Vala Dedevina Madiu Igini.
1.
Buki ame moe Yeisu Guyau ana liliu bukina. Tauyana tubuna moe tokalibúbuna Devida go, tubuna gagaina moe Eberamo. 
Liliuyana ame nakae: Eberamoyana natuna Aisake. Aisakeyana natuna Yakobo. Yakoboyana natunao moe Yuda senao taiyao. 
Yudayana natunao moe Peresi be Serako go, sinadi moe Temari; tauyana Totuyoyowo tayamo. Peresiyana natuna Esironi. Esironiyana natuna Eram. 
Eramyana natuna Aminadabi. Aminadabiyana natuna Nakasoni. Nakasoniyana natuna Salimoni. 
Salimoniyana natuna Boasa go, Boasayana sinana moe Reyabi; tauyana Totuyoyowo tayamo. Boasa natuna Obedi go, Obediyana sinana moe Ruti; tauyana Totuyoyowo tayamo. Obedi natuna Diyesi. 
Diyesiyana natuna moe tokalibúbuna Devida. Devidayana natuna moe Solomoni. Solomoniyana sinana moe Uriya kobuina. Kobuinayana Totuyoyowo tayamo. 
Solomoniyana natuna Reyoboam. Reyoboamyana natuna Abiya. Abiyayana natuna Asepi. 
Asepiyana natuna Iyosepata. Iyosepatayana natuna Yoram. Yoramyana natuna Usaya. 
Usayayana natuna Yotam. Yotamyana natuna Eyasi. Eyasiyana natuna Esakaiya. 
Esakaiyayana natuna Manase. Manaseyana natuna Emosi. Emosiyana natuna Yosaya. 
Yosayayana natunao moe Yekonaya senao taiyao. Amo tutayana da Babiloni sima Isileli tubunao sikabidi, sinavedi Babiloni goi sikaaiyaka. 
E sinavedi Babiloni goi mlina: Yekonayayana natuna Salatiyeli ibíbina. Salatiyeliyana natuna Serubabela. 
Serubabelayana natuna Ebiuda. Ebiudayana natuna Eliyakim. Eliyakimyana natuna Asora. 
Asorayana natuna Sadoki. Sadokiyana natuna moe Ekim. Ekimyana natuna moe Eliuda. 
Eliudayana natuna Eliyasa. Eliyasayana natuna Madani. Madaniyana natuna Yakobo. 
Yakoboyana natuna moe Iyosepa, Meri monena. Meriyana goi Yeisu ibíbina go, Yeisuyana tomota sivayoko kina Guyau. 
Tauna Yeisu tubunao adi badabada ame nakae: Eberamo goi go, ima Devida goi moe malamalágata ana badabada yawou aivasi. Devida goi go, ima Isileli tubunao idi tuta sina Babiloni goi moe malamalágata ana badabada yawou aivasi. Idi tuta Babiloni goi go, ima Guyau ina tuta moe nakae malamalágata ana badabada yawou aivasi. 
E Yeisu Guyau ina bíbina ame nakae: Sinana Meri Iyosepa ana kamatákwana taiyao geya situyuwoita go, Baloma Kimaasabaina ana kaiguyau goi Meri bogina gómana ibabane. 
E Meri monena Iyosepayana koroto tokibóbwata. Tuwo geya latuwona Meriyana igieomaemae, tauna ina nuwonúwana bego ivaisobuyegau. 
Moe manuna inuuwonúwana go, matana imasisi, e imasisi ikanamatáiya. Ina masisiyana goi ikanamimi. E ina kanamimiyana goi Yauwe ina anerose matabuwona isowóduwo ikatuwoini, idigo kana, ‘Iyosepa, Devida tubuna, taabu kuumatōita bei Meri kukabi monem. Gamona sinaena gomanayana ibibíbina moe Baloma Kimaasabaina ina kaiguyau goi ima. 
E gómana koroto bei ivenatuni go, gomanayana kuvayou Yeisu. Ina bodao idi goyo goi bei iyavedi.’ 
E moe dogoiyadi liliudi sisowóduwo bego itoboine Yaubada ina tokabivalavala ina talavaita imalatomotamna. Talavaitayana moe Yauwe ina vala boi italavaitedi idigo kana, 
‘Kunōve! Woiyai geya ana kanaotamo bei ikéuwama, niga natuna koroto bei ivenatuni. Go yoina bei sivayou Imanuweli.’ Aiseya 7:14 Youyana ana kaigavila moe Yaubada kita taiyao. 
E tuwo Iyosepa masisi goi itaoya, kaga Yauwe ina aneroseyana bogina ilaatuwoko nakae iguinuwe. Tuwo vavinayana ikabi monena 
go, sakavaina geya ibisikoneeta ana kadókana natuna ivenatuni. Ivenatuni ikavava, e Iyosepa ivayou Yeisu.