इफिसिगोळ.
6.
हे चिकोरगोळा, प्रभु दा तान मोय-आप्प उन आग्याकारी बन्सी, यतिकी ईद उचित आद. 
“तान मोय अदिक आप्प उन आदर माळ ईद पयला आग्या हुन यदुर सांगुळ वादा भी आद. 
कि अपमान भला आगुल, अदिक नी पृथ्वी मा हापाळ दिन ताका जित्‍ता ईर.” 
हे चिकोरवाळेरा, तान चिकोर इक गुस्सा तरगोळबाळी लेकीन प्रभु उन शिक्षा अदिक चेतावनी कोळतेला आंदुर्द पालन-पोषण माळी. 
हे दासगोळा, जो लॉकुर ई दुनिया दा नीम स्वामी आर, तान मन इंद सही देल अंज्क अदिक नळ्गतेला, ह्यांग मसीह अन्द हांगा आंदुर्द भी आग्या मान्सी. 
मंळसागोळी खुश माळावाळेर घाई तोरसोर साटी स्यावा माळबाळी, लेकीन मसीह अन्द दासगोळ घाई अंतर आत्मा देल परमेश्वर उन इच्छा मा नळी, 
अदिक आ स्यावा अक मंळसागोळ्द ईला लेकीन प्रभु उन स्यावा जान्सकु खरा मन देल माळी. 
यतिकी नीव जान्सतीर कि हर मंळसा ह्यांगारा वळ्लीद क्याल्सा माळ्यान, या रा दास ईरूल या रा स्वतंत्र, प्रभु से हांगा हासिल माळ्यान. 
हे स्वामीगोळा, नीव भी धमकीगोळ कोळव बिटकु आंदुर सांगुळ हांग अच व्यवहार माळी; यतिकी नीव जान्सतीर कि आंदुर अदिक नीम येढ्ढु मुंदुरव स्वामी स्वर्ग दा आन, अदिक आव यारदु पक्षपात माळालुन. 
इदुरसाटी प्रभु दा अदिक आऊन शक्ति इन प्रभाव दा ताकतवर बन्सी. 
परमेश्वर उन सप्पा हथियार हाक्‍क बुळी कि नीव शैतान उन युक्तिगोळ मुंद निदुरकु ईर सकीर. 
यतिकी नाम्द ईद मल्लयुद्ध रक्ता अदिक मास देल ईला लेकीन प्रधानगोळ देल, अदिक अधिकारीगोळ देल, अदिक ई दुनिया अन अंधकार इन शासकगोळ देल अदिक आ दुष्टता अन्द आत्मिक सेनागोळ देल आद जो आकाश दा आव. 
इदुरसाटी परमेश्वर उन पुरा हथियार कट कोमी कि नीव बुरा दिन दा सामना माळ सकी, अदिक सप्पा येनारा पुरा माळकु संची ईर सकी. 
इदुरसाटी सच्चाई देल तान नेळु कसुसकु, अदिक न्यायीपन इन कवच हाक्‍कु, 
अदिक कालगोळ दा मेल इन खुशखबरी इन तयारी इन जुता हाक्‍कु; 
अदिक ई सब मुंदुर सांगुळ विश्वास इन ढाल हुडुकु स्थिर ईरी यदुर देल नीव आ दुष्ट इन सब होततेला तीरगोळ इक नुनाक सकी. 
अदिक उद्धार इन टोप, अदिक आत्मा अन्द तलवार, जो परमेश्वर उन वचन हुन, ग्रहण माळकोमी. 
हर समय अदिक हर प्रकार देल आत्मा दा प्रार्थना, अदिक विनती माळतेला ईरी, अदिक इदुरसाटी जाग्सतेला ईरी कि सब पवित्र लॉकुर्द साटी लगातार विनती माळतेला ईरी, 
अदिक नान साटी भी कि नानी माताळोद समय हिंग प्रबल वचन कोटकु आगुल कि ना साहस इन सांगुळ खुशखबरी इन भेद खोलसोद कार्य माळ सकाईन, 
ई खुशखबरी इन खातिर ना शंकली देल जकळुसकु राजस्वर्गदूत हुईन; हालाकि ईग ना जयल दा आईन. प्रार्थना माळी कि ना खुशखबरी इन बारा दा माताळली साहसी आग सकतीन ईद जरूरी आद जसा कि ना आईन. 
तुखिकुस, जो प्रिय वार्ट अदिक प्रभु दा विश्वासयोग्य सेवक आन, नीमी सब मातगोळ हेळ्यान कि नीव भी नान दशा जान्सी कि ना ह्यांग ईरतीन. 
आऊक ना नीम्द हात्‍ती इदुरसाटी कळुदीन कि नीव नाम्द दशा अक जान्सी, अदिक आव नीम्द मनगोळ इक शांती कोळुल. 
परमेश्वर आप्प अदिक प्रभु यीशु मसीह अन्द दी टु वार्टुरी शांती अदिक विश्वास सहित प्यार सिकुल. 
जो नाम्द प्रभु यीशु मसीह टु खरा प्यार ईटतार, आ सब मा अनुग्रह आगतेला ईरूल.