Ioba.
35.
OLELO aku la hoi o Elihu, i aku la, 
Ke manao nei oe he pono keia, O kau i olelo mai, O ko'u pono, ua oi mamua o ko ke Akua? 
No ka mea, ua ninau mai oe, Heaha ka pono no'u? Heaha hoi ko'u pomaikai no kuu hewa ole ana? 
Owau ke hoihoi aku ia olelo iou la, A i kou mau hoalauna me oe. 
E nana ae oe i ka lani, a ike; A e nana i na ao, ua kiekie lakou mamua ou. 
Ina e hana hewa oe, heaha kau hana ia ia? Ina e hoonuiia kou mau hala, heaha kau e hana'i nana? 
Ina ua pono oe, heaha kau e haawi aku ai ia ia? Heaha kana e loaa'i mai kou lima aku? 
No ke kanaka e like me oe kou hala, A no ke keiki a ke kanaka kou pono. 
Ke uwe ae nei ka poe kaumaha no ka hooluhiia; I uwe lakou no ka lima o na mea koikoi. 
Aka, aole e i mai kekahi, Auhea ke Akua nana au i hana, Ka mea i haawi mai i na mele olioli i ka po; 
O ka mea i ao mai ia kakou mamua o na holoholona o ka honua, A ua hoonaauao oia ia kakou mamua o na manu o ka lewa? 
Malaila lakou e uwe ai, aole mea i ekemu mai, No ka haaheo o ka poe hewa. 
He oiaio, aole ke Akua e hoolohe mai i ka mea wahahee, Aole ka Mea mana e maliu mai ia. 
Ina paha e olelo oe, aole oe i ike ia ia, Imua ona ka hooponopono, nolaila e kali aku oe ia ia. 
Ano hoi, he mea ole ka hoopai ana o kona inaina, Aole ia e haka pono mai i na hewa; 
Nolaila i oaka hewa mai ai ko Ioba waha, He hoonui olelo kana me ko ike ole.