Yeisu ina vamoleyanayao idi guinuwa.
1.
Tiyopilo e, Guna buki vakuumgoina boi agiimigini manum sinaena moe kaga liliuna Yeisu iguinuwedi be nakae ivatulúkwana. Moe ina paisewayana ana kaba vatowo 
ana kadókana Baloma Kimaasabaina goi tauyadi ina vamoleyanayao kiinavaidi adi lovina ivinidi namliyeta baige Yaubada ikabi itukoe inave yábana. 
Ame tauyadi yaidi Yeisu ina mamayuyu be ina kámasa mlidi toinina ivagitako kina maa yawoina. Ina taoyamna ana kiyakiyaya badabadaidi ivatulukoidi bei siyagoi kina moitamo maa yawoina ame nakae: Maliyalina poti (40) sinaedi iisowóduwo yaidi go, ina sowoduwoyadi goi ivatuulukoidi Yaubada ina kalibúbuna manuna. 
Ego nava taiyao sikaaiyaka sikakáika, ilovinaedi idigo kana, ‘Boi Iyoni bwae goi isayoyoimi go, maliyalina maniyedi sikavava, Yaubada Balomaina Kimaasabaina goi bei isayoyoimi. Tauna Yerusalema taabu kookalāve, go sem kootuyāwata ana kadókana Tamada Balomainayana boi ikaatotule ivinimi. Atotulayana yaigu goi boi bogina konove.’ 
E tuwo lavayana situgúguna Yeisu taiyao, sidigo kadi, ‘Ima Tomoya, ame tuta bei Devida ina kalibúbuna kuyolimemnei go, kita Isileli tubunao taudava takalibubuda o geya?’ 
Go Yeisu idigo kana, ‘Geya itoboineeta koyagoi ava tuta Tamada bogina iupe bei toinina ina lovina goi alibubunayana ana yolímana iguinuwe, 
go sem itoboine koyagoi tutayana Baloma Kimaasabaina iwo yaimi goi, togaga bei kobabane, e komi bei guna totalavaitayao Yerusalema goi nakae Yudiya ana dadava madabokiina goi, Samériya ana dadava goi be nakae asa liliuna poyapoya ame goi.’ 
Moe livalayadi ilatuwokoidi ikavava, Yeisu sigitegite go, Yaubada itukoe inave yábana, e gaota sinaena goi isiu itagau, tauna geya itoboinedita sigite. 
Ego tutayana ituko inonoina, kidi nava yábana osasaina sikandoolagae go, koroto adi taiyuwo madi kwama poowoudi kikidi goi siitaoya 
kadi, ‘Komi Galili korotoimi, kaga pasina kootaoya yábana osasaina kopotepote? Mae Yeisuyana bogina kogite yaimi goi Yaubada ikabi itukoe inave yábana, bei ikaluvilamna ima go, ina kaluvilamnayana ana kaigigita tauna mae ina tuko nakae bogina kogite.’ 
Niga koya yoina Oribe goi sitaoya, sisou situko sikaluvila sina Yerusalema. Moe geya kada aduwanau geya, go sem Yaubada ina Katukeda itagonedi Sabati goi nakae siketoiya. 
Tutayana Yerusalema goi sisiu go, vada tayamo vaapopoina goi simwera sikaaiyaka. Tauyadi moe Pita, Iyoni, Yemesa, Anduru, Pilipo, Tomasi, Batolomiu be nakae Madiu, Alipiyo natuna Yemesa, Saimoni (tauyana Isileli tubunao idi kaba lovina ana tokokoila) be nakae Yemesa natuna Yudasa. 
Moe tauyadi, maniyedi vevina, Yeisu senao be nakae sinana Meri taiyao sikaaiyaka go, madabokidi nuwodi tayamo goi tuta liliuna toinidi sikaasaledi idi kawanoi Yaubada yaina goi. 
Moe tutayana goi Pita senao nuumisaidi adi badabada tayamo andedi tuwenti (120) nakae situgúguna go, nauyayanaidi goi Pitayana itaoya ilatuwokoidi idigo kana, 
‘Segowo, Gínina Kimaasabaina itoboine imalatomota. Gininayana boi nimatu Baloma Kimaasabaina Devida nukotona isanayato, e Yudasa ina guinuwa igimitalavaitedi. Yudasayana boi Yeisu ana toyoitayao ivaitedi. 
Tauyana boi mainao kai taiyao kaeboda tayamo; kai madabokima Yeisu ina vamoleyanayao o tadigo kada, “Yeisu ikawoi kai taiyao.” 
Tuwo amo tauyana ina goyo ana maisa Tonúwala Gagaidi sikabidi, e tauyana yoina goi toinina ina poyapoya sigimone. Sigimone ikavava, tauyana itaoya, ina poyapoyayana goi isouye gamona ivatupave, e sileuna madabokina isowóduwo. 
Amo tetalayana Yerusalema ana tokaiyakoyao liliudi bogina sinove, tauna Yudasa ina kámasa pasina kidi toinidi niyadi goi asayana sivayou Akeladama.’ Moe ana yagoina ikaika poyapoyaina. 
Pita nava ibobóbwara kana, ‘Moe moitamo. Gininayana itaalavaite moe Same goi tagite. Sameyana Devida igini kana, “Toinina ina kasa tomota sikalave, asayana goi tomota taabu sikaaiyāka.” Same 69:25 Aiyuwoina kana, “Ana katumapu itoboine bei tauyana ina baseko ikabi.” Same 109:8 E Sameyadi silatuwokoida kaga itoboineda taguinuwe. 
Tauna itoboineda Yudasa ana katumapu takinave. Ago koroto besobeso geya, go sem ava korotova boi sisabokuuliyema tutayana ida Tomoya Yeisu nava yaida goi ikaaiyaka. 
Nakae boi ana sayóyova Iyoni goi go, ana kadókana matama goi Yaubada ikabi itukoe inave yábana. E ame tauyadi yaidi goi tayamo takinave, e bei korotoyana imalatotalavaita Yeisu ina taoyamna manuna kai taiyao.’ 
Pita ibóbwara ikavava, you aiyuwo sikailagasidi: Tayamo yoina Iyosepa, tauyana siduduwe Basabasi go, youyuwoina moe Yusto. Tayamo yoina Mataya. 
Youyadi sikailagasidi ikavava, sikawanoi Tomoya yaina sidigo kadi, ‘Ima Tomoya, Yudasa boi paisewa ikalave go, iilusale ame baige wowona ikaivanuwe. Ame tuta ana katumapu kaalusale. Ago kom tomota liliuma nuwoma bogina kuyagoidi. Tauna kakawanoi yaim kuvatulukoima ame korotoyadi yaidi goi avatau bogina kukinave kina Yudasayana ana katumapu, e bei tauyana im vamoléyana ipaisewa manum.’ 
Sikawanoi ikavava, aba yagoina tayamo siwodugu go, Mataya kinava ibabane. Tuwo tauyana Yeisu ina vamoleyanayao yawou tayamo isiukoidi.