मत्ती.
10.
बाक यीशु तान हन्नेळ चेलागोळी तान हात्‍ती कारदुन, आंदरी दुष्टआत्मागोळ मा अधिकार कोट्टुन कि अवरी तेगुल अदिक सप्पा प्रकार ईनव बिमारगोळ अदिक सप्पा प्रकार ईनव कमजोरीगोळी अक दुर माळुल. 
इंदुर हन्नेळ प्रेरितगोळ्द हेसुर हिंग आव: पयला शमौन, आऊक पतरस भी अनतान, अदिक आऊन वार्ट अन्द्रियास; जब्दी इन पार याकूब, अदिक आऊन वार्ट यूहन्ना; 
फिलिप्पुस, अदिक बरतुल्‍मै, थोमा, अदिक कर ताकोमावाळा मत्ती, हलफई नव पार याकूब, अदिक तद्दै, 
शमौन कनानी, अदिक यहूदा इस्करियोती याव यीशु उक ध्वाका देल हुळसुस बुटीदुन. 
ई हन्नेळ प्रेरितगोळी यीशु आग्या कोटकु कळुदुन: “गैरयहूदीगोळ दी होगबाळेतीर, अदिक सामरीगोळ्द यात्‍तोदु नगर दा प्रवेश माळबाळेतीर. 
लेकीन इस्त्राएल इन घराना अन्द अच काळ्द म्यांडागोळ्द हात्‍ती होगेतीर. 
अदिक नळुत-नळुत ईद प्रचार माळी: कि ‘स्वर्ग अन राज्य हात्‍ती होट बंदाद.’ 
बिमारगोळी चंगा माळी, सोद्द मंळसागोळी जित्‍ता माळी, कोढ़ी मंळसा अक शुद्ध माळी, दुष्टआत्मागोळी तेगी. नीमी फुकट दा सिक्याद, नीव भी फुकट दा वाटसी. 
तान खिसा दा ना रा व्हान्ना, अदिक ना बेळ्ली, अदिक ना तांबा ईटेतीर; 
हादी इन साटी ना झ्वारा, ना दुसरा कुळता, ना जुता अदिक ना कोल हुडी, यतिकी क्याल्सा माळावाळा मजदूर उक आऊन मजदूरी सिक पायजे. 
“येल्यारा यातोदारा नगर या ऊरा दा होगी, रा पता हची कि अल याव लायक आन. अदिक यागासताका अल टु होळालीर, अदा मान्या ईरेतीर. 
मान्या प्रवेश माळाहोती आऊक आशीष कोळेतीर. 
अगर आ मान्या नोर लॉकुर योग्य ईतीदार रा नीम आशिर्वाद आंदुर ताका पोहचुसीत, लेकीन अगर आंदुर योग्य ईला इतीदार रा नीम आशिर्वाद नीम हात्‍ती वापस होट बंदीत. 
जो यावारा नीमी ग्रहण माळतीदील अदिक नीम मात केळतीदिल, आ मान्ना या आ नगर टु होळावती तान काल इन धुळा झाळ्स बुळी. 
ना नीम से खरा माताळतीन कि न्याय इन दिन आ नगर इन दशा से सदोम अदिक गमोरा अन्द द्याश इन दशा यक्कुल सहन माळा लायक ईत्‍तीत. 
“नोळी, ना नीमी म्यांडागोळ घाई लांडग्यागोळ न्याड्या कळुतीन, इदुरसाटी हावगोळ घाई बुद्धिमान अदिक कबूतरगोळ घाई भोला बन्सी. 
लेकीन लॉकुर से सावधान ईरी, यतिकी आंदुर नीमी महासभागोळ दा सोपस्यार, अदिक तान पंचायतगोळ दा नीमी क्वाळा देल बळदार. 
नीव नान साटी हाकिमगोळ अदिक राजागोळ मुंद आंदुर मा, अदिक गैरयहूदीगोळ मा गवाह आगोर साटी पोहचुस्कु आदीर. 
याग आंदुर नीमी हुळसुस्यार रा ईद चिन्ता माळबाळेतीर कि नाव याता रीति देल या येन अंदेव, यतिकी जो येनारा नीमी अनोद ईत्‍तीत, अद अदा घळी नीमी हेळकु आदीत. 
यतिकी माताळावाळेर नीव आल्लच, लेकीन नीम स्वर्गीय आप्प उन आत्मा नीम दा माताळतद. 
