‘Tovatulúkwana, Vada Kimaasabaina ana vada kaausaraidi kugitēdi; gurewa gagaaidi goi siyowóidi.’

‘Ame vadayadi kogitedi ae? Vadayadi dedevidi ae? Nava bei geya tayaamo gurewa vaapopoina ikaaiyaka, go sem madabokina sitagaegaekowosidi.’

4 ‘Kulatuwokōima ava tuta bei moe dogoiyadi sisowóduwo? Moe dogoiyadi idi sowóduwo kaga ana kaba kinana, e bei idi sowoduwoyana kayagoi?’

‘Komi ami dodōkana govila bei tomota sivasulaigimi. 6 Topola badabadaidi bei sima yoigu sivatoi kadi,

7 E tutayana yaviya valedi bei konovedi yomana be aduwanau, taabu kokaateyōva. Itoboine ame dogoiyadi sisowóduwo go, poyapoya ana kaba lukavava moe nava. 8 Nava bei ta boda ta boda sitaoya, taiyao sivayaviya. Nakae ta kaba lovina ta kaba lovina bei sitaoya, taiyao sivayaviya. Asa liliuna goi nikuniku bei sitátava be nakae loga sisowóduwo. Ame dogoiyadi moe tuta moumoudi adi kaba vatowo; vevina neta idi tuta venátuna ana geda ana kaba vatowo nakae.

9 E komi ami dodōkana imi kaleyayao goi. Bei siyoisimi siekotuyemi be nakae idi kaba tugúguna goi bei sidabimi. Adi gavanayao be adi tolovinayao matadi goi bei kotaoya imi numisa yau yaigu pasina, bei tauyadi yaidi goi Vala Dedevina kotalavaite.† Mad 10:17-20; Luk 12:11-12. 10 Ago mainao itoboine guna tonumisayao Vala Dedevina sitalavaite Totuyoyowo liliudi yaidi goi, namliyeta poyapoya ana kaba lukavava bei isowóduwo.

11 E tutayana tomota siyoisimi siekootuyemi, taabu konuuwotūkala manakaemi bei kobóbwara, go sem ava livalava Yaubada nukotomi isanayatoidi, e moe livalayadi tomota kolatuwokōidi. Moitamo. Moe geya komi imi livalayadi geya, go sem Baloma Kimaasabaina ina livala. 12 Tomota maniyedi geya sinumiseguta toinidi sediyao tonumisa bei sinuwotuluyedi tolovina yaidi bego sikaumatedi. Tamadiyao nakae bei siguinuwe natudiyao yaidi. Gogómana nakae bei siguinuwe tamadiyao be sinadiyao yaidi. 13 Tomota liliudi bei sikaolilivemi unana yau yoigu ikaaiyaka yaimi.†a Iyo 15:21. Go avatauwa neta sitaoyaakavata ana kadókana tuta ana kaba lukavava goi, e adi yava bei sibabane.†b Mad 10:22.

14 E aba silali tayamo Yaubada yaina bei Vada Kimaasabaina goi iitaoya go, moe geya itoboineeta amoko goi ikaaiyaka unana Vadayana ikibaibaili.’† Dan 9:27, 11:31, 12:1.

‘Tutayana aba silaliyana kogite Vada Kimaasabaina goi iitaoya, avatauwa Yudiya dadavina goi sikaaiyaka, sisīya sīna koya goi. 15 E avatauwa vada yatana goi sikaaiyaka, taabu sisousōu bego konadi tayaamo nakae vada sinaena goi sikabi, go sem sisiyāmo.† Luk 17:31. 16 Avatauwa tánuwo goi sikaaiyaka, taabu sikaaluvīla sīna idi kasa bego adi tanigo sikabidi, go sem sisiyāmo.

