Ioba.
26.
A LAILA olelo mai la o Ioba, i mai la, 
Pehea la oe i kokua mai ai i ka mea nawaliwali? A hooikaika mai hoi oe i ka lima ikaika ole? 
Pehea la oe i ao mai ai i ka mea ike ole? A hoike nui mai hoi oe i ka noeau? 
Ia wai anei oe i hai aku i na olelo? Nowai ka hanu i puka ae mai ou mai la? 
O na mea i make, ua haalulu lakou mai lalo mai, O na wai a me kolaila poe e noho ana. 
Ua ahuwale ka ka po imua ona, Aohe uhi no kahi o ka poe i make. 
Ua hohola aku ia i ke kukuluakau maluna o ka neoneo, Ua kau aku i ka honua maluna o ka mea ole. 
Ua hoopaa oia i na wai maloko o na ao ona, Aole i nahae ke ao malalo o lakou. 
Ua uhi no ia i ke alo o kona nohoalii, Ua hohola aku i kona ao maluna ona. 
Ua hoopuni oia i na wai i ka palena, A hiki i kahi e pau ai ka malamalama iloko o ka pouli. 
O na kia o ka lani ua haalulu, A weliweli hoi i kona papa ana mai. 
Ua hoomalielie oia i ke kai ma kona mana, A ma kona naauao, hahau iho ia i kona kiekie. 
Ma kona Uhane ua hoonani oia i na lani; Na kona lima i hana i ka nahesa e lele ana. 
Aia hoi, oia kekahi mau mea o kona mau aoao; Nani hoi ka uuku o ka mea i loheia nona! A o ka hekili o kona mana owai la ka mea e ike pono?