1 “स्वर्ग इन राज्य यातोवारा मान्नावाळा अन घाई आद, जो व्हातर्या होट्टुन कि तांद अंगुर इन बेली दा मजदूरगोळी क्याल्सा मा हचुल. 2 आव मजदूरगोळी प्रती ऊंद मंळसा अक ऊंद दीनार रोजी मा ईटदुन अदिक आंदरी तान अंगुर इन बेली दा कळुदुन. 3 व्हातर्या अक लगभग ऊंम्बत मुरा आव व्हार्या होट्टुन रा दुसरा लॉकुरी सात्‍ता दा बेकार निदुर्त नोळकु, 4 अदिक आव आंदुर से अंदुन, ‘नीव भी अंगुर इन बेली दा होगी, अदिक जो येनारा वळ्लीद आद, नीमी कोळाईन.’ अदिक आंदुर भी होटोदुर. 5 आग आ लॉकुर भी होटोदुर बाक हन्नेळ मुरा अदिक मुर मुरा अन हात्‍तीपास आव व्हार्या होटकु हांग अच माळदुन. 6 अईद मुरा आव मात्‍त व्हार्या होटकु दुसरा अक निदुरकु नोळदुन, अदिक आंदुर से अंदुन, ‘नीव यती हागुल तीम बेकार निदुरकु ईरतीर?’ 7 आंदुर आऊन से अंदुर, ‘इदुरसाटी कि याऊ नामी क्याल्सा मा हचीदिल.’ आव आंदुर से अंदुन, ‘नीव भी नान अंगुर इन बेली दा होगी.’ ”

8 “द्यावमुळका अंगुर इन बेली इन स्वामी तान मुनीम से अंदुन, ‘क्याल्सा माळावाळेर इक कारूकु आखरी मजदूर हात्‍ती टु पयला मजदूर ताका आंदरी मजदूरी कोटबुळ.’ 9 कम से कम अईद मुरा जो क्याल्सा मा हचकु आगीदुर रा आंदरी ऊंद ऊंद दीनार सिक्त. 10 जो पयले बंदीदुर आंदुर ईद सम्सदुर कि नामी यक्कुल सिक्‍कीत, लेकीन आंदरी भी ऊंद ऊंद दीनार अच सिक्त. 11 याग आंदरी ऊंद दीनार सिक्त रा ईद अनकु केईवाळा मा बळबुळ्सकु अनली कुरतुर, 12 ‘ई जो बाद्दा बंदार ईंदुर रा ऊंद घंटा अच क्याल्सा माळदुर, अदिक नी आंदरी भी नाम बराबर रोजी कोट, यार हागुल तीम ओझा नेगदुर अदिक बिसुल झेल्सदुर.’ ”

13 आव आंदुर दा टु ऊंद मंळसा अक उत्‍तर कोट्टुन, “हे संगी, ना नीन सांगुळ येनु अन्याय माळालीन. येन नी नान सांगुळ ऊंद दीनार इन मजदूरी पक्‍का ईला माळीद? 14 जो नींद आद, नेगु कोम अदिक होटोग; नान इच्छा ईद आद कि याट नीनी कोटीन आट अच ई हिंदळावाळा अक भी कोळाईन. 15 येन ईद उचित हैलेच कि ना तान माल से जो चाहसाईन अद माळाईन? येन नान भला ईरोद नीन कण्णगोळी नळतद? 16  ✡ २०:१६ मत्ती १९:३०; मरकुस १०:३१; लूका १३:३०ई प्रकार देल जो हिंदळोर आर, आंदुर पयले आदार; अदिक जो पयले आर, आंदुर हिंदळोर आदार.”

17 यीशु यरूशलेम इक होगाहोती हन्नेळ चेलागोळी आबना दा ओतुन, अदिक हादी मा आंदुर से अनली कुरतुन, 18 “नोळी, नाव यरूशलेम इक होगीतेव; अदिक मंळसा अन पार प्रधान याजकगोळ अदिक शास्त्रीगोळ्द कय दा हुळसुस्कु आदान, अदिक आंदुर आऊक मृत्यु इन लायक ठहरूस्यार. 19 अदिक आंदुर आऊक गैरयहूदीगोळ कय दा सोपस्यार कि आंदुर आऊन मज्याक हारसुल, अदिक क्वाळा बडुल, अदिक क्रूस मा येरसुल, अदिक आव तिसरा दिन जित्‍ता आदान.”

