IBA GANA.
37.
Mini kowi karume birago hondowa tí mini dege dindi nahalimu. Tigua bira larago hale howabi ti biradagua bua nahalimu. 
Irane ti tani gau laralidagua emene howa gau lolebira. Uruni ti gaeangi tomo gau laralidaguaore gau lalu ereba holebira. 
Anduane Homogoni hanaho howa mana bayale bialu halimu. Ani birimiyagua tínaga pabe tigila Anduane Homogo ibuni kagola tí ibuha bayale holeberemi. 
Turu holene Anduane Homogohayagi hai bialu halimu. Ani birimiyagua ibugua tínaga gubalinime hameledami aleru ngulebira. 
Í̠ni Anduane Homogoha hanaho habe. Ani kegola ibugua í̠ biamogo bulebira. 
Í̠na mini tigabiwi howa mana bayale bigi bereruni wali agalime de handai helo horombe hanuni ni dedagola wá haame haralidagua helo wále ibugua ani mo helolebira. 
Anduane Homogo ibugua bule ngago bilo í̠ ema nabi hondo habe. Maru ti ho timbu halu ho yanga laragola í̠ mini dege dindi nahabe. Mini kowi karume ko bule lo manda bu heneru bigi birago hondowa í̠ mini dege dindi nahabe. 
Mini dege dindi holene ngagolabi keba holene ngagolabi mogo nalabe. Urunime genda dege yu anda ibaga. 
Mini kowi karu ti bo batagi halu Anduane Homogoni hanaho karume dindi karulolebira. 
Emene howa mini kowi karu ereba haiore holebira. Ti kabe hondole hagadagoria hai birimiyaguabi handa walia nahe ereba ho waore holebira. 
Tini mo dindiha howa deme handagabu karume dindi ogoni karulolebira. Mo palia holene ti karula howa mbirale dewa turuho wu holebira. 
Mini kowi karume mini tigabiwi karu mo ko holenaga ndi nde lalu handabe manga howa ne gengero lalu ka. 
Ani bialu helowa Anduane Homogohanda mini kowi uruni handaya howa oba halu ka. Tinaga homo ereba holene horo hapara harago hondowa ibu oba halu ka. 
Mini kowi karume yagibanorubi buru pale darabi karubi dibule ayu tibu gililomi bogole danda edaha bira. Mana tigabi biaga karu bo wahole ani bialu ka. 
Tigua ani bialu karia tininaga ayu tibu yidago yamuwa tini bo wahalu danda edaho ngaru minu podo waholebira. 
Mini kowi karume dabudabu dewa bu hombedo wu karuni galone nabulene lowa mini tigabiwi karume mbirale emene wu kago baya galoneore wu ka. 
Ogoni irane Anduane Homogo ibugua mini kowi karunaga hongo mo ereba hai halu mini tigabiwi karu ibunime handaya ho holebira. 
Anduane Homogo ibugua ibunaga bi larago hale halu biaga karu ibunime handaya ho haabo halu dindi ogoni tinagaore wiaabo helolebira. 
Mo ko holene wigi bidangi ti tandaga nanolebira. Hina gari birangibi ti nolene karulape wulebira. 
Ani wulebiragoyu mini kowi karu ti homolebira. Anduane Homogonaga waitigi karu balawaya minana anda hene mbira dedaligobi dowa gilope halu ereba haralidagua ti ereba holebira. Ira hagua pu ereba haralidagua ereba holebira. 
Mini kowi kagome mbirale dano howa yadai nabi nalu puabo haga. Bayale biaga kagome ibunaga mbirale ngaru habua nabi mo guaila howa tale biaga. 
Anduane Homogohanda mo turu hene karume dindi karulolebira. Ibugua ha hene karu ti bo batagi holebira. 
Anduane Homogohanda wali agali hangu hanguhondo hariga ogodagua pobe lalu walia haga. Ibu turu helo hangu biaga kagonaga pabe tigila Anduane Homogo ibuni holebira. 
Uruni ti pilope hayaguabi pilo ibiraho wiaabo naholebira. Anduane Homogo ibunime ti gini mialu lone mo heya ho helolebira. 
I̱ igirini howa hama ibalu ai áyu agali waheore kogoni. Henego manda berogola áyu agima ndogo luore haruda manda bido. O hama ibiwadagoriani howa handalu hewaria wali agali mini tigabiwi hearu mbira Anduane Homogohanda yu wanahayane handaru. Tinaga waneiginibi ti hina noa howa mendeali hina nayago tagamini handadeho heariabi heba nahende dege haru. 
Tigua tinaga mbirale karulape wuwa maru buru pale haga bidaru turu halu talebu migi biaga. Ti waneigini baya bu karu hondowabi ibuni turu ho haga biaga. 
Ko bulene erembira mialu mana bayale bilimu. Ani birimiyagua tínaga aguanenerume dindini luore haabo holebira. 
Anduane Homogo ibu mana bayale bulene gubalini haga kagome wali agali ibuhondo mini bilinahe karu yu wanahaga ka. Tinaga pabe tigila ibuni haabo holebira. Mini kowi karu tinaga aguaneneru bo batagi holebira. 
Mini tigabiwi karume dindi karulalu ogoriani haho wiaabo holebira. 
Mbirali mini tigabiwi kagonaga ne harigaha howa bi latagi hararu mini gigabiwi howa bi laga. Ibunaga hégeme mana tigabi bulene dege bi latagi haga. 
Ngode Datagaliwabenaga mana lowinigo ibunaga bu miniha mo hengedagome ibu ge gundu lalu pi nalaga. 
Mini kowi kagome mini tigabiwi kago ma yu howa bo wahole manda biaga. 
Ani biagagoyu bo wahelo Anduane Homogohanda yupe naholebira. Godi lalu kariabi ibugua ko bini mbira ngaria handa walia naholebira. 
Anduane Homogoha mini dunu bia ho howa ibugua bibe ledadagua bialu habe. Ani biriyagua ibugua í̠ mo yaraga halu dindi í̠ karulabelo ngulebira. Ani biragola mini kowi karu pani narago í̠ deme handa a̱i̱ ho holebere. 
Bamba mbiru agali mini kowiore ibuni hangu hongohe karulape ko mitangi howa wali agali mo gi halu ge pera bai haga mbira heane hendewane. Lebanono dindini ira tamia mbira luni panigi pudagaho hagadagua agali ogonime maru hearu hengedope howa ibuore pudagaho heane hendewane. 
Mani halu mbiru dindi odagoriani lone bolangua halu pialu hewaria agali odagoni naheya. Kabe hondole i̱na hai bialu hewariabi ibu nahe erebaore hayiya. 
Wali agali mana bayale biaga karu handalimu. Mini tigabiwi karume mana bayale bigi birago handawa bilimu. Mo palia haga karu ti aguanene dewa ho dame bulebira. 
Ko biaga karu aria bibahende homai halu tinaga aguanene bibahendeore homa mundulanda holebira. 
Wali agali mini tigabiwi karu Anduane Homogohanda ti pele mulebira. Gendabi timbuni ngangi ti ibida pialu ha do hagane Anduane Homogo ibuni holebira. 
Anduane Homogohanda ti biamogo bialu gi miaga. Mini kowi karume ti mo ko hole ibirangi ti ibu karia ibida poragola ibugua ti mo wiaga.