Iberiu
Liwola tayamo Yeisu
ana tosabokuli yaidi
ana tosabokuli yaidi
Livala Aba Vaita
Buki ame geya leta, geya tétala geya, go sem ame liwola tayamo. Liwolayana ana togínina geya tayagoiyeta avatau. E nakae geya tayagoiyeta ava tala igini.
E nakae geya tayagoiyeta avatauwa adi liwola. Nakona Diyuu nuumisaidi Roma goi. Tokatuyáiva maniyedi nakona Totuyoyowo nuumisaidi go, boda gagaina nakona Diyuu nuumisaidi.
Nakona amo tonumisayadi mou sibabanedi idi numisa pasina, tauna maniyedi giyakainava bei idi numisa sikalave go, sikaluvila Diyuu idi sinapu Yaubada ana sakululu manuna. Liwola ame goi togínina ipoikiki idi numisa ikitogagedi bei idi numisayana goi sivadókana tutayana mouyadi sibabanedi.
Liwola ame goi togínina ilatuwokoida bego Yeisu anerose idedevinasavedi, ina núwala Diyuu idi núwala siguuinuwedi idedevinasavedi, ietonúwala Melikisedeki nakae be nakae Tonúwala liliudi idedevinasavedi. Tauna taaramāitana bei ida numisa Yeisu yaina goi tayoisikavate.
Liwola Luluna
1. Yaubada Natuna toolagaina 1:1—2:18
2. Yaubada ina livala tanumīse bei ina kaba waiwasi goi tasiu 3:1—4:13
3. Ida numisa tayoisikavāte 4:14—6:20
4. Yeisu Tonúwala Toolagaina tayamo Melikisedeki nakae, e Tonúwala Eroni idedevinasave 7:1-28
5. Yeisu ina paisewa Tonúwala Toolagaidi liliudi idi paisewa idedevinasavedi 8:1—10:18
6. Yaubada tanōko be nakae ida numisa tayoisikavāte 10:19-39
7. Numisa ana yagoina be ina guinuwa manudi 11:1-40
8. Yeisu numisa ana Tokaimatana be ana Tokimatuwo, yawoida goi tadumaakavāte 12:1-29
9. Yeisu bogina ikimavadeda, tauna ida sinapu dedevina taguinūwe 13:1-21
10. Liwola ana kaba lukavava 13:22-25
Yaubada Natuna toolagaina
1
(Iberiu 1:1—2:18)
Yeisu anerose ikalisavedi
1 Boi nimatu Yaubada ina tokabivalavalayao sopadi goi tubudao ivadigoidi go, giyaina giyaina be ta kenao ta kenao goi ina livalayana ivinidi. 2 Ame tuta ana kaba lukavava Natuna goi ivadigoida.
Natunayana ikinave
bei kaga liliuna moe Tauyana ina kaba lovina.
Nimana goi kaga liliuna imadagidi.
3 Tauyana Yaubada ana káeyana kanukanununa
be nakae Tauyana goi Yaubada aderina toina imalatomota.
Kaga liliuna ina livala toogagaina goi iyooisidi.
Ida goyo goi ikimavadeda ikavava,
wowoina basekoina Yaubada Tokanayatanatoina
kakataina goi itusobu.
4 Tauna anerose itaoyakukuidi
unana Tauyana yoina Yaubada bogina ivinivini
anerose yoidi ikalisavedi.
5 Moitamo, anerose itaoyakukuidi. Ava anerose yaina goi Yaubada ibóbwara idigo kana,
‘Kom natugu;
yau ame avanatunem’?†a Gui 13:33; Ibe 5:5.
Same 2:7
Geya tayaamo yaina.
O aiyuwoina ava anerose yaina goi ibóbwara idigo kana,
‘Yau Tamana, e Tauyana natugu’?†b 1Te 17:13; Sam 89:26.
2 Samwera 7:14
Geya tayaamo yaina.
6 E tuwaina, tutayana Yaubada ina totubukumgo† Sam 89:27; Rom 8:29; Kol 1:15,18; Nuw 1:6. ivamoleye ima poyapoya ame goi, Yaubada idigo kana,
‘Latuwogu guna aneroseyao‡ Guna aneroseyao: Ame tomwanayana Atukeda 32:43 goi tababane go, Iberiu niyadi goi kadi, ‘Yaubadayao.’ Go tutayana sikaigavile da Giriki niyadi goi tomwanayana mae nakae. madabokidi
Tauyana yaina sisakulūlu.’
Same 97:7
7 Aiyuwoina aneroseyadi manudi idigo kana,
‘Yágira ietako ina aneroseyao‡ Aneroseyao: Ame livalayana Iberiu niyadi goi moe lobutu ana tolokoina. nakae.
Yeu sabeninimina iepaisewe ina tovaitayao nakae.
Tauyana manuna sipaaisewa.’
Same 104:4
8 Go Natuna yaina idigo kana,
‘Yaubada e,
Im kalibúbuna bei ikaiyako vata go,
im kalibubunayana moe lovina vavasa.
9 Kibóbwata anasíuna manuna nukotom ikabi go,
apipilova kukaolilive.
Moe pasina Yaubada,
moe kom im Yaubada, amta bogina ikinavem go,
kinavayana goi uyáwana gagaina kubabane
be nakae semowo kutaoyakukuidi.’
Same 45:6-7
10 Aiyuwoina Natuna ilatuwoko idigo kana,
‘Tomoya,
Kom aba vatowo goi poyapoya ame kumadagi;
nakae yábana moe nimam ina madágina.
11 Amo dogoiyadi bei sisáwala go,
kom kwaaiyaka.
Madabokina kwama nakae bei sivagoyo
12 be tanigo nakae kununumidi kuyatoidi.
Kwama nakae bei kuvalilividi go,
aivaudi kulosidi.
Go kom sem taum taum kwaaiyaka,
nakae am tala geya sikavaveta.’
Same 102:25-27
13 E ava anerose yaina Yaubada idigo kana,
‘Kūma wowoina basekoina kakataigu goi kutusōbu
ana kadókana im kaleyayao avasobusobuyedi,
e kulovinaedi’?† Mad 22:44; Mak 12:36; Luk 20:42-43; Gui 2:34-35.
Same 110:1
Geya tayaamo yaina. 14 Go anerose kaga? Madabokidi baloma nakae, Yaubada ina tovaitayao ivamoleyedi sima bei kita ada yava taababane sivaiteda ae?
†b1:5 1Te 17:13; Sam 89:26.
†1:6 Sam 89:27; Rom 8:29; Kol 1:15,18; Nuw 1:6.
‡1:6 Guna aneroseyao: Ame tomwanayana Atukeda 32:43 goi tababane go, Iberiu niyadi goi kadi, ‘Yaubadayao.’ Go tutayana sikaigavile da Giriki niyadi goi tomwanayana mae nakae.
‡1:7 Aneroseyao: Ame livalayana Iberiu niyadi goi moe lobutu ana tolokoina.
†1:13 Mad 22:44; Mak 12:36; Luk 20:42-43; Gui 2:34-35.