21
Aisake ina bíbina tetelina
1 Tuwo sikaaiyaka, sikaaiyaka, Yauwe ina Sera yaina goi iguinuwe nakae boi ikatotule, tauna Serayana boi ikágala go, bogina itoboine ikéuwama.† Abv 18:10. 2 Tuwo ikéuwama go, Eberamo bogina ikaitomoya, e natuna koroto kina Sera ivenatuni. Ago natudiyana ina bíbina ana tuta nakae Yaubada boi ikatotule.† Ibe 11:11. 3 Natudiyana kina Sera iveenatuni, e Eberamo ivayou Aisake. 4 Niga Aisakeyana ana maliyalina ainima aitonina ibabane, e kina Eberamoyana natuna ikabi, sakavaina ikupo nakae Yaubada boi ilovina.† Abv 17:10,12; Gui 7:8. 5 Ego Eberamoyana bogina ikaitomoya nakae ana tala tayamo andedi (100) tutayana natuna Aisake ibíbina. 6 E gomanayana ina bíbina mlina Sera idigo kana,
‘Yaubada gómana ivinigu, tauna auyáwana be avanama. Avatauwa neta livala ame sinove, e nakae bei sivanama yau taiyao.’† Abv 18:14.
7 Kana,
‘Geya vatau tayaamo inuwonúwana bego itoboinegu Eberamo natuna avenatuni. Tauyana bogina ikaitomoya go, tuwo natuna avenatuni.’
Eberamo Ega ma natuna
Isimaeli ivaliilivedi tetelina
Isimaeli ivaliilivedi tetelina
8 E gomanayana ibíbina gagaina, sinana ikatusase. Tuwo amo tutayana Eberamo áika gagaina iguinuwe. 9 Ago Sera ikandobala Ega guma Itipita natuna Isimaeli igite Aisakeyana ikaiwotete. Tuwo Serayana gamona igoyo, 10 e ina Eberamo ilatuwoko idigo kana,
‘Amo pakoninayana maa natuna kuvatapiyēdi sina. Pakoninayana natuna konam bei geya ikabidita tutayana kukámasa, go sem konamyadi madabokidi natugu Aisake anetava bei ikabidi.’† Gal 4:29-30.
11 Go livalayana Eberamo inove, atena igeda unana Isimaeli nakae natuna. 12-13 Go kina Yaubada idigo kana,
‘Eberamo, atem taabu igedagēda natum be im pákwana pasidi. Guna katótula tubumowo manudi Aisake goi bei imalatomota.† Rom 9:7; Ibe 11:18. Aiyuwoina kina Isimaeliyana natum, tauna bei akisaili, e bei tubunao boda tayamo gagaina. Tauna kaga liliuna Sera ilatuwokoim kuguinuwēdi, e sopana kwabikaōne be kuguinuwēdi.’
14 E tuwo vanuwo itomo nobuyana giyaina Eberamo itaoya, bwae giyaina itege be nakae awoinu ikabi, Ega ivini ivabe. E natuna taiyao ivaduduwedi kana,
‘E kōna ae.’
Tuwo tauyadi sina Bera Siva yoyowoina goi siketoiya beso. 15 E siiketoiya go, bwae sinimnim, sinimsave. Sinimsave, gómana maena isayasaya, itáiya. Tuwo sinana ikabi, alova nugonina goi iyato, iwaiwasi. 16 Ago kina sinanayana ibala ina masigava tupwana aduwanau itusobu, nakae itaitáiya. Ina nuwonúwana kana,
‘Bwae ikavava, tauna natugu bei ikámasa. Geya latuwogu gómana matagu goi go, ivailai.’
17 Ago gomanayana ina táiya Yaubada inove, tuwo ina anerose yábana goi itumasobu idigo kana,
‘Ega, kaga kutaiyae? Taabu kuumatōita. Gomanayana amoko goi iitusobu ina táiya Yaubada bogina inove. 18 Kutāoya! Kūna gomanayana kuvatāoe be kukipaiwōle. Tauyana bei akisaili tubunao boda tayamo gagaina.’
