Buki ame moe Yaubada ina kanasiuna vau madabokina ana Gumawana. Go tuwaina buki aivasi Yaubada ina kanasiuna bogo goi. Bukiyadi moe Aba Vatowo, Tateta, Ruti be nakae Iyona.

Tokanagumawana adi badabada ainima andedi (500). Ame tau­ya­di idi kasa moe Amphlett simlinao. Simlinaoyadi yoidi ame nakae: Bítu­ma, Gumawana, Kotoita, Nubogeta be nakae Omea. Ame simlayadi sikaaiyaka Esa'ara distiriki Milne Bay Parovinsi goi.

Atuyáiva manuna ame lovinayadi sikaaiyaka. Neta leta aiyuwo vaavasaidi situyuwo moe tabiu. Nakae aa, ee, ii, oo be uu madabokidi neta kugitedi kubiudi. Aba gita ame nakae: Livala ‘maanawena’, e ‘maa’ giyaina tabiu. O livala ‘iigitedi’, ii giyaina tabiu.

Maka maniyedi sikaaiyaka sivaitem buki ana katuyáiva manuna.

Maka ame ´ yoina dágula. Bei kugite ikaaiyaka leta ame goi: á, é, í, ó, ú. Silatuwokoim nako goi kuvatoi gagaina be nakae kubiu. Nakae livala ‘yábana’ ‘yá’ tavatoi gagaina be nakae tabiu unana dagulayana ‘yá’ goi ikaaiyaka. Aiyuwoina ‘mátana’ goi ‘má’ tavatoi gagaina be nakae tabiu go, ‘mata­na’ goi ‘ta’ tavatoi gagaina.

Maka ame ¯ yoina lovina ana saba. Bei kugite ikaaiyaka leta ame goi: ā, ē, ī, ō, ū. Silatuwokoim livalayana moe lovina. Nakae neta kagu, ‘Kutusōbu!’ lovina ana saba leta ō goi ilatuwokoim moe lovina. Aiyuwoina nakona giyaina kubiu tutayana kwatuyaivi.

Maka ame ˻ ˼ yoina livala gagaina ana kaba kinana. Moe ilatuwokoim livala ali sinaedi Livala Gagaidi Adi Talígava buki ame ana kaba lukavava goi sikaaiyaka bei itoboinem ana talígava kubabane. Aba gita tayamo ame nakae: ˻Yeisu ina Kenao˼. Tauna Livala Gagaidi Adi Talígava goi bei ‘Yeisu ina Kenao’ kubabane.

Maka ame † yoina kerose aba vaita. Ilatuwokoim moe tomwana maniyedi sikaaiyaka ame tomwanayana ana vaita manuna. Neta kwandosobu buki vagana ditonema, e tomwanayadi sikaaiyaka kugitedi.

Maka ame ‡ livala ana talígava ana kaba kinana. Ilatuwokoim livala tayamo tomwana sinaena o tomwana madabokina ana vaita ikaaiyaka. Neta kwandosobu buki vagana ditonema, e tomwanayana o livalayana ana talígava bei kubabane.

Maka ame ‘ ’ ali nakae unana tomota tayamo ina livala sikali, nako ana kaba vatowo be nakae nako ana kaba lukavava. Aba gita ame nakae: Yeisu idigo kana, ‘Kūna! Im numisa pasina natum bogina iboboina.’ Aliyadi silatuwokoim Yeisu ina livala Kūna goi ivatowo go, ina livala iboboina goi ikavava.

Maka ame “ ” ali nakae ‘ ’ go, giyaina ituli. Aba gita tayamo ame nakae: Yeisu idigo kana, ‘Tomoya tayamo ina paakonidi ilatuwokoidi idigo kana, “Kōma!” ’ Yeisu ivateteli go, ina vatetalayana goi koroto tayamo ina livala italavaite. Yeisu ina livala liliudi ali ‘ ’ sinaedi goi sikaaiyaka. Tomoya ina livala ali “ ” sinaedi.

Maka ame : yoina aba vasakikina. Ilatuwokoim dogoi maniyedi simamaima. Neta aba vasakikinayana ‘:’ kugite, ivasakikine kaga ilatuuwokoim bei kuyagoi. Aba gita ame nakae: Taabu ame sinapuyadi kuguuinuwēdi: Vaináwana, roerata, masisi goyogoyoina, aumata be nakae bowou. Aba vasakikina vakuumgoina mae ilatuwokoim aba gitayana ivamliya. Go aba vasakikina aiyuwoina ilatuwokoim sinapu badabadaidi sivamliya.

Maka ame ; yoina waiwasi ana saba. Ilatuwokoim nuwonúwana aiyuwo itoboinedi situyuwo unana tayamo dogoi manuna sivateteli. Neta kugite, giyaina kuwaiwasi go, nava kwatuyaivi. Tupwana nakae koma , go, tupwana nakae aba sayata. Aba gita ame nakae: E kina go Yakobo ituli; tauyana koroto sakuululuna nakae tuwowoonuwaina, tauna tuta liliuna yoyou parai goi ikaaiyaka. Ameko nuwonúwana aiyuwo go, aiyuwo moe Yakobo manuna.

Maka ame ! yoina níyana tamadiidinina ana saba. Ame ikaaiyaka neta tomota ina livala aba kainaopa, o aba yapali, o aba egamogamogu, o aba kaliwoisa, aba uyáwana, podeda, duduwo, e nakae. E moe sabayana ikaaiyaka livalayadi adi kaba lukavava goi. Aba gita ame nakae: Yeisu ina tovatotowanayao sipodeda kadi, ‘Iyaa! Baloma ima­maima!’