यूहन्ना अन्द दुसरा चिट्ठी.
1.
नानी स्याणा दी टु आ निवळुस्द आर्तेर अदिक आंदुर्द चिकोरगोळव हेसुर, यार से ना खरा प्यार ईटतीन, अदिक सिर्फ ना अच ईला उलटा आंदुर सप्पा मुंदुर भी प्यार ईटतार जो सच्चाई इक अरूतार; 
अद सच्चाई जो नाम दा स्थिर ईरतद, अदिक हमेशा नाम सांगुळ अटल ईत्‍तीत; 
परमेश्वर आप्प, अदिक आप्प उन पार यीशु मसीह दी टु अनुग्रह अदिक दया अदिक शांती, सच्चाई अदिक प्यार इन सांगुळ नाम सांगुळ ईत्‍ताव. 
ना हापाळ खुश आदीन कि ना नीन थ्वाळासा चिकोर इक आ आग्या अन्द अनुसार, जो नामी आप्प उन दी टु सिकीत, सच्चाई मा नळुतेला सिक्त. 
ईग हे आर्त, ना नीनी ईग यातोदु व्हाशोद आग्या ईला, लेकीन अदा जो पयले टु नाम हात्‍ती आद, लिख्सतीन; अदिक नीन से विनती माळतीन कि नाव आबुर दाबुर से प्यार ईट्टेव. 
अदिक प्यार ईद हुन कि नाव आऊन आग्या अन्द अनुसार नळदेव; ईद अदा आग्या हुन जो नीव पयले टु केळीर, अदिक नीमी इदुर मा नळुली भी पायजे. 
यतिकी हापाळ सा हिंग बैकुसावाळेर दुनिया दा होटकु बंदार, जो ईद मान्सालुर कि यीशु मसीह मय दा टु होटकु बंदान; बैकुसावाळा अदिक मसीह-विरोध माळावाळा ईवा हुन. 
तान बारा दा सावधान ईरी, कि जो मयनत नाव माळेव अद नीम से काळुबाळुल, उलटा अदुर सप्पा प्रतिफल नीव ताकोमी. 
जो यावारा मसीह अन्द शिक्षा देल मुंद वाळुसेगतान अदिक अदुर दा बन्सकु ईरालुन, आऊन हात्‍ती परमेश्वर हैलेच; जो यावारा आऊन शिक्षा दा स्थिर ईरतान, आऊन हात्‍ती आप्प भी आन अदिक पार भी. 
अगर यावारा नीम हात्‍ती बरतान अदिक ईदा शिक्षा कोळालुन, आऊक ना रा मान्या बरगोळी अदिक ना नमस्कार माळी. 
यतिकी जो यावारा ईत्‍ता मंळसा अक नमस्कार माळतान, आव आऊन बुरा क्याल्सागोळ दा सहभागी आगतान. 
नानी हापाळ सा मातगोळ नीमी लिख्सव आव, लेकीन कागद अदिक स्याही देल लिखसोद चाहासालीन, लेकीन आशा आद कि ना नीम हात्‍ती बराईन अदिक आमने-सामने मातकात हेळाईन, यदुर देल नीम खुशी पुरा आगुल. 
नीन निवळुस्द आकतींग इन चिकोर नीनी नमस्कार अनतार.