1 Nawu God Duninjh Kawohrnan kore nawu birriyahwuhyahwurd gods kore kabirrimirndemornnamerren. Nungka wanjh kabendjadme bedberre.

2 Nungka kabendjawan, “Njalekenh ngudda minj mandjad bu ngurrbendjadme nawu birriwarre bininj? Dja ngurrbenbidyikarrme bininj nawu kabirrikurduyime kunwarre? 3 Wanjh ngaleng ngurrbenbidyikarrme nawu birriyahyahwurd dja nawu birrikornkumoyak bu bininj birriwarre kabindiwarrewon. Dja mak ngurrbennahna bininj nawu birrimarladj, dja nawu birribuyika bininj kabindibongkarrme kore kunwarrekenh. 4 Mak ngurrbenngehkemen nawu birringudjwarre dja nawu minj birrikuken bininj. Ngurrbenbebke kore birriwarre bininj kabindibongkarrme.”

5 God yimeng, “Nahni nawu gods birriyahwurd, wanjh minj njale kabirriwernhburrbun! Minj kabirriborlhme njalehnjale. Kabirrire balehbaleh dja bedda yiman birrimimbunje. Kawarre! Dja wanjh kurorre rowk kabolkrokarokan bu kunwarrekenh ngudberre.”

6 Wanjh God benmarneyimeng, “Ngaye marneyimeng, ‘Ngudda wanjh gods rerrih. God nawu Nakimuk Duninjh ngunbornang ngudberre, John 10:34 7 dja bonj, ngurribaldowe yiman bininj duninjh kabirridjaldowe rowk. Ngudda ngurriyawoyhyahwurdmen, yiman kayime kings rowk.’ ”

8 O God, ngadjare ngudda yirrolkkan dja yibendjadme birriwarlahkenh bininj rowk kore kurorre. Kaluk ngudda yidjalkudji wanjh yibenmarnewohrnan rowk.