IBA GANA.
119.
Wali agali tiha ko mbira nawiore howa tigatigaore ibaga bu karu ti turu ho haga ka. Tigua Anduane Homogonaga bi mana lo ngadagua bialu haga kago ti turuore haga kagoni. 
Wali agali ti Anduane Homogohanda mana urubi bulene nga lene ngaru minime talialu bialu haga karu ti turuore ho haga ka. 
Wali agali urunidagua biaga karu tigua mana ko ngaru nabiaga howa Anduane Homogonaga mana lo ngaru hangu biaga ka. 
Anduane Homogo-o í̠nime inahondo í̠naga bi mana damenego langiai halu lalu, I̱naga bi uruni bayuwa taluwa biaabo halu halimu, larigoni. 
I̱naore mini bilinahe howa í̠naga bi mana ogoni taluwa bialu haabo holenego hamelo ko. 
I̱na í̠naga bi mana taluwa bialu haabo haruyagua i̱ha taga holene emeneorebi mbira nawulebira lo manda bido. 
I̱na í̠naga mana bayale tigabi ngego manda bialu kongi i̱naga bu miniha ko mbira nawi howa í̠naga mini yaraga halu holebero. 
Í̠naga bi mana debene bibahende ngeru taluwa bialu holebero. I̱na ani bialu holiyago í̠na i̱ yu wanahabe. 
Wandari igiri daliaherume tini mo dodo nahe tigabiore agua habehebe. Í̠na ogo bibe lalu laga birigo hale halu bigi biyagua ti tigabi ogonibi holebira. 
I̱naga gubalinioreme Anduane Homogo í̠naga biabe bule bialu ko. Í̠naga bi mana lo ngego mbira i̱na puguligo haru habe. 
I̱na í̠ deni ko mbira nabulenaga í̠naga bi mana lo ngegoni i̱naga gubalinini mo hengedo. 
Anduane Homogo-o í̠naga mini mo yaraga harogo í̠naga hame ngego i̱hondo biawai habe. 
Í̠naga bi mana lo ngego bibahende lone loyane bialu laho wiaabo holebero. 
Dindi daburabu dewaore wu howa turu holenego emene lowa turu timbuniore holenego í̠naga bi lo ngedagua hale halu bulenegoha ngaria handaga bialu ko. 
Ogodaguaore bibe lalu lo ngego bayuwa lo manda biruli. Í̠naga bi mana lawai haragobi mo yule lowa bayuwaore hale halu mitangi bialu haruli. 
Í̠naga bi mana bayale lo ngeru hondowa i̱ turu halu daga laruli. Ogo ale bibe lalu lo ngeru i̱na embeda naholebero. 
Anduane Homogo í̠naga biabe biahaga i̱ kogo í̠na i̱ biamogo bibelo hamelo kogoni. Irane i̱ homa nabi howa í̠naga bi mana ngego baya hangu talialu bialu holiyanaga ani bibe laro. 
Í̠naga mana lowini ngegoha bi bayale heneneore ngago manda biai holiya i̱naga miniha de mo ngala habe. 
I̱ nde dindi ogoriani lu haho wule ndo kogo manda bialu í̠naga bi mana bayale lo ngego i̱naga deni mo do nahabe. 
Horo bibahendengi i̱naga bu minime í̠naga bi mana bayale lo ngeru i̱na talialu buaore howa homalu kogoni ndobe. 
Wali agali mine haga bu karu í̠na ti talialu mo tiga bigi birili. Í̠naga bi mana lowini ngego erembira mialu tinime hameledago ale bima piaga karume ti koha polebira. 
I̱na í̠naga bi mana debene lo ngeru taluwa bialu kogonaga tigua i̱hondo mege bialu bi koru lalu helo nahelabe. 
Agali haguane bu karume mo mogobu howa i̱ bo waholenaga hariga tai bialu karuni helowa i̱na í̠naga bi mana tigabi bayale ngego hangu mitangi bialu lo manda biaabo holebero. 
