Ruti tetelina.
1.
E koroto tayamo yoina Elimaleka go, monena Naomi taiyao Bedeliyema goi sikaaiyaka. Bedeliyemayana moe Yuda dadavina sinaena. Ma natuudiyao koroto adi taiyuwo; tayamo yoina Maloni, tayamo yoina Kiliyoni go, adi nunu yoina Eparati. E tutayana Isileli idi totaligavayao siilovina, Isileli sinaena loga gagaina isowóduwo losiye pasina. Tuwo Elimaleka monena natunao adi taiyuwo taiyao sitaoya, sina asa Moabe goi sikaaiyaka. 
Sikaaiyaka aaa, Naomi monena Elimalekayana ikámasa. Tuwo Naomi natunao adi taiyuwo taiyao aditava sikaaiyaka. 
Sikaaiyaka, natunaoyadi Moabe vevinaidi sinaidi, tayamo yoina Opa, tayamo yoina Ruti. Amoko goi sikaaiyaka tala ana badabada yawou 
go, Maloni be Kiliyoni adi taiyuwokova nakae sikámasa. Tuwo Naomi monena be natunao bogina sikámasa, tauna anetava ikaaiyaka. 
E Naomi livala tayamo inove bego Yauwe ina bodao Yuda goi ivaaitedi; adi máliya bogina ivinidi. Tauna yaonao adi taiyuwo taiyao sitaoya, sikatubayasi bego Moabe sikalave go, sikaluvila sina Yuda. 
Sikatubayasi ikavava, asayana goi sikaaiyaka sikalave go, siketoiya bego sina Yuda. 
Sinonoina go, Naomi idigo kana, ‘Yaogowo, kokaluvilāmna kōna sinamiyao taiyao kokaaiyāka. Guna kawanoi bego Yauwe ilokatemi nakae komi bogina kolokategu be nakae boi natugowo kolokatedi. 
Aiyuwoina, guna kawanoi bego Yauwe itagona konaimna bei monemiyao taiyao kokaaiyaka imi vada.’ Tuwo, tauyana iyowoiidi go, kidi sitáiya. 
Sitáiya, sidigo kadi, ‘Yaoma, geya latuwoma kakalavem. Latuwoma bego kakitaum bei taiyao tana im bodayao yaidi.’ 
E kina go Naomiyana idigo kana, ‘Yaogowo, kokaluvilāmna kōna imi kasa. Kaga pasina latuwomi kokitaugu? Yau geya itoboineguta bei avaitemi. Nakae geya itoboineguta bei natugowo koroto avenatunidi bei monemiyao. 
Tuwo, kokaluvīla kōna imi kasa. Yau bogina akainamoya, tauna geya itoboineguta anaimna. Go neta sabamgo ame yau koroto tayamo bei anai, taiyao kamasisi akéuwama be natugowo koroto avenatunidi, 
manakae? Bei kotuyaosidi, e sibíbina gagaidi baige konaidi? Bei nai kototo? Geya, yaogowo, geya itoboinemita. Yaubada bogina itugavilegu, tauna moumou ivakaigaga yaigu namliyeta komi. Bogina koyagoi. Komi itoboinemi konaimna go, yau geya.’ 
E tuwo ina livala sinove, sitaiyamna. E Opa yaona iyowoi ikavava, ikaluvila ina ina kasa go, kina Ruti yaona imatakanikaniye, e ivalabilabine. 
E tuwo, Naomi idigo kana, ‘Kunōve. Tuwowom ikaluvilamna ina ina bodao be ina yaubadayao yaidi. E kom taiyao kokaluvīla.’ 
Go kina Rutiyana idigo kana, ‘Taabu kukaawanōi yau yaigu bego akalavem, go sem neta kutagonegu bei akitaum. 
Nako goi kukámasa, 
E Ruti ibóbwara ikavava, Naomi bogina iyagoi bego Ruti latuwona toina taiyao sina. Tauna itugau. 
E tuwo adi taiyuwokova siketoiya sinonoina Bedeliyema manuna. 
Tutayana sisowóduwo Bedeliyema goi sisiu, asa butukaona iyata, e vevina liliudi sima adi taiyuwokova sigitedi, sidigo kadi, ‘Iyaa! Amo Naomi ae?’ 
Go kina Naomiyana idigo kana, ‘Tokalika ikitaitaiyegu, tauna taabu koduuduwēgu Naomi, go sem koduduwēgu Mara. 
Boi akalavemi maa konagu go, ame tutayana Yauwe ikaluvilemneigu nima kaka. Kaga ana dedevina koduduwegu Naomi? Geya. Yauwe Tokalika itugavilegu be nakae ikitaitaiyegu.’ 
Tauna nakae Naomi Moabe goi itaoya yaona Ruti guma Moabe taiyao sina Bedeliyema. Ego tutayana sisowóduwo Bedeliyema goi, moe bali ana tuta dibayoya ana kaba vatowo.