Ioba.
20.
A LAILA olelo aku la o Zopara, no Naama, i aku la, 
O kuu mau manao ka mea e olelo aku ai au, A no kuu ikaika iloko o'u. 
O ke ao ana o kuu hoinoia ka'u i lohe, A o ka uhane o kuu naauao, oia ka'u mea e pane aku nei. 
Ua ike anei oe i keia, mai ka wa kahiko mai, Mai ka manawa i hoonohoia'i ke kanaka maluna o ka honua, 
O ka olioli o ka poe hewa, he pokole ia, A o ka lealea o ka aia, no ka minute ia? 
Ina e pii ae kona kiekie i na lani, A e hiki kona poo i na ao; 
E nalo loa oia e like me kona lepo: E olelo nuanei ka poe i ike ia ia, Auhea oia? 
E like me ka moeuhane e lele aku ia, aole e loaa oia: A e holo aku oia e like me ka hihio o ka po. 
O ka maka i ike ia ia, aole ia e ike hou ia ia; Aole hoi e ike hou kona wahi ia ia. 
E hoolaulea kana mau keiki i ka poe ilihune, A e hoihoi aku kona mau lima i ko lakou waiwai. 
Ua piha kona mau iwi i kona opiopio, A e moe pu ia me ia ma ka lepo. 
Ina e ono ka hewa ma kona wana, A e huna ia mea malalo o kona alelo; 
Ina e aua ia mea, a haalele ole ia, A e malama hoi ia mawaena konu o kona waha; 
O ka ai iloko o kona naau e hoololiia, Oia ka mea make o na moonihoawa iloko ona. 
Ua moni no ia i ka waiwai, A e luai hou aku no ia mea; Na ke Akua e hoohemo ia mea mai kona opu aku. 
E omo no oia i ka mea make o na moonihoawa: O ke elelo o ka moomake e pepehi ia ia. 
Aole ia e ike i ua kahawai, I na muliwai, me na kahawai o ka meli, a me ka waiu. 
E hoihoi aku no ia i ka mea ana i luhi ai, aole ia e moni iho ia; E like me ka waiwai e hoihoiia'aku, aole ia e olioli ilaila. 
No ka mea, na hookaumaha, ua haalele i ka poe ilihune; Ua lawe wale aku ia i ka hale ana i kukulu ole ai. 
No ia hoi, aole ia e ike i ka oluolu maloko o kona opu, Aole ia e hookoe i kana mea i makemake ai. 
Aohe mea e koe no kana ai; Nolaila, aole he manaolana no kona pomaikai. 
Ma ka nui ana o kona waiwai, e hiki ka popilikia ia ia; O kela lima keia lima o ka poino e hiki mai ia maluna ona. 
I ka wa e hoopiha ai ia i kona opu, E hoolei mai no ko Akua i kona inaina maluna ona, A e hooua mai no ia maluna ona i kana ai ana. 
E holo aku ia mai ka mea kana hao aku, E houia oia i ke kakaka keleawe. 
Hukiia mai la ia a puka ae mai ke kino mai; A puka ae hoi ka pahikaua huali mai kona au mai; Maluna ona na mea weliweli. 
Ua hoahuia ka poino a pau no kona waiwai; O ke ahi i hoa ole ia e hoopau ia ia; E popilikia ka mea o koe iloko o kona halelewa. 
E hoike mai ka lani i kona hewa; E ku e mai ka honua ia ia. 
O ka waiwai o kona hale, e nalowale ia, E uininiia aku ia i ka la o kona inaina. 
Oia ka uku o ke kanaka hewa mai ke Akua mai, Oia kona hoilina i oleloia mai e ke Akua.