फिलेमोन उन हेसुर पौलुस प्रेरित उन चिट्ठी.
1.
पौलुस उन दी टु जो मसीह यीशु उन कैदी आन, अदिक वार्ट तीमुथियुस उन दी टु नाम प्रिय सहकर्मी फिलेमोन, 
अदिक आकतींग अफफिया, अदिक नाम संगी योद्धा अरखिप्पुस अदिक फिलेमोन उन मान्ना अन्द मंडली नव हेसुर: 
नाम आप्प परमेश्वर अदिक प्रभु यीशु मसीह अन्द दी टु अनुग्रह अदिक शांती नीमी सिक्त ईरूल. 
वार्ट फिलेमोन, ना हमेशा परमेश्वर उन धन्यवाद माळतीन, अदिक तान प्रार्थनागोळ दा भी नीनी याद माळतीन, 
यतिकी ना नीन आ प्यार अदिक विश्वास इन चर्चा केळतीन, जो सप्पा परमेश्वर उन पवित्र लॉकुर सांगुळ अदिक प्रभु यीशु मा आद. 
ना प्रार्थना माळतीन कि खुद विश्वास दा नीन सहभागी आगोद, नीम सप्पा भलाई इन पयचान दा, मसीह अन्द साटी प्रभावशाली ईरूल. 
यतिकी हे वार्ट, नानी नीन प्यार देल हापाळ खुशी अदिक शांती सिक्याद, इदुरसाटी कि नीन द्वारा परमेश्वर उन पवित्र लॉकुर्द मन वळ्लेव आगेग्याव. 
इदुरसाटी अगर नानी मसीह दा हापाळ साहस आद कि जो मात ठीक आद, अदुर आग्या नीनी कोळाईन. 
तरी भी ना बाट्ट पौलुस उक जो ईग मसीह यीशु उन साटी कैदी आईन, ईद मात्‍त वळ्लीद जान्सकु आत कि प्यार देल विनती माळाईन. 
ना तान चिग्द उनेसिमुस उन साटी, जो नान देल नान बंधन दा पैदा आग्यान, नीन से विनती माळतीन. 
आव रा पयले नीन येनु क्याल्सा नव ईला ईरोन, लेकीन ईग नीन अदिक नान येढ्ढु मुंदुर्द हापाळ क्याल्सा नव आन. 
आऊका मतलब जो नान दिल इन तुकळा हुन, ना नीन हात्‍ती वापस माळ बुटीन. 
आऊक ना तान हात्‍ती इच ईटोद चाहासीन कि आव नीन दी टु ई बंधन दा जो खुशखबरी इन कारण आन, नान स्यावा माळुल. 
लेकीन ना नीन इच्छा अन्द बगेर येनु भी माळोद चाहासीदिल, कि नीन ईद कृपा दबाव देल ईला लेकीन इच्छा देल आगुल 
यतिकी शायद आव नीन से थ्वाळासा दिन साटी ईदा कारण अलग आदुन कि हमेशा नीन हात्‍ती ईरूल. 
लेकीन ईगी टु दास उन घाई ईला उलटा दास से भी वळ्लेव प्रिय वार्ट उन घाई, मतलब ना रा आऊन से प्यार माळतीन, लेकीन नीव आऊक मंळसा अन नाता देल अदिक प्रभु उन नाता देल नान से यक्कुल प्यार माळी. 
इदुरसाटी अगर नी नानी तान सहभागी सम्सत्या, रा आऊक ईत्‍ता प्रकार देल ग्रहण माळ ह्यांग नानी माळत्या. 
अगर आव नीन येनारा नुकसान माळ्यान, या आऊन मा नांद येनारा कर्ज बरतद, रा नान हेसुर मा लिख्स कोम. 
ना पौलुस तान कय देल लिख्सतीन कि ना खुद तुम कोळाईन; अदिक ईद अनोद येनु जरवत हैलेच कि नान कर्जा जो नीन मा आद आव नी अच हुय. 
हे वार्ट, ईद खुशी नानी प्रभु दा नीन दी टु सिक्याद. मसीह दा नान जीव इक हिरवा-गार माळ बुळ. 
ना नीन आग्याकारी आगोद भरोसा ईटकु नीनी लिख्सतीन, अदिक ईद जान्सतीन कि जो येनारा ना अनतीन, नी नान से यक्कुल माळ्या. 
अदिक ईद भी कि नान साटी ठहरूसोद जागा तयार ईट. नानी आशा आद कि नीम प्रार्थनागोळ द्वारा ना नीमी कोटकु आगेगाईन. 
इपफ्रास, जो मसीह यीशु दा नान सांगुळ कैदी आन, 
अदिक मरकुस अदिक अरिस्तर्खुस अदिक देमास अदिक लूका जो नान सहकर्मी आर, ईंदुर्द नीनी नमस्कार. 
नाम प्रभु यीशु मसीह अन्द अनुग्रह नीम आत्मा मा आगतेला ईरूल. आमीन.