Genesis.
30.
Ga mukthurruna yana Raytjulnydja yothumiriw nhinana yukurrana, yurru bitjanana liŋgu ŋayi yukurranha ŋuli bukumirriyanhanydja Godnha, märr ŋayi yurru Godthu guŋga'yun ŋanya, ga wekama yothu nhanŋu. Bala Godthu ŋäkulana ŋanya bukumirriyanhara, bala ŋayi Raytjul yothumirriyinana, ga maḻŋ'thurruna yothunydja nhanŋu ḏarramu, bala ŋayi yäku‐nherraranydja ŋanya Djotjip. 
Dhäŋuru ŋuliŋurunydja ŋunhi Djotjip liŋguna dhawal‐wuyaŋinana, bala ŋayi Djaykup waŋanana Laypannha bitjarrana, “Ŋarranydja dhuwala ḏukṯuk ŋarra yurru marrtji roŋiyirrina ŋarrakalaŋuwala bäpawalana wäŋalili,” bitjarra. 
“Go wekaŋana ŋarraku miyalknhanydja maṉḏanha ga ŋarraku djamarrkuḻi'nhanydja, ŋarrakuwaynha dhuwalanydja malanha. Wekaŋana lili ŋarraku, bala ŋarra yurru marrtjina gonha'yunna dhuwala wäŋa. Liŋguna nhe marŋgina ŋarraku ŋunhi ŋarra yukurrana djäma ŋamathaŋala yana nhuŋu.” 
Ŋayi Laypandja waŋana buku‐ruŋiyinmaraŋala bitjarra, “Märr‐yuwalk warray dhuwalinydja, yuwalk warray wal'ŋu. Ŋarra marŋgi ŋunhi Garrayyu nhuna guŋga'yurruna. Ga bitjarra yana liŋgu ŋayi ŋarranhanydja guŋga'yurrunayi bili nhokala. 
Ḻakaraŋana lili, bala ŋarra yurru wekamana nhuŋu.” 
Ga Djaykuptja waŋana buku‐ruŋiyinmaraŋala, “Ŋarra yukurrana djäka nhokalaŋuwu wäyingu walalaŋgu ŋamathaŋala yana. 
Ŋäthilinydja ŋunhi, ŋunhi ŋarra bunana dhiyala nhuŋu, ŋulinyaramirriyunydja märr‐ḻurrkun' muka wäyin nhuŋu, ga dhiyaŋunydja‐wala dhuwalana dhaŋaŋnha wirrkina wal'ŋu wäyin, bili Godthu ŋayipi nhuna guŋga'yurruna ŋarrakala djämakurru.” 
Ga ŋayi Laypandja buku‐wakmaraŋala bitjarra, “Nhä ŋarra nhuŋu yurru wekama buku‐ruŋiyinmaramanydja?” 
Ga ŋayi Djaykuptja waŋana bitjarra, “Nhepiŋga guḻk‐guḻkthurranydja nhuŋuway wäyinnhanydja walalanha, märrma'lili ŋurruklili, waŋganylili gali'lili yurru nhe nherraṉ ŋunhiyi bembi malanha bulka'‐gurrŋanmirri, ga nanikutnhanydja walalanha ŋunhi bulka'‐ḏil'‐ḏilmirrinha, ŋunhiyinydja malanha waŋganylili guḻk‐guḻkthurra ŋurruklili, ga ŋunhiyina ŋarrakunydja yurru. Ga wiripunydja ŋunhi malanha bukmaktja gaywaraŋu'mirrinydja guḻkuny'tja wal'ŋu warrpam nhuŋuwaynha, nanikut manapandja.” 
Ŋayi Laypandja yoraŋala, bitjarra yana liŋgu ŋayi yulŋunydja ŋunhi Djaykup yukurrana waŋana. Ga yuwalkthi ŋayi guḻk‐guḻkthurrunanydja Laypandhu ŋunhi gurrŋan'mirrinha ga ḏil'‐ḏilmirrinha walalanha waŋganylilina ŋurruklili ga ŋunhinydja nhanŋuna ganaŋ'maraŋala Djaykupkuna. 
Ŋunhi ŋayi Djaykupthu bitjarrayi ŋula nhaltjarra, bala yurruna wäyindja ŋunhi guḻku'na dhika dhawal‐wuyaŋina yukurrana ḏil'‐ḏilmirrina ga bulka'‐gurrŋanmirrina guḻku'na dhaŋaŋnha. Djaykuppa wäyindja guḻku'thinana, ga bembi bulka'‐ḏilkurru balanyara wäyin ga nanikut yäku dhaŋaŋnha dhikana. Godthu guŋga'yurruna ŋanya Djaykupnha ŋunhimalayi, bala dhaŋaŋdhinana wäyindja nhanŋu gamul ga duŋ'ki ga wiripu wäyin malanha, ga djämamirri walala nhanbala guḻku'na dhika yolŋu'‐yulŋunydja, bala Djaykuptja wirrkina ŋurruwuŋmirriyina. Bala walala Laypangu gäthu'mirriŋunydja walala wirrkina dhika maḏakarritjthina Djaykupkunydja, bala walala waŋana bitjarrana, “Djaykupthunydja ŋunha warrpam'nha djaw'‐djawyurruna wäyin malanha warrpam'nha ŋiniya ŋilimurruŋgalaŋu bäpa'mirriŋuwanydja,” bitjarra. Ga ŋayi Laypandja bitjarra yana liŋgu yakana ŋamathina Djaykupku, bitjarra ŋunhi ŋäthili ŋayi galŋa‐ŋamathina, bili ŋayi yaka ḏukṯukthina, ŋayi bini rarr'yuna warrpam' wäyin ŋunhiyi malanha nhanbala Djaykuppa ḏil'‐ḏilmirri ga gurrŋan'mirri wäyin walala. 
Bala ŋulinyaramirriyu Garray waŋana Djaykupkala bitjarrana, “Gonha'yurrana dhuwalanydja wäŋa. Gaŋgathiyana bala marrtjiya nhokalaŋuwala bäpa'mirriŋuwalana ga gurruṯu'mirriwalana walalaŋgala, ga ŋarranydja yurru nhokala galki yana.” 
Dhunupa ŋayi Djaykuptja gurku'yurrunana, bala gaŋgathinana marrtjinana balayina bäpa'mirriŋuwalana wäŋalili Gaynanlilina. Ŋayi ŋal'‐ŋalmaraŋala miyalknha maṉḏanha ga yumurrku'nhanydja nhanŋuway wäyingala ḏiltjililina gamulwalana, barrkuna marrtjina mutpunuŋala wäyinnha ŋunhi walalanha. Ga walala yolŋu'‐yulŋuyunydja mutpunuŋalana marrtjina. Bukmaknhana märraŋalanydja ŋayi, ŋunhi nhä malanha nhanŋuway wal'ŋu, bala yana marrtjinana‐wala.