An dhutsadh úw xi abtsin an Ebreotsik.
1.
Ti wejeꞌich, na Dios in tawnámal yáníl ni wejeꞌ pakéliltsik ani kʼeꞌetich kʼeꞌetich xan tin tawnámal kʼal nin tʼiltsíxiltsik. 
Xoꞌ, tin okʼontal jechéꞌ a kʼij, tu tawnál kʼal nin Chakámil. Na Dios in tʼajaꞌ an kʼayꞌlátsik kʼal tin kwenta jechéꞌ nin Chakámil ani Jajáꞌ in jiltsámal xowaꞌkich xi waꞌach. 
Na Jesús jaꞌich nin tajax labidh tʼokát na Dios ani tu xalkʼantsalich xan ti jeye na Dios. Jajáꞌ, jaꞌich nin teykóm ejtal xowaꞌ waꞌach kʼal nin cháp nin káwintal. Tam ti okʼon ti ku wixkʼintsi an ti walastalábil, buxkan tin eját nin tʼokat kʼwajtalábil na Dios túꞌ walkʼiꞌ. 
Nin Chakámil na Dios in bajaw ka kʼwajay más ultaláb ké an tʼokat abatwáletsik; pos Jajáꞌ, kom u Chakámláb kʼal a Dios, in bachʼúmal jun i awiltaláb más púlek ké an tʼokat abatwáletsik. 
Na Dios yab jaykʼi in utsámal ni jun i tʼokat abatwále xan tin utsaꞌ na Kristo enchéꞌ: Tatáꞌ tu Chakámil; Nanáꞌ tu utsámalich xoꞌ abal tu Chakámil; nibal in ulúmal jaykʼi enchéꞌ kʼal tin kwenta jun i tʼokat abatwále: Nanáꞌ neꞌech kin kʼwajay tin Tátaꞌláb abal jajáꞌ ani jajáꞌ neꞌech ka kʼwajay ti chakámláb kʼal Nanáꞌ. 
Por tam ti na Dios in xalkʼaꞌ nin okʼox Chakámil ban kʼayꞌlá, in ulu enchéꞌ: Ka kʼakʼná kʼal ejtal nu tʼokat abatwálejiltsik. 
Kʼal tin kwenta an tʼokat abatwáletsik, na Dios in ulu enchéꞌ: U tʼajál ke nu tʼokat abatwálejiltsik, ka wenkʼon jelti ikʼ ani nu tʼójontsixiltsik, ka wenkʼon jelti kʼamal. 
Por kʼal tin kwenta nin Chakámil, in ulal enchéꞌ: Dios, Tatáꞌ neꞌech ta takʼix malilíl i kʼij; ani Tatáꞌ in lujtalkʼi i takʼix. 
A kʼanidhámal xi lujat ani a pojkámal xi yab alwaꞌ; jaxtám na Dios, na Diosil ti takwyámal Tatáꞌ ani ti pidhámal taꞌ más ti kʼijidhtaláb ké na juniktsik. 
In ulal jeye enchéꞌ: Tatáꞌ Okʼóxláb, tam ti tujey ejtal, a kʼwajbaꞌ nin tujtal an chabál ani kʼal na kʼubak ta tʼajaꞌ ejtal an walkʼiꞌ. 
Jechéꞌtsik neꞌech ka okʼon, por Tatáꞌ neꞌech ki jilkʼon malilíl i kʼij. Ejtal jechéꞌtsik, neꞌech ka kʼejmé jelti kʼudhkʼum; 
neꞌech ka pakaꞌ ani neꞌech ka jalkʼuy jelti jun i xeketláb. Por Tatáꞌ, malilíl i kʼij yab i jalkʼunal ani yab jaykʼi neꞌech ka kóꞌoy a okʼontal. 
Na Dios, yab jaykʼi in utsámal ni jun i tʼokat abatwále xan tin utsaꞌ na Kristo enchéꞌ: Ki buxkan tu eját, asta ke Nanáꞌ tu átantsi ejtal xi ti atʼál. 
Ejtal an tʼokat abatwále, i ejattalábkʼitsik, xi kʼwajat ti tʼójontsix ta Dios, abadh abal kin tolmiytsik xi neꞌech kin bachʼu an loꞌeltaláb.