Exodus.
35.
Bitjarrana ŋayi Mawtjitjthu waŋana yolŋu'‐yulŋunhanydja, bala walala gundupuŋalanydja, bala yana wapmaraŋalana marrtjina, bala dhunupana gäŋalanydja Mawtjitjkalana, walala ḏukṯukthinanydja wirrkina Garraywunydja gumurr‐wekanharawu; yana walala marrtjina wekaŋalanydja ŋunhi yänana girriny'tja malanha, ŋunhiyi mel‐wiḏi'mirrinydja dhikanydja girri' Godkalaŋunydja buṉbuwu. Ga gaḏamanmirriyunydja dhäykawurruyu yukurrana djäma goŋdhuna walalawuynha ḻatju'mirrina dhomala dhikana, miny'tji‐guḻku'mirrina. Ga bukmakthuna yolŋu'‐yulŋuyu Yitjuralpuyŋuyunydja buku‐wurrparanydja gäŋala girriny'tja malanha, ḏarramuwurruyu ga dhäykawurruyu ga djamarrkuḻi'yu, marrtjinanydja walala gäŋalanydja, yanana marrtjina rarr'yurrunana Garraywuna, ŋurikiyi buṉbuwuna, ŋunhi ŋayi Mawtjitjkala ḻakaraŋala yukurrana ŋunhala. 
Bala ŋayi Mawtjitjthu waŋanana bitjarrana, “Nhäŋa dhuwala ḏarramunha gay', Betjalilnha yäkunha, ŋayinydja dhuwalayinydja djarr'yunara Garraywuŋuna yana, ŋayinydja yurru dhuwalayinydja buŋgawana dhiyakuyi bukmakkuna djämawu, liŋgu Garrayyu ŋanya liŋguna dhaŋaŋguŋalana nhanukalay ŋayi Birrimbirryu ŋuriŋi Walŋamirriyunydja, märr dhiyaŋuyina ganydjarryu ŋayi yurru djäma bukmakkumanydja, ḻatju'kumanydja dhikanydja yurru. Ga wiripu‐guḻku'wunydja ŋayi bitjarrayi ganydjarr wekaŋala Garrayyu, märr walala yurru guŋga'yun ŋanya yukurra, ḻatju'kuma yana dhika djäma.