Ioba.
13.
A IA hoi, ua ike ko'u maka i keia mea a pau, Ua lohe kuu pepeiao, a ua hoomaopopo hoi ia mea. 
E like me ka oukou ike, pela no hoi ka'u e ike nei; Aole wau i emi iho malalo o oukou. 
Aka, e olelo aku no au i ka Mea mana, A ke ake nei au e olelo hoakaka pu me ke Akua. 
A o oukou nae, he poe noonoo i ka wahahee, He poe kahuna lapuwale oukou a pau. 
Ina paha e noho malie loa oukou! E lilo auanei ia i naauao no oukou. 
E hoolohe oukou ano i kuu hoakaka ana, A e haliu mai i na paapaa ana o kuu mau lehelehe. 
E olelo hewa anei oukou no ke Akua? A e kamailio wahahee anei oukou nona? 
E nana anei oukou ma kona helehelena? E hakaka anei oukou no ke Akua? 
He mea maikai anei e hulihuli mai oia ia oukou? A e like me ka ke kanaka e hoopunipuni ai i kekahi, Pela anei oukou e hoopunipuni ai ia ia? 
E ao io mai no kela ia oukou, Ke nana malu oukou ma na helehelena. 
Aole anei e hoomakau mai kona kiekie ia oukou? A e kau mai kona makau maluna o oukou? 
Ua like ka oukou olelo akamai me ka lehu, A o ko oukou puukaua me ka puukaua lepo. 
E hamau oukou imua o'u, a e olelo aku au, A o ka mea e hele mai ana maluna o'u e hele mai no ia. 
No ke aha la i lawe ai au i kuu io ma ko'u niho, A e waiho i kuu ola ma kuu lima? 
Ina e pepehi mai oia ia'u, e hilinai no au ia ia, Aka, e hoapono aku au i kuu aoao imua ona. 
E lilo hoi ia i ola no'u; No ka mea, aole e hele mai ka aia imua ona. 
E hoolohe pono oukou i kuu wahi olelo, A me kuu hai ana'ku i ko oukou pepeiao. 
Aia hoi ano, ua hoomakaukau au i kuu aoao; Ua ike au, e hoaponoia mai au. 
Owai la ka mea e hoopaapaa pu me au? No ka mea, ano, e noho malie wau, a e make no. 
Aka, mai hana mai oe i na mea elua ia'u; Alaila aole au e huna ia'u iho mai ou aku la. 
E hemo aku i kou lima mai o'u aku la: A mai hooweliweli mai kou makau ia'u. 
Alaila e kahea mai oe, a eo aku au; A o olelo aku paha wau, a e olelo hou mai oe ia'u. 
Ehia na hala o u a me na hewa? E hoike mai oe ia'u i kuu lawehala ana a me kuu hewa. 
No ke aha la oe e huna ae ai i kou maka, A e manao mai ai ia'u he ememi nou? 
E hooweliweli mai anei oe i ka lau i puhiia io ia nei? E alualu anei oe i ka opala maloo? 
No ka mea, ke kakau nei oe i na mea awaawa ia'u, A ke hoopai mai nei oe ia'u i na hewa o kuu wa opio. 
Ke hookomo nei oe i ko'u mau waewae ma ka laau kupee, A ke makai nei i ko'u mau aoao a pau: Ke kahakaha nei no oe a puni na kapawai o'u. 
A ua hoopauia oia me ho mea popopo la, A me he lole la i aiia e ka mu.