PSALMS
Märr‐yiŋgathinyarawuynha manikaykurru, wokthunarana Godku
1
Rom‐djulŋi yolŋu
1:1–6 (True happiness)
1 Yol dhika yolŋu galŋa‐ŋamathirrinydja yukurra?
Yolŋu yurru galŋa‐ŋamathirrinydja yukurra,
ŋunhi ŋayi yurru yakana ŋula mäkiri'‐witjun ŋuriki rom‐yätjkunydja yolŋuwu,
ga yakana ŋayi yurru malthun yätjmirriwunydja,
ga yakana ŋayi yurru ḻunduthirri ŋuriki walalaŋgu ŋunhi walala ŋuli yukurra warku'yun Godnha.
2 Yo. Ŋunhiyi yolŋu galŋa‐ŋamathirrinydja yukurra, wirrkina goŋmirriyirri,
ŋunhi ŋayi ŋuli yukurra girrirriyun Garraywalaŋuwu romgu munha‐ŋupan ga walu‐ŋupan;
Bitjanna liŋguna guyaŋirrinydja ŋayi ŋuli yukurra Gunhu'wuna dhäruk.
3 Liŋgu ŋayinydja ŋunhiyinydja yolŋu balanyara bitjan dharpa ŋunhi ŋuli djingaryun galki gapuŋura.
Ŋunhiyi dharpa ŋuli bitjanna liŋguna borummirriyirri,
ga man'tjarrnydja malanha ŋunhiyi dharpa yakana ŋuli dhika galaḏa'yun.
Ga balanyarayina ŋayinydja ŋunhiyinydja yolŋu ŋunhi ŋayi ŋuli yukurra dhärra Garraywala romŋura;
Dhuwurr‐djulŋina balanyarana ya' yolŋu,
liŋgu nhä ŋayi ŋuli warkthun, ŋayinydja yurru nhanŋu ŋanydjaḻa'yundja maḻŋ'thun ŋamakurru'na yanana.
4 Yurru yätjmirrinydja yolŋu'‐yulŋu yaka balanyarayi bitjan walŋamirri dharpa;
Walalanydja ŋunhi yätjmirrinydja yolŋu balanyarana bitjan räwak mulmu ŋunhi ŋuli watayunydja bo'yun ya',
bala buṯthunmaramana, winya'yunmaramana.
5 Yo. Godthu boŋguŋu yätjmirrinhanydja yolŋunha walalanha warrkuḻuŋuna;
Yakana walala boŋguŋu miṯtjiŋura nhini rom‐ŋamakurru'mirriwalanydja.
6 Liŋgu Garraynydja marŋgina ŋilimurruŋgu,
ŋayi yukurra goŋ‐nherraṉmirri rom‐ŋamakuli'mirriwunydja yolŋu'‐yulŋuwu,
yurru rom‐yätjmirrinydja yolŋu'‐yulŋu boŋguŋu winya'‐winyayurruna gupaḏalkuŋuna.