Halelu.
136.
E MILILANI aku ia Iehova, no ka mea, ua maikai oia; No ka mea hoi, ua mau loa kona lokomaikai. 
E mililani aku i ke Akua o na akua; No ka mea, ua mau loa kona lokomaikai. 
E mililani aku i ka Haku o na haku; No ka mea, ua mau loa kona lokomaikai. 
I ka mea nana wale no i hana na hana mana nui; No ka mea, ua mau loa kona lokomaikai: 
I ka mea nana i hana ka lani ma ke akamai; No ka mea, ua mau loa kona lokomaikai. 
I ka mea nana i kukulu ka honua maluna o ka wai, No ka mea, ua mau loa no kona lokomaikai; 
I ka mea nana i hana na malamalama nui; No ka mea, ua mau loa no kona lokomaikai; 
I ka la e alii ai maluna o ke ao, No ka mea, ua mau loa kona lokomaikai: 
I ka mahina hoi, a me na hoku e alii ai maluna o ka po, No ka mea, ua mau loa kona lokomaikai; 
I ka mea nana i luku ko Aigupita, ma ko lakou makahiapo, No ka mea, ua mau loa kona lokomaikai: 
A hoopuka mai la i ka Iseraela, maiwaena mai o lakou, No ka mea, ua mau loa kona lokomaikai: 
Me ka lima ikaika, a me ka lima kakauha no noi, No ka mea, ua mau loa kona lokomaikai: 
I ka mea i mahele i ke Kaiula i mau puu, No ka mea, ua mau loa kona lokomaikai; 
A hoohele ae i ka Iseraela mawaena konu ona, No ka mea, ua mau loa kona lokomaikai; 
A luku aku la ia Parao, a me kona kaua iloko o ke Kaiula, No ka mea, ua mau loa kona lokomaikai: 
I ka mea alakai i kona poe kanaka ma ka waonahele, No ka mea, ua mau loa kona lokomaikai. 
I ka mea pepehi i na'lii nui loa, No ka mea, ua mau loa kona lokomaikai; 
A luku hoi i na'lii ikaika, No ka mea, ua mau loa kona lokomaikai: 
Ia Sihona, ke alii o ka Amora, No ka mea, ua mau loa kona lokomaikai; 
Ia Oga hoi, ke alii o Basana, No ka mea, ua mau loa kona lokomaikai: 
A haawi mai la oia i ko lakou aina, i hooilina, No ka mea, ua mau loa kona lokomaikai: 
I hooilina na ka Iseraela, na kana poe kauwa, No ka mea, ua mau loa kona lokomaikai; 
I ka mea hoomanao ia kakou, ia kakou i hoohaahaaia'i, No ka mea, ua mau loa kona lokomaikai: 
I ka mea i hoopakele ia kakou mai ko kakou poe enemi mai, No ka mea, ua mau loa kona lokomaikai: 
I ka mea haawi mai i ka ai na na mea ola a pau, No ka mea, ua mau loa kona lokomaikai; 
E mililani aku i ke Akua o ka lani, No ka mea, ua mau loa kona lokomaikai.