19 Yaubada ibóbwara ikavava, vavinayana nuwona isanayato, e ikandobala doelu igite. Tuwo ibala ina bwae itege, gomanayana ivanim.
20 E tuwo gomanayana ibibíbina go, kina Yaubada ivakitau. Parani yoyowoina goi ikaaiyaka, e tauyana sau ana togipalu. 21 Yoyowoyana goi sikaaiyaka, sinana inuwonúwana kana,
‘Vavina tayamo guma Itipita akabi, natugu monena.’
Tuwo vavina tayamo ikabi ime, natunayana monena.
Abimeleka be Eberamo siikatótula tetelina
22 E amo tutayana da Garara adi tolovina Abimeleka ina tovayaviyayao adi tovakumgo yoina Pikoli† Abv 26:26. taiyao sina Eberamo silatuwoko sidigo kadi,
‘Eberamo, im guinuwa liliudi goi Yaubada ivakitaum bogina kagite. 23 Tauna ame tuta Yaubada matana goi kukatōtula yaima bego geya kuguinuwa goyogoyo yaima, yau be nakae natugowo be tubugowo, go sem kom ogaoga ameko goi go, nakonakae bogina alokatem, e nakae guna lokateyana kulolāse yau yaigu be nakae ida kanasíuna‡ Ida kanasíuna: Nakona ame Eberamo be Abimeleka taiyao sikanasíuna. Ego tutayana Eberamo ipola, idi kanasíuna ikapipilave. Tauna moe pasina Abimeleka ina Eberamo igite. kuyoisikavāte.’
24 Eberamoyana idigo kana,
‘Yaubada matana goi bogina akatótula. Kaga liliuna kuudigedi nakae bei aguinuwedi.’
25 Eberamoyana itagona go, Abimeleka ikamatanako kana,
‘Go im pakonayao guna doelu situugagale. Go bei kaga kuguinuwe?’
26 Go kina Abimelekayana idigo kana,
‘Geya ayagoiyeta avatauwa nakae siguinuwe. Go boi geya kulatuwokoiguta. Moe livalayana makaitaga anove.’
27 Tuwo Eberamo ina sipi be ina bulumakau ikabidi, Abimelekayana ivini, e adi taiyuwo sikanasíuna. 28 Ego Eberamoyana lami bovavina ana badabada ainima aiyuwo ikabidi, Abimeleka matana goi iyatoidi. 29 Go Abimelekayana idigo kana,
‘Ame kaga ana lami kuyatoidi?’
30 Eberamoyana idigo kana,
‘Ame lamiyadi kukabīdi, e moe ada kiyakiyaya bego doeluyana yau atavi, tauna yau guna kaba lovina.’
31 Ame pasina asayana ivayou Bera Siva‡ Bera Siva: Ame youyana ana yagoina moe atótula doeluna o ainima aiyuwo doeluna. unana amoko goi adi taiyuwo sikatótula, tauna yoina Berasiva.
32 E Bera Siva goi sikanasíuna ikavava, Abimelekayana be nakae ina tokalikumatana Pikoli sitaoya, sikaluvila sina da Palisiti idi kasa. 33 Ago kina Eberamoyana Bera Siva goi alova tayamo ibaguli, alovayana yoina tamarisika.‡ Tamarisika: Alova ame kaakupina go, tala maanawena ikaaiyaka. E amoko goi Yauwe Yaubada aiyako vaatayaina yaina Eberamo isaakululu. 34 E Eberamoyana tuta maanawena da Palisiti idi kasa goi isuvadavada.
‡21:23 Ida kanasíuna: Nakona ame Eberamo be Abimeleka taiyao sikanasíuna. Ego tutayana Eberamo ipola, idi kanasíuna ikapipilave. Tauna moe pasina Abimeleka ina Eberamo igite.
‡21:31 Bera Siva: Ame youyana ana yagoina moe atótula doeluna o ainima aiyuwo doeluna.
‡21:33 Tamarisika: Alova ame kaakupina go, tala maanawena ikaaiyaka.