Yaubada Isileli tubunao itatetedi.
1.
Boi Isileli natunao koroto madi bodayauwo taiyao sima Itipita goi sikaaiyaka. Natunaoyadi yoidi ame nakae: 
Rubeni, Simion, Livai, Yuda, 
Isakara, Sebuloni, Beniyamina, 
Dani, Napatali, Gadai be Aseri. 
E Yakobo mana bodayauwo liliudi adi badabada seventi (70) taiyao sina. E kina go natuna Iyosepa bogina Itipita goi ikaaiyaka. 
E sikaiyaka aaa, Iyosepayana ma senao be nakae amo malamalagatayana sikamasa kówasa. 
E kidi go Isileli tubudiyao sisusáila gagaina toina nakae sibadabada be nakae sitogaga toina, tauna asayana Itipita kidi sivakayaodei. 
E sikaaiyaka go, da Itipita adi tolovina vau itaoya go, Iyosepa ina guinuwa geya ikamoitamoeeta. 
E ina bodao da Itipita ilatuwokoidi idigo kana, ‘Bogina kogite? Isileli tubunao bogina sisusáila gagaina nakae adi badabada sikalisaveda be sitogagasaveda! 
Mada nanamsa tasikogigīdi, govila bei tuwaina sisusáila, e niga neta yaviya isowóduwo, kidi bei sina ida kaleyayao taiyao sisiukoidi sima silaúida, namliyeta asa sikalave.’ 
Tuwo da Itipita ame nakae siguinuwe: Itipita korotoidi sikinavedi sivayokoidi kidi Isileli tubunao adi tolovinao, e paisewa moumouna goi sikinenetedi. Paisewayana ame nakae: Asa aiyuwo Pitom be Ramasesi siyowóidi, e bei asayadi sinaedi goi Pero ina sánala sikaaiyaka be nakae kónana adi vada siyatoidi. 
E tuta tamo tamo paisewa moumouna tuwaina sivinidi, e kidi Isileli tubunao tuwaina siisusáila nakae tuwaina asa situgidagidali. Tuwo kidi da Itipitayadi sigitedi odi isilali. 
E tuwo geya idi nuwokapisimo Isileli tubunao sipakoidi sikogúyala gagaina toina. 
Paisewa moumouna sivinidi, tauna sikaiyako mou. Idi kaiyakomouyana ame nakae: Vaega be limou taiyao sipopolidi sigabudi simalagurewa nakae, e idi vada siyowóidi be nakae idi tánuwo goi sipaisewa. Paisewa liliunakova goi da Itipita geya idi nuwokapisimo Isileli tubunao sipakoidi sikogúyala gagaina toina. 
E amo tutayana vevina Iberiu idi tovenatunavaita adi taiyuwo sikaaiyaka, tayamo yoina Sipira, tayamo yoina Puwa. Tuta tayamo da Itipita adi tolovina ilatuwokoidi idigo kana, 
‘Tutayana vevina Iberiu sivenátuna, kovaitēdi go, natudiyao kogitēdi. Neta koroto, e kokaumatēdi go, neta vevina, e koyatōidi.’ 
E kidi vevinayadi Yaubada siwowoine, tauna da Itipita adi tolovina ina lovina sikapipilave, go sem gogómana liliudi, koroto be vevina, siyatoidi maa yawoidi. 
Go tolovinayana livala inove bego vevinayadi ina lovina sikapipilave. Tuwo vala ietune ina iduduwedi sima ilatuwokoidi idigo kana, ‘Komi kaga unana guna lovina geya koguinuweeta, e gogomanayadi koroto kaga koyatokoidi maa yawoidi?’ 
E kidi vevinayadi sidigo kadi, ‘Unana kidi Iberiu idi venátuna ituli, e da Itipita nakae ituli. Kidi vevina Iberiu idi venátuna goi sitogaga, tauna toinidi sivenátuna. Bego kana kavaitedi go, kawoiko, bogina sivenátuna!’ 
E vevina tovaita adi taiyuwokova kina Yaubada iyabobonedi, tuwo Isileli tubunao tuwaina sisusáila be nakae sitogaga gagaina. 
Vevinayadi Yaubada siwowoine, tauna ikitogagedi, e itoboinedi sikéuwama. 
E tuwo Pero ina bodao da Itipita liliudi ilovinaedi idigo kana, ‘Ava Iberiuva natudiyao koroto sibíbina, e liliudi kokabīdi, konavēdi sákala Nairi goi kolavēdi sisou sikámasa, go neta natudiyao vevina, e tuwo koyatōidi maa yawoidi.’