Í̠naga bi mana tigabi ngeru hangume i̱ mo turu halu haru haabo haga kagoni. Í̠naga bi mana urunime i̱ lawai halu haabo haga. 
Tigua i̱ bope hayagola dindi abaluha padogoni ndobe. Í̠nime bulebero lalu bi lo wiridagua i̱ lone heyuliya mo hongo habe. 
I̱na mana biruru bibahende í̠hondo langiai harugola í̠na nde i̱hondo bi ladai birigoni. Í̠naga mana ngeruni bibahende i̱ lawai habe. 
Í̠naga bi mana ngeruni i̱na manda buliya biamogo beregola i̱na í̠naga bi mana bayale uruni bibahende mitangi biaabo halu holebero. 
I̱naga miniha genda yidogome i̱ dambi kagola kogoni. Í̠nime mo hongo holebero lalu abale langiridagua i̱ mo hongo habe. 
Í̠naga hariga ngego wahalu i̱ pu tara holigo baya hangu handayaho habe. Í̠na i̱hondo mana bayale bialu í̠naga mana tigabi ngeru i̱ lawai habe. 
I̱na í̠naga bi lo ngego taluwa bialu hole lalu bi lo wirugoni. Horo bibahendengi í̠naga bi mana hangu hale halu mitangi bu kogoni. 
Anduane Homogo-o í̠na bi langiriruni talialu biaabo haruli. Mbirale mbirame i̱ mo taga helo nangelabe. 
Í̠na manda bulene dewaore i̱hondo ngirigome i̱na í̠naga bi lareru buaore howa bialu holebero. 
Anduane Homogo-o i̱na í̠naga bi mana taluwa bialu holiya í̠na mana ogoni irane ngaru baya hangu i̱ mo wála habe. 
Í̠naga bi mana baya hangu taluwa bialu holiya galone ngago i̱ garealo ngialu lawai habe. I̱naga miniha í̠nime mo heya haregola i̱na bi mana lo ngago bibahende buaore howa taluwa bialu holebero. 
I̱ í̠naga bi mana taluwa bialu howa turu haga kogonigo ainde í̠naga bi mana bulene hariga pedadagua pialu holiya i̱naga ge baya hangu haru habe. 
I̱naga miniha mbirale ngaru dimagoli ho holiya ndo í̠naga bi lo ngego i̱na talialu buaore holiyanaga hame lolene ngibe. 
Mbirale ko habane nabulene ngaru erembira mialu holiyanaga i̱ biamogo bibe. Í̠nime i̱hondo bayale bule lalu abale bi lo wiridagua i̱ biamogo bibe. 
Í̠ni mitangi bialu mbirali í̠na bia laredagua biaga karuhondo bayale buleore lalu bi hongohe lo wiaga kegoni. Í̠na bi hongoheore ogoni bulebero lalu lowirigo í̠naga biabe biahaga i̱ kogohondo biai habelo hamelo kogoni. 
I̱hondo bi ko lalu kago bibahende giho kogonigo bi ko urunime i̱ bope holigo í̠na i̱ biamogo bibe. Í̠naga bi mana tigabi ngeru baya gibiore ngegoni. 
Í̠naga bi mana damenego i̱na talialu bialu hole hamelo kogoni. Í̠na mana tigabiore biaga kego i̱hondo holene gahenge ngibe. 
Anduane Homogo-o í̠na i̱ gubalini ho kego i̱ walia habe. Í̠nime i̱ mo wialu pele ngulebero lalu bi lo wiridagua bibe. 
Í̠na bi heneneore larigo manda buwa i̱na í̠hondo mini mbiraore wu kogome wali agali i̱hondo bi ko lararu ladai buliya í̠na i̱ pele ngulebere. 
