Ibra Eenana Thaapadhoono Warqanno.
1.
Barjo ena wodanka waana waana goytika Barjokala qansayse eenna giyaynaka wosa eykenana thoothi wodana giydine. 
Taaki macchin wodan koka yer wulsa toydi maataa yisa Naasaka wona giydine. Barjoar yer wulam kinin pijoono Naasa yintea goynkane. 
Kidi yinti Barjo gobshinsa shaakane; kidi yisa dantanka Barjo Imbaabesana kalaane. Yisa kantan upsinka pijadhin wulam keedhayse ki yedade. Eenaamaar kesa seesora yinin gazinsonsa budonte cecinte wuldara gobshinka sagi maataa Barjosa mizaqimbar ki dooqade. 
Barjo Naasana imbhoono naabeno Barjo gaananasa naabendara kattsi sagine; ogodettsi kidi kedara sagine. 
Harrna hambhidianna, Barjo yisa gaananasa kalaana “Ya isa Naasine; inta haam kina adhidine” pir, “Inta kisa Imba ida maate; kidiar isa Naasi kida maate” hamayse kinin giyaa hayne? 
Pir Barjo biraa Naasa yinteam peendar yinin nittsenka, “Barjosa gaanana wul kumpurdhayse kina ke goodime” ki hamade. 
Barjo yisa gaananaka “Isa gaananaam wuradettsi ida haye; ina waadimaynaamaar nuusa laabhinadettsi ida haye” ki hamade. 
Yisa Naasaka ko hanna, “Barjo, hasa bitamon borkotono rooro wul lay koda dee; hasa eenaam tipamoka hada wottse. 
Tipamon waadimanam nashayse siyon waadimanam ha jibbade. Ogo goynka hasa Barjoa haam kamayse hasa aanammadara kattsi sagi hayayse haam wozisen zaytinka ki qadhade” ki hamade. 
Yin pir, “Imbo, ya ena birayse peenam ha pijade; cecinoar hasa aanin waadimanone. 
Igina kaya ke kaye; ya rooro wul daada dee. Kedi wul apaladettsi keda gecche; 
apaladettsiar keam hada umbhuse; apaladettsiar ookaada ooke. Yaar rooro wul lay ookimattane; hasa levensa macchi qolehe” ki hamade. 
Barjo gaananasa kalaana “Haam jibbaynaam hasa hayamon demente inin hayenka yekka isa mizaqinte dooqaa” hamayse kinin giyaa hayne? 
Ta keeda gaanana wul Barjoyn dhacchaynaam kenin kelshoadettsi nittsadhayna Barjona waadadhayna manpasinatayu?