20 आग जब्दी इन पारगोळ्द मोय, तान पारगोळ सांगुळ यीशु उन हात्‍ती बंदकु प्रणाम माळदुर, अदिक आऊन से येनारा तरी बेळली कुरतुर.

21 यीशु आकिन से अंदुन, “नी येन चाहासत्या?”

आक आऊन से माताळदुर, “ईद वचन कोळ कि नानोर ई येढ्ढ चिकोर नीन राज्य दा ऊंद नीन ऊमा कय अदिक ऊंद नीन डाक्या कय दी कुरतार.”

22 यीशु उत्‍तर कोट्टुन, “नीव जान्सालीर कि येन बेळेतीर. येन नीव अद प्याला कुडू सकतीर यदरी ना कुडोर मा आईन?”

आंदुर आऊन से अंदुर, “कुडू सकतेव.”

23 आव आंदुर से अंदुन, “नीव नान प्याला रा कुळदीर, पर तान ऊमा कय अदिक डाक्या कय दी यारीकारा कुरसोद नान क्याल्सा आलच, लेकीन यार्द साटी नान आप्प उन दी टु तयार माळकु आग्याद, आंदुर दा साटी हुन.”

24 ईद केळकु हत्‍त चेलागोळ आ येढ्ढु वार्टुर मा नाराज आदुर. 25  ✡ २०:२५ लूका २२:२५,२६यीशु आंदरी हात्‍ती कारूकु अंदुन, “नीव जान्सतीर कि गैरयहूदीगोळ हाकिम आंदुर मा विश्वास माळतार; अदिक जो धोड्डेर आर, आ लॉकुर आंदुर मा अधिकार जतुसतार. 26  ✡ २०:२६ मत्ती २३:११; मरकुस ९:३५; लूका २२:२६लेकीन नीम दा हिंग आगतीदील; लेकीन जो यावारा नीम दा धोड्डेव आगोद चाहास्यान, आव नीम सेवक आगुल; 27 अदिक जो नीम दा प्रधान आगोद चाहासतान, आव नीम दास आगुल; 28 ह्यांग कि मंळसा अन पार; ना इदुरसाटी बंदिदील कि आऊन स्यावा माळकु आगुल, लेकीन इदुरसाटी बंदान कि खुद स्यावा टहल माळ सकुल, अदिक हापाळ लॉकुर्द छुटकारा साटी तान जीव कोळ सकुल.”

29 याग यीशु अदिक आऊन चेलागोळ यरीहो नगर टु होळोर, रा ऊंद धोळ्द भीळ आऊन हिंद आगेत. 30 अदिक येढ्ढ कुढ्ढगोळ, जो हादी इन किनारा मा कुर्तकु ईरोर, ईद केळकु कि यीशु होगेत्यान, हेसुर ताकोमकु अनली कुरतुर, “हे प्रभु, दाऊद उन औलाद, नाम मा दया माळ.”

31 लॉकुर आंदरी दनकुसदुर कि सुंगा ईरूल; पर आंदुर मात्‍त जोर देल चिळ्लासकु अंदुर, “हे प्रभु, दाऊद उन औलाद, नाम मा दया माळ.”

32 आग यीशु निदुरकु, आंदरी कारदुन अदिक अंदुन, “नीव येन चाहासतीर कि ना नीम साटी माळाईन?”

33 आंदुर यीशु उक अंदुर, “हे प्रभु, ईद कि नाव कण्णगोळ देल नोळ सक्‍केव.”

34 यीशु दया माळकु आंदुर कण्णगोळी मुटदुन, अदिक आंदुर तुरन्त नोळली कुरतुर, अदिक आऊन हिंद आगेदुर.