Í̠na bi tigabiore larigonaga i̱na mini dunubia ho kogome i̱na bi heneneore hangu wali agali karuhondo latagi haabo holiya i̱ mo hongo habe. 
Í̠naga bi mana lo ngego i̱na taluwa bialu haabo holebero. 
Í̠naga bi ledegoore i̱na talialu bule bialu kogonigo mbirale ngarume hapai nahelo hameledo. 
I̱na í̠naga mana lamulene nga lariruni kini bu karu lamule i̱ taga nahe howa lamulebero. 
I̱na í̠naga bi mana lowini ngego hame timbuni lo howa talialu buaore ho kogoni. 
Í̠naga bi mana uruni bayaleoreda lo manda bu howa i̱na hame timbuni lo kogoni. I̱na bi mana debene tigabi uruni bia laridagua bialu haabo holebero. 
Bamba í̠nime ogoaleore bule lalu í̠ninaga biabe biahaga i̱hondo lo wirigo mitangi bibe. Í̠na ogoni biaore buleberedalo manda buwa i̱ mini dunubia ho kogoni. 
I̱ha gendaru anda ibugu biyangi í̠na bulebero lalu bi lo wirigome i̱ mo dengalaho helarigola homa nabi halu i̱naga bu miniha mo palia holene karulo haru. 
Wali agali mine haga bu karume i̱ mege bialu karu helowa i̱na í̠naga bi mana lowini ngago erembira mialu napiruli. 
Anduane Homogo-o í̠na i̱hondo bi ala langigi biriruni mitangi budai bigi berogome i̱ mo hongo haga biaga. 
Wali agali ko biaga karume í̠naga bi mana lo ngego puguarago hondowa i̱ bu miniha keba timbuni haruli. 
I̱ni dindi ogoriani kogoni howa i̱na í̠naga mana ngegonaga iba gana minime manda bialu laabo holebero. 
Anduane Homogo-o mbiraga í̠ mitangi bialu i̱na í̠naga mana ngago lo manda biruli. 
Í̠naga mana bibahende i̱na taliai halu bialu kogola i̱naga miniha dungulo haruli. 
Anduane Homogo-o í̠ore hamelo kogoni. Í̠naga mana ngeru taluwa biaiore hole lalu bi lo werogoni. 
Í̠na i̱hondo dara howa biamogo bulebero lalu bi lo wirigodago i̱ dara holene irane nawigoria nde harugo i̱ dara howa biamogo bibe laro. 
I̱nime bialu harudaru manda biaiho howa i̱na í̠na bia laredagua talialu biai hole lalu í̠hondo bi lo wero. 
I̱na awe buliya lalu hondo ha nabi abaleore í̠naga bi ledego talialu bulebero. 
Agali ko bu karume i̱ bialu kogoha hapai howa tinaga mana ngagoha i̱ haru pubagi holenaga bialu ka. Tigua ani bialu kagoyu i̱na í̠naga bi mana lowini ngego embeda nahe ko. 
Mbi hanuniore i̱ heyu biruwa í̠na bi mana tigabiore ngadagua lope haga kegonaga i̱na í̠naga mini yaraga haruli. 
Agali í̠naga biabe biahaga howa í̠naga mana ngago talialu haga karu i̱ ti baba ibagabu haruli. 
Anduane Homogo-o wali agali dindi bibahendeni bu karuha í̠naga gubalini holene to̱ledago í̠naga mana ngego damene manda buliya i̱ lawai habe. 
Anduane Homogo-o í̠naga biabe biahaga i̱hondo mana bayaleore birigoni ndobe. Í̠na buleore lalu bi abale lo wiridagua biaore birida. 
Í̠naga mana lo ngego mitangi bialu mini mbiraore wu kogo í̠na mini bayale gigabi wulenebi manda bayale bulenebi i̱hondo ngibelo hameledo. 
