Tateta
Yaubada Isileli tubunao itatetedi
Livala Aba Vaita
Ame bukiyana Mosese igini. Isileli tubunao bogina asa Itipita goi sikaaiyaka tala ana badabada poa andedi (400). Go idi kaiyaka moumou isaki unana tauyadi moe Pero ina pakonayao. Idi kaiyakomou pasina sitaiyaduduwo Yauwe yaina. E idi taiyaduduwoyana Yauwe inove go, inuwokavate boi ikanasíuna Eberamo goi, tauna Pero nimana goi Isileli tubunao itatetedi. Go ina tatetayana ame nakae: Koroto gagaina buki ame goi moe Mosese. Tauyana ma siyana Eroni sina Pero matana goi Yauwe ina guinuwa toogagaidi siguinuwedi. Tuwo guinuwayadi goi Yauwe iyavedi. Ikavava, inavedi koya Sainai goi sikaaiyaka. Koyayana goi ikanasiukoidi, tauna kidi Yauwe ina bodao. Aiyuwoina ina vatulúkwana yawoidi manuna ivinidi be nakae ina Kaba Kaiyaka ma konanina adi yówana Mosese ivatuluko.
Buki Luluna
1. Isileli tubunao Itipita goi mou siibabane tetelina 1:1-22
2. Isileli tubunao adi toyava ana katubayásina tetelina 2:1-25
3. Mosese ina kawoi be ina kabikáwana tetelina 3:1—7:7
4. Liuna yawou 7:8—11:10
5. Isileli tubunao Itipita goi idi sowóduwo tetelina 12:1—13:16
6. Isileli tubunao adi yava tetelina 13:17—15:21
7. Mosese ina bodao taiyao sinonoina yoyowo goi tetelina 15:22—18:27
8. Yauwe ina kanasíuna ana lovina 19:1—24:18
9. Yauwe ina Kaba Kaiyaka 25:1—31:18
10. Isileli tubunao idi bágala be anasiuna vau tetelidi 32:1—34:35
11. Yauwe Isileli tubunao yaidi goi ikaaiyaka tetelina 35:1—40:38
Isileli tubunao Itipita goi mou siibabane tetelina
1
(Tateta 1:1-22)
Isileli tubunao Itipita goi siisusáila tetelina
1 Boi Isileli natunao koroto madi bodayauwo taiyao sima Itipita goi sikaaiyaka. Natunaoyadi yoidi ame nakae:† Abv 46:8-27.
2 Rubeni, Simion, Livai, Yuda,
3 Isakara, Sebuloni, Beniyamina,
4 Dani, Napatali, Gadai be Aseri.
5 E Yakobo mana bodayauwo liliudi adi badabada seventi (70) taiyao sina. E kina go natuna Iyosepa bogina Itipita goi ikaaiyaka.
6 E sikaiyaka aaa, Iyosepayana ma senao be nakae amo malamalagatayana sikamasa kówasa. 7 E kidi go Isileli tubudiyao sisusáila gagaina toina nakae sibadabada be nakae sitogaga toina,† Gui 7:17. tauna asayana Itipita kidi sivakayaodei.
Isileli tubunao idi paisewa
moumouna tetelina
moumouna tetelina
8 E sikaaiyaka go, da Itipita adi tolovina vau itaoya go, Iyosepa ina guinuwa geya ikamoitamoeeta.† Gui 7:18. 9 E ina bodao da Itipita ilatuwokoidi idigo kana,
‘Bogina kogite? Isileli tubunao bogina sisusáila gagaina nakae adi badabada sikalisaveda be sitogagasaveda! 10 Mada nanamsa tasikogigīdi, govila bei tuwaina sisusáila, e niga neta yaviya isowóduwo, kidi bei sina ida kaleyayao taiyao sisiukoidi sima silaúida, namliyeta asa sikalave.’† Gui 7:19.
11 Tuwo da Itipita ame nakae siguinuwe: Itipita korotoidi sikinavedi sivayokoidi kidi Isileli tubunao adi tolovinao, e paisewa moumouna goi sikinenetedi. Paisewayana ame nakae: Asa aiyuwo Pitom be Ramasesi siyowóidi, e bei asayadi sinaedi goi Pero ina sánala sikaaiyaka be nakae kónana adi vada siyatoidi. 12 E tuta tamo tamo paisewa moumouna tuwaina sivinidi, e kidi Isileli tubunao tuwaina siisusáila nakae tuwaina asa situgidagidali. Tuwo kidi da Itipitayadi sigitedi odi isilali. 13 E tuwo geya idi nuwokapisimo Isileli tubunao sipakoidi sikogúyala gagaina toina. 14 Paisewa moumouna sivinidi, tauna sikaiyako mou. Idi kaiyakomouyana ame nakae: Vaega be limou taiyao sipopolidi sigabudi simalagurewa nakae,† Tat 5:7. e idi vada siyowóidi be nakae idi tánuwo goi sipaisewa. Paisewa liliunakova goi da Itipita geya idi nuwokapisimo Isileli tubunao sipakoidi sikogúyala gagaina toina.
Pero ipooikíkina Isileli tubunao
natudiyao koroto ikaumatedi tetelina
natudiyao koroto ikaumatedi tetelina
15 E amo tutayana vevina Iberiu idi tovenatunavaita adi taiyuwo sikaaiyaka, tayamo yoina Sipira, tayamo yoina Puwa. Tuta tayamo da Itipita adi tolovina ilatuwokoidi idigo kana,
16 ‘Tutayana vevina Iberiu sivenátuna, kovaitēdi go, natudiyao kogitēdi. Neta koroto, e kokaumatēdi go, neta vevina, e koyatōidi.’
17 E kidi vevinayadi Yaubada siwowoine, tauna da Itipita adi tolovina ina lovina sikapipilave, go sem gogómana liliudi, koroto be vevina, siyatoidi maa yawoidi. 18 Go tolovinayana livala inove bego vevinayadi ina lovina sikapipilave. Tuwo vala ietune ina iduduwedi sima ilatuwokoidi idigo kana,
‘Komi kaga unana guna lovina geya koguinuweeta, e gogomanayadi koroto kaga koyatokoidi maa yawoidi?’
19 E kidi vevinayadi sidigo kadi,
‘Unana kidi Iberiu idi venátuna ituli, e da Itipita nakae ituli. Kidi vevina Iberiu idi venátuna goi sitogaga, tauna toinidi sivenátuna. Bego kana kavaitedi go, kawoiko, bogina sivenátuna!’
20 E vevina tovaita adi taiyuwokova kina Yaubada iyabobonedi, tuwo Isileli tubunao tuwaina sisusáila be nakae sitogaga gagaina. 21 Vevinayadi Yaubada siwowoine, tauna ikitogagedi, e itoboinedi sikéuwama.
22 E tuwo Pero ina bodao da Itipita liliudi ilovinaedi idigo kana,
‘Ava Iberiuva natudiyao koroto sibíbina, e liliudi kokabīdi, konavēdi sákala Nairi goi kolavēdi sisou sikámasa, go neta natudiyao vevina, e tuwo koyatōidi maa yawoidi.’† Gui 7:19.