17 O tokéuwama be tovanunu! Amo tutayana moumou isaki yaidi bego sisiya. 18 E kokawanōi Yaubada yaina bego mouyana geya isowoduwoita nunutula ana tuta goi, govila bei imi siya goi kokaimúmuna. 19 Moitamo. Amo tutayana goi mou bei isowóduwo. Nakae Yaubada ina madagina kunu goi go, ima ame tuta geya tayaamo mou nakae. Aiyuwoina mou amo nakae geya tuwaina bei iisowóduwo.† Dan 12:1; Nuw 7:14.

20 Neta maliyalinayadi Yauwe geya ikatukakupidita, e geya vatau tayaamo ana yava ibabane, go sem ina kinavayao boi ikiinavedi pasidi moitamo ikatukakupidi.

21 Tuta amo goi avatauwa neta sidigo kadi, “Guyau goame!” o kadi, “Guyau goamo!” e taabu konuumisēdi. 22 Moitamo. Guyau polapola be nakae tokabivalavala polapola bei sisowóduwo, aba kinana kainaaopaidi siguuinuwedi bei tomota sivasulaaigidi. Bei sipoikíkina bego Yaubada ina kinavayao sivasulaigidi. 23 E ami dodōkana! Bogina agimikatumatalimi.

24 E moitamo guyau polapola bei sisowóduwo go, Guyau ina kaluvilamna moe nakae geya, go sem ame nakae: Amo tutayana mouyadi mlidi goi ame nakae bei isowóduwo:

26 Amo tutayana goi tomota bei Tomalatomota sigite gaota goi imamaima† Dan 7:13; Nuw 1:7. ina togaga gagaina be Yaubada ana káeyana tomoeeyalina gagaina ivagitakoedi. 27 Amo tutayana anerose bei ietunedi sina poyapoya ana madabokina goi ina kinavayao sitaligogoidi.

28 E latuwogu livalakaibala ame taniya‡ Taniya: Aba gita ame Diyuu idi kalova yoina pigi (fig) keuwoina giyaina nakae keukeu keuwoina, go sem vagadi sivalutu nakae taniya. manuna aba gita tayamo avatulukoimi bei koyagoi. Tutayana taniya laonina bogina silabosúsuwo be vaga vau idugo, e bogina koyagoi kúwana ana tuta bogina ivaakikina. 29 Moe tauna komi nakae. Tutayana amo mouyadi koogitedi, e koyagōi Tauyana totom goi ikaaiyaka. 30 U, moe bei kooyagoi go, ame alatuuwokoimi konōve: Tomota komi nakae nava bei maa yawoidi tutayana ame dogoiyadi bei sisowóduwo. 31 Yábana be poyapoya bei sitagau go, yau guna livala sikaiyako vata.

32 E Tomalatomota ina kaluvilamna ana tuta manuna konovēgu. Geya vatau tayaamo iiyagoi ava maliyalina goi o ava níyala goi bei ima.† Mad 25:13; 1Tk 5:1-2. Kidi anerose da yábana geya siyagoiyeta, e Yaubada Natuna nakae geya iyagoiyeta, go sem Yaubada Tamada anetava iiyagoi. 33 Matami silala koyauyāusa. Moitamo. Komi geya koyagoiyeta ava tuta Tomalatomota bei ima. 34 Moe nakae livalakaibala ame: Koroto tayamo latuwona ina ituli ta kasa. Tuwo ina pakonayao tamo tamo idi paisewa ivinidi. Ikavava, ina vada totomna ana tomatakavata lovina ivini kana,

35 Tauna koyauyāusa! Geya koyagoiyeta ava tuta vadayana ana Tomoya bei ima, nakona lavilavi, nakona bunatoina, nakona botomotomo, nakona nobuyana nava matagougouna. Geya koyagoiyeta, tauna koyauyāusa, 36 govila bei geya mgoninamo Tauyana ima ibabanemi koomasisi. 37 E kaga alatuuwokoimi, tomota liliudi alatuuwokoidi, moe koyauyāusa.’