1 Naie facaise jaɨenicɨ cuena daje ille acatate. Nainomo ite jɨnui jiruamona comɨnɨna jaca itataite. Uifɨnide. Jusiñamui, Llauda isoidɨmɨe dɨga, illanomona tote. 2 Nanoca naɨso motodo tote. Nagafebelle dɨne jaca itataite amenaɨaɨ ite. Naga fɨvui llɨsillamona, naga fɨvui llɨsilla ite. Ie ibiaɨ illamona, comɨnɨ caɨmare marena itɨmacɨ. 3 Jeacɨno nainomo iñena jira, Jusiñamui jaca buna duere fɨnoñeite. Jusiñamui, Llauda isoidɨmɨe dɨga illamona, naimɨe comɨnɨ naimɨena jaca sedaitɨmacɨ. 4 Naimɨena marefodo cɨoitɨmacɨ. Naimɨemo naimacɨ duillamona, naimacɨ uiecuaɨ itofiaɨmo naimɨe mamecɨ cueite. 5 Nainomo naɨonadɨ iñeite. Lamparína jitaiñeitɨmacɨ. Jitomana jitaiñeitɨmacɨ. Caɨ Nama Jusiñamui naimacɨna llɨgaiñoite. Illaɨcomɨnɨ isoi jaca iitɨmacɨ.

6 Jaɨenicɨ cuemo llote:

—Bie lluacɨnodɨ uanaicɨno. Naimɨe facaina lloraɨnɨmo ie rafuena llollena, ie uaina itatate. Naimɨena ɨɨnotɨnona ɨco suille rafuena ja uiñotaiacade. 7 “Raɨre biitɨcue” Cristo llote.

Bie rabenicomo ite ɨco suille rafuena ɨɨnotɨnodɨ caɨmare iitɨmacɨ.

8 Juandɨcue. Bie rafuena cacadɨcue. Iena cɨodɨcue. Iena cue cacaja mei, iena cue cɨua mei, iena cuemo acataga jaɨenicɨ uicomo ana bɨtadatɨcue. Naimɨena sedaacadɨcue; 9 iadedɨ cuemo llote:

—Dama ite. Cuena sedañeno. O dɨga, naimɨe facaina lloraɨnɨ isoi, bie rabenicomo ite llogacɨnona ɨɨnotɨno isoi, naimɨe dɨbeimo jɨaɨ maɨjɨdɨcue. Dama Jusiñamuina seda. 10 Bie rafue suillɨrui iaɨrei illa jira, iena jino llono. Iena uiñota. 11 Bie rafuena bu ɨɨnoñenia, naimɨe jitailla jira, maraiñede rafue naimɨe fɨnoacania, iena nia fɨnoite. Jearede rafue bu fɨnoacania, iena nia fɨnoite; ia bie rafuena naimɨe ɨɨnoia, naimɨe jitailla jira, mare rafue naimɨe fɨnoacania, mare rafuena fɨnocana jailla. Jusiñamui jitaillacɨnona bu fɨnoacania, naimɨe jitaillacɨnona nia fɨnocana jailla.

12 Jesucristo cuemo llote:

—Ero, raɨre biitɨcue. Naimɨe fɨnoca rafue dɨese nagamɨemo ɨbana fecaitɨcue. 13 Jaca bue nia iñenia, jaie jaca itɨcue. Nana rana fɨnodɨcue. Nana ra cue uaido icana jaide. Nana rana fuilla mei, jaca iitɨcue. Jaca siño jitodɨcue. 14 Naimacɨ ɨniroina naimacɨ jocoia, caɨmare iitɨmacɨ. Naimacɨ comecɨna ñaɨtɨcue. Ie jeacɨnona oni dotacamɨe jaca itataite amena llɨsillamona lliite. Cue comɨnɨna naimɨe illamona, Jusiñamui illanomo ie nasedo jaicabite; 15 ia naimacɨna jeacɨnona naimacɨ faɨnonocaiñenia, Jusiñamui illanomo maraiñede rafuena fɨnocabidɨno, aima dɨne jaicabidɨno, aɨñede rɨño dɨga icabitɨno, ɨniñede ɨima dɨga icabitɨno, comɨnɨna meinetɨno, jiraraɨna sedacabidɨno, tainona llocabitɨno duiñeitɨmacɨ. 16 Creyentiaɨna bie rafuena uiñotallena, cue jaɨenicɨ o dɨne jai oretatɨcue. David mɨcorɨ ie jitodɨcue. Monairaɨcudu bairia isoi, Jusiñamui jitaillacɨnona cue fɨnollena, baireitɨcue —llote.

17 Bie facaise Jusiñamui Joreñodɨ, Cristo jai oga aɨ railla comɨnɨ dɨga, naimɨena nia ɨɨnoñedɨnona uaidote:

—Bie rafuena mai cacarei. Iena mai ɨɨno. Iena bu ɨɨnoia, jɨaɨmɨemo iena lluai: Iena mai cacarei. Iena mai ɨɨno.

Jiroacadɨmɨemo llotɨcue:

—Mai jiruaɨbi. Bie jɨnua raifiñede. Biena o jiroacania, jaca iitɨo. Iese llotɨcue; ia ie comecɨna ñaɨtɨcue. Bie rafue ɨɨnuana ñaɨtɨcue. 18 Bie ɨco suille rafue ite rabenicona bu facajia, naimɨemo rafuena lloiacadɨcue. Bie rafue baɨfemo bu lloia, bie rafuena bu meidoia, bie rabenicomo ite duere fɨnuacɨno isoi, Jusiñamui naimɨena duere fɨnoite. 19 Bie rafuena bu jamaia, Jusiñamui naimɨena duere fɨnoite. Jaca illena Jusiñamui ie mamecɨna ie rabenicona jaca cueñeite. Comue Jerusalémo jaca duiñeite. Naiena jai llotɨcue.

20 Cristo raite:

—Bie rafue jaca suite. Ua raɨre biitɨcue.

Iena raɨre suillena jɨaɨ jitaidɨcue. Caɨ Nama Jesús raɨre billena eo jitaidɨcue. 21 Naimɨe duenaillacɨnona nana Jesucristona ɨɨnotɨno uiñocana jaillana jitaidɨcue. Macaɨbaite. Juandɨcue.