ŋunhi ŋarrapi walalaŋgala wekaŋala ŋäthili gal'ŋu. 21 Liŋgu galki ŋunhinydja yolŋu'‐yulŋu walŋakunharamirrinydja walala yurru marrtjina lili ŋunhiwala Djurutjalamlilinydja wäŋalili, bala walala yurru bumana yanana, baḏuwaḏuyunna warrpam'thunna yurru ŋunhi miriŋunha Yedambuyŋunhanydja. Ga ŋayipinydja yurru ŋunhi Garraynydja buŋgawana, ŋurruŋuna ŋayi yurru wal'ŋu gupaḏalnha‐wala.

Ga liŋguna dhuwala dhäruk ‡ ObadiahWupatayawuŋunydja.