Í̠na i̱ abale pani ngia nabi heha í̠naga harigani polene winigo wahalu i̱ pubagi harugoyu ai áyu i̱na í̠naga bi mana bayaleore ngeru bialu kogoni. 
Í̠ bayaleore howa i̱ dara habe naheoreni dara haga kegoni. Í̠naga bi mana bayaleore lo ngeru i̱ lawai habe. 
Wali agali mine haga bu hearume i̱ mini lalu ke̱ halu bi ko dewa layagoyu i̱na í̠naga bi mana dege talima pialu bu miniha buaore howa biaabo halu kogoni. 
Wali agali uruni tiha mini bayale wia aribia holene nawiore kagoyu i̱na nde í̠naga mana lo ngeru hangu hamelo kogoni. 
Í̠na i̱hondo pani ngialu minu barigoni bayaleore birida. Ogoni birigome i̱na í̠naga bi mana bayuwa lo manda birugoni. 
Muni bu ngaru gubalini holenego dindiha lowa í̠naga mana lo ngeru galone duniniore lo mitangi bu haruli. 
Í̠nime i̱ o kogobi wabuwa baya hangu handayaho haga kegoni. Í̠naga mana lo ngego bayuwa lomanda biai holiya i̱ha manda bayale bulene ngibe. 
Í̠na bulebero lalu lowiriru i̱na talialu bialu kogo hondowa wali agali í̠ mo dunini ho karume turu ho holebira. 
Anduane Homogo-o í̠naga bi mana ngeru tigabiore wiai kegoni i̱ manda bido. Í̠ mini bilinaheore kegome i̱na mana lehe birugonaga i̱hondo genda mo ngiridalo manda bu kogoni. 
Í̠naga biabe biahaga i̱ kogonigo í̠na i̱hondo gubalini ho haabo holebero lo wirigodagua gubalini halu i̱naga bu mini mo hongo habe. 
I̱na í̠naga bi mana lo ngeru bialu howa i̱ turuore ho kogonigo í̠na i̱ dara howa biamogo biriyagua i̱ha holene bayale yu holebero. 
Wali agali mine haga bu karu ti ke̱ howa i̱ bame godini íbu helaga biaga kagonigo ti mo taga habelo hameledo. I̱na nde í̠naga mana lowini ngeru mitangi biaabo halu holebero. 
Wali agali í̠ mitangi bialu mo dunini howa í̠naga mana ngeru mandabi karu ti i̱ koria ibilo hamelo kogoni. 
Í̠na mana bulene nga larigoni mbira wanahe i̱na biaiore holiya biamogo bibe. I̱na mana bulene ngago mbira nabi koria taga pani noligo í̠naga mana damene ngeru bayuwa bialu hole hamelo ko. 
Anduane Homogo-o í̠na i̱ pele ngibelo ha dege biwane i̱naga bu miniha genda timbuni bialu i̱naga hongo ereba haya. I̱na í̠naga bi mana lowini ngego mitangi bialu mini mbiraore hongohe wu kogoni. 
Í̠na buleore lalu lo wiriruni berebe hondole dege handayaho hewagola ai i̱naga de tandaga bida. Ai ogonidagua bidago í̠na i̱ angi biamogo buleberebe lalu kogoni. 
I̱ mo ko henego ai nogo meme dongoneha waini iba hambu berelaganego ko haragola budubagabu wahene ngaligobiore kogoni. I̱ ogonibi kogo howa í̠naga bi mana lowini ngeru embeda nahe kogoni. 
Mali ege horobi agira i̱ maliaho holedabe. Agali i̱ mo ko halu karu ti pani angi nelo muleberebe. 
Wali agali mine hagabi í̠naga bi mana lo ngeru nabiagabi karu tigua i̱ gonoha do ngogola minulenaga mana maru ohowa bialu ka. 
