Kanikau.
5.
E HOOMANAO, e Iehova, i ka mea i hiki mai ai maluna o makou; E noonoo, a e nana mai i ko makou hoowahawahaia. 
Ua huli ko makou aina hooili i na malihini, O ko makou mau hale hoi i na kanaka e. 
He poe keiki makua ole makou, aohe makuakane, Ua-like ko makou poe makuwahine me na wahine kanemake. 
Ua inu makou i ko makou wai no ke kala. Me ke kumukuai i hiki mai ai ko makou wahie. 
Ua hoomaauia mai makou ma ko makou mau a-i, Ua hooluhiia makou, aole hoomaha. 
Ua haawi makou i ka lima i ko Aigupita, a me ko Asuria, I mea e hoomaonaia mai ai i ka berena. 
Ua haua hewa ko makou poe makuakane, a ua ole lakou; Ua kaikai makou i ko lakou hewa. 
Ua noho alii mai na kauwa maluna o makou; Aohe mea hoopakele, mailoko aku o ko lakou lima. 
O ko makou ola ke kumukuai, i loaa mai ai ko makou berena, No ka maka o ka pahikaua o ka waonahele. 
Ua wela ko makou ili me he umu la, Ma ke alo o ka wela o ka wi. 
Moe wale lakou i na wahine ma Ziona, I na kaikamahine hoi o na kulanakauhale o ka Iuda. 
Ua kaulia na'lii iluna ma na lima; Aole i manaoia na maka o na lunakahiko. 
Lawe lakou i na kanaka ui, i poe wili palaoa, Hikaka ae la na kanaka opiopio, malalo iho o ka laau. 
Ua pau ka noho aua o na lunakahiko mai ka pukapa, A ua oki no hoi ke mele ana o na kanaka ui. 
Ua pau ka olioli ana o ko makou naau, Ua hooliloia ko makou hula i kumakena. 
Ua haule ka papale alii o ko makou mau poo; Auwe hoi makou i ka makou hana hewa ana. 
No keia mea, ua maule ko makou naau; No keia mau mea hoi, ua pouli ko makou mau maka. 
He mehameha maluna o ka mauna o Ziona, Hele no na alopeke maluna olaila. 
Ke noho mau loa nei oe, e Iehova, A o kou nohoalii hoi, mai kela hanauna, a keia hanauna. 
No ke aha la oe e hoopoina mau loa ai ia makou, A haalele ia makou no na la ho nui? 
E hoohuli mai oe ia makou iou la, e Iehova, a e hoohuliia makou, E hana hou i ko makou mau la, e like me ka wa kahiko. 
No ka mea, e kipaku loa anei oe ia makou! E huhu nui loa mai anei oe ia makou!