Ioba.
17.
U A paupauaho au, ua hookiia kuu mau la, Ua makaukau na halelua no'u. 
Aole anei he poe olelo hoino me au? A ke kau nei kuu maka ma ko lakou hoonaukiuki ana? 
E waiho iho ano, e hana mai ia'u i malu me oe; Owai ka mea e pai i na lima me au. 
No ka mea, ua hoohuna oe i ka naauao mai ko lakou naau aku; Nolaila, aole oe e hookiekie ia lakou. 
O ka mea e kumakaia i kona mau hoalauna no ka waiwai pio, E hoopauia na maka o kaua poe keiki. 
Ua hooku mai oia ia'u i mea e olelo nane ia e na kanaka; A ua lilo au i mea hoopailua imua o lakou. 
Ua ponalonalo kuu maka no ka uwe ana, A o kuu helehelena a pau ua like ia me ke aka. 
E kahaha ka poe pono i keia, A e hooku e la mea hala ole i ka aia. 
E hoomau no ka mea pono i kona aoao, A o ka mea lima maemae, e hoomahuahua aku ia i ka ikaika. 
Aka, o oukou a pau, e hoi mai no, No ka mea, aole e loaa ia'u iwaena o oukou ka mea naauao. 
Ua hala kuu mau la, ua okiia'ku kuu mau noonoo, O na manaolana o kuu naau. 
Ua hoololi lakou i ka po i ao, O ka malamalama, ua pokole ia no ka pouli. 
Ina e kakali aku au, O ka luakupapau ko'u hale: Ua hohola aku au i kuu wahi moe ma ka pouli. 
Ua kapa aku au i ka palaho, O oe ko'u makuakane, A i ka ilo, O oe ko'u makuwahine, a me ko'u kaikuwahine. 
Auhea hoi kuu manaolana? A o ko'u manaolana, owai la ka mea e ike aku ia? 
E iho lakou i ua kaola o ka po, I ka wa e maha pu ana i ka lepo.