Í̠naga bi mana bibahende lo ngeru heneneore lo ngego iname mini mbiraore wiai habehe kama. Agali maru karume i̱ hondowa ke̱ halu bi ko lararume i̱ mo tandaga halu ka. Tigua ani bialu kago i̱ biamogo bibelo hamelo kogoni. 
Tigua i̱ bo waholebiyaria habo layago i̱na í̠naga bi mana wanahe yu tiga bu kogoni. 
I̱na í̠naga bi mana bibahende lo ngeru taluwa biai holiya í̠na gubalini haabo ho kego i̱ bayale holiya handayaho habe. 
Anduane Homogo-o í̠naga bi mana ngego hari daligaha mbirale bibahende hongo ho wiaabo kadagua wiaabo holebira. 
Í̠ni mini bilinahe kegome bi ledegoore áyu manibi wiaabobo bu wulebira. Í̠na dindi o wabu ngego ibuni wuleneore ngagoria wilalu wia amu nana nabi wiaabo haga ngagoni. 
Mbirale ngaruni bibahende aniore wiai helo lalu í̠nime laridagua wiaabo henego ngagoni. Irane mbirale urunime í̠ninaga biabe biai hagago ani wiai henego nga. 
I̱naga turu holene tene í̠naga bi mana ngagoha nawidale í̠nime i̱ genda tandagala mo ngirigome i̱ homedoleda. 
I̱na í̠naga bi mana lo ngego yu wanaholeberogo irane i̱na mana ogoni taluwa bialu kogome i̱ homa nabi bayale heledegoni. 
I̱ í̠nagaore kogonigo ai í̠na i̱ pele ngibe. I̱na í̠naga bi mana lo ngeru talialu bu manda biaabo haga kogoni. 
Agali ko bu karume i̱ bo wahole bira do haga bida. Tigua ani bule kagoyu i̱na í̠naga bi mana lo ngeru bibahende mitangi bialu haabo holebero. 
Mbirale bibahende ngaru wiaabo nahagayane handarugoyu í̠naga bi lo ngeruni dege duniniore baya burugule wiaabo holebira manda bu ko. 
Anduane Homogo í̠naga bi mana lo ngeruni i̱na gubalini timbuniore ho kogoni. I̱na í̠naga bi mana lo ngeruni mbiraga horombebi mitangi biaabo haruli. 
Í̠naga bi mana lo ngerunime i̱ heba haabo howa i̱hondo manda bulene dewaore ngiaga. Í̠naga bi mana lo ngerume i̱ manda bulene gibiore ngiragola i̱naga waitigi karunaga manda bidarubi ndo i̱ manda bu bolanguahe holiya biamogo biaga. 
Horo bibahendengi í̠naga bi mana lo ngeruni mitangitangi bialu i̱naga miniha mo pehaga bialu haabo kogoni. I̱ ani bialu kogome i̱naga miniha manda bulene bayaore anda ibiragola i̱naga lawai haga karume manda bidagobi ndo i̱ manda daligabi kogoni. 
Í̠na bibe lededagua bialu kogome i̱naga manda bulenego agali wahe karume manda bidagobi ndo i̱ mini gigabi wulene bolanguahe kogoni. 
Í̠naga bi mana lo ngedagua hangu bulenaga i̱na mana ko bulenego bibahendehondo igilaga bialu wandialu kogoni. 
Anduane Homogo i̱naga lawai haga í̠ kegoni howa í̠nime i̱ lawai haga bialu kegoni. Anigo í̠na bi lawai haga bereruni i̱na mbira hale howa mo wanahe kogoni. 
Anduane Homogo í̠naga bi mana baya dendebiore ngagoni. Mone ibane mbira narogola neha dende gibi biaganego goyane lowa Anduane Homogo í̠naga bi mananaga dendeore gibi biaga ngagoni. 
Anduane Homogo í̠naga bi mana lo ngegome i̱hondo mitangi bulene baya gibiore ngiaga ngagoni. Ani ngiagagome i̱ mana ko bulene damenego i̱na bibahendeore manga bialu magu biragola haruli. 