“वार्ट, वार्ट उक अदिक आप्प पार उक, कोन्नोर साटी सोपस्यार, अदिक चिकोर मोय-आप्पुर विरोध दा यदकु आंदरी कोन्सुस बुट्टार. 
नान हेसुर इन कारण सप्पा लॉकुर नीम से दुश्मनी माळ्यार, लेकीन जो आखरी ताका धीरज हुडुकु ईत्‍तान आऊंदा उद्धार आदीत. 
याग आंदुर नीमी ऊंद नगर दा सतुस्यार, रा नीव दुसरा दी ओळेगेतीर. ना नीम से खरा माताळतीन, नीव इस्त्राएल इन सप्पा नगरगोळ दा होगा से पयले अच मंळसा अन्द पार होट बंदान. 
“चेला तान गुरु से धोड्डेव ईरालुन; अदिक न दास तान स्वामी से. 
चेला तान गुरु अक अदिक दास तान स्वामी इन बराबर आगोद अच काफी आद. याग आंदुर मान्ना अन स्वामी इक शैतान अंदुर रा आऊन मान्नावाळेर इक येन येनारा अनतीदिल! 
“इदुरसाटी मंळसागोळ से अंजबाळी; यतिकी येनारा होचकु हैलेच जो तेर्दकु आगतीदील, अदिक न येनारा रहस्यमय आद जो प्रगट आगतीदील. 
जो ना नीम से अंधार दा अनतीन, अद नीव ऊजुळ दा अनी; अदिक जो ना नीम किव दा अंदीन, अदरी नीव आळा मा टु प्रचार माळी. 
आंदुर से अंजबाळी जो मय इक नुकसान माळतार, लेकीन आत्मा अक नुकसान माळ सकालुर; लेकीन परमेश्वर से अच अंजी, जो आत्मा अदिक शरीर येढ्ढु नरक दा नष्ट माळ सकतान. 
येन ऊंद पैस्या दा येढ्ढ चिमणी पक्षी मारालव? तरी भी नीम आप्प उन इच्छा अन्द अलावा अऊर दा टु ऊंद भी धरती मा बिळसकाल. 
नीम ताल्ला अन चुट्टी भी सप्पा आळुकु आव. 
इदुरसाटी अंजबाळी; नीव हापाळ चिमणीगोळ से भी बार्र आईर. 
“जो यावारा मंळसागोळ मुंद नानी मान्स कोंडान, आऊक ना भी तान स्वर्गीय आप्प उन मुंद मान्स कोमाईन. 
लेकीन जो यावारा मंळसागोळ मुंद नान इनकार माळ्यान, आऊक ना भी तान स्वर्गीय आप्प उन मुंद इनकार माळाईन. 
“ईद सम्सबाळी कि ना धरती मा शांती तरली बंदीन; ना शांती तरली ईला, पर तलवार नळसोर साटी बंदीन. 
ना रा बंदीन कि: ‘पार उक आऊन आप्प उन से, अदिक पोर इक आकिन मोय इन से, अदिक सास्सा अक आकिन आत्‍ता से ब्यार्र माळ कोमाईन; 
मंळसा अन्द दुश्मन आऊन मान्या अन लॉकुर अच ईत्‍तार.’ 
“जो तान मोय या आप्प उक नान से यक्कुल प्रिय जान्सतान, आव नान लायक हैलेच; अदिक जो तान पार या पोर इक नान से यक्कुल प्रिय जान्सतान, आव नान लायक हैलेच; 
अदिक जो तान क्रूस नेगुकु नान हिंद नळालुर आंदुर नान लायक हैलेच. 
जो तान जीव ऊळसोद चाहास्यान, आव अदरी खोऊस्यान; अदिक जो नान कारण तान जीव खोऊस्यान, आव अदरी हासिल माळ्यान. 
“जो नीमी ग्रहण माळतान, आव नानी ग्रहण माळतान; अदिक जो नानी ग्रहण माळतान, आव नानी कळावाळा अक ग्रहण माळतान. 
जो भविष्यवक्ता अक भविष्यवक्ता जान्सकु ग्रहण माळुल, आव भविष्यवक्ता अन प्रतिफल हासिल माळ्यान; अदिक जो न्यायी इक न्यायी जान्सकु ग्रहण माळुल, आव न्यायी इन प्रतिफल हासिल माळ्यान. 
जो यावारा ई स्याणेर दा टु ऊंद मंळसा अक नान चेला जान्सकु सिर्फ ऊंद वाटी नीर कुळस्यान, ना नीम से खरा माताळतीन, आव यातोदु रीति देल तान प्रतिफल खोऊसतिदिल.”