Anduane Homogo í̠naga bi mana lamu hale ale ngagome i̱ hariga tigabini poliya biamogo bialu haru haga ngagoni. I̱ hariga polenego ogodagua pu lalu ge mugu mo wá hagane hale ale ngagoni. 
Anduane Homogo í̠naga bi tigabiore lo wigi bideruni handalu langeredagua i̱na hale halu biaore bule lalu lo ngogoni. Bi lo wirugo ogoni pugua nabuleorebero. 
Anduane Homogo-o i̱ tandaga gibiore hiriribi nalu kogonigo tandaga nalu homa nabuliya í̠na i̱ biamogo bulebero laridagua biamogoore bibe. 
Anduane Homogo-o i̱na í̠hondo bi lalu turuore halu ka̱i̱ larogoni. I̱na í̠hondo ka̱i̱ larogoni yamialu í̠naga bi lo ngeruni i̱hondo bayuwaore biawai habe. 
Horo bibahendengi i̱ homolene kawareore ngagoria pu haga biruligoyu í̠naga mana lo ngeruni embeda naharuli. 
Agali mini kowi hearume i̱ do wuliyanaga gono weneyago de handarugoyu i̱na Anduane Homogo í̠naga bi lo wiriyaruni mbira pugua nabi kogoni. 
I̱naga dabudabu wia ai̱ ai̱ore bulenego Anduane Homogo í̠naga bioreda manda bialu í̠naga biore hongo howa yaniho kogoni. Ani yaniho kogola í̠naga bigome i̱ore mo turu gibiore haga. 
Anduane Homogo í̠naga bi mana lo ngedagua i̱na bialu mbira mo wanahe bia dege bialu kone homaluore wahole kogoni manda bu ko. 
Wali agali karume ke̱ howa í̠ talima ibaga tingi haga karu i̱na ti handabe manga ho kogoni. I̱na í̠naga bi mana ngeru mitangi bialu hame timbuni lo kogoni. 
Í̠ni hangu i̱ handayaho haga howa i̱naga humbi ale kegoni. Í̠na buleore lalu bi lo wigi biriruni manda bialu i̱na mini dunubia ho kogoni. 
Wali agali mana ko biaga kamiru tí i̱ kogoria nahe pudaba. I̱naga Ngode Datagaliwabe bi mana ngago taluwa bialu holebero. 
Í̠na mo hongo holebero lalu lo wirigonidagua i̱ mo hongo habe. Mo hongo hariyagua i̱ homa nabi bayale holebero. I̱na í̠hondo mini dunubia ho kogoni bame mo hole buligo í̠naga hongo ogoni ngibe. 
I̱ bayale holiya i̱naga gini yaniho habe. Í̠na bi larego i̱na hale halu bialu holebero. 
Wali agali í̠naga bi mana mo wahaga karuhondo erembira mialu haga kegoni. Tigua ke̱ howa mana bule ngaru bame habane nabulene wialu ereba hai holebira. 
Í̠na wali agali mana ko biaga karu ko ngubi nagalone dege kagoni lo mandabu kegoni. I̱na í̠naga bi mana ngeru hameore lo kogoni. 
I̱na í̠ gibiore kego manda buwa i̱ gi halu duru lalu kogoni. Í̠naga godi tigabiore lole ngego mitangi bialu i̱ giho kogoni. 
I̱na mana bayale tigabi ngaru dege bialu haru. Waitigi bu karume i̱ mo ko helo í̠na i̱ yu wa nahabelo hameledo. 
Í̠naga biabe biahaga kogonigo í̠na i̱ biamogo buleore lalu bi lowibe. Wali agali mine haga karume i̱ mo genda nahelo hameledo. 
Bamba í̠na i̱ bayale holiya biamogo buleore lalubi i̱ pele ngialu haru dai buliya lalu lo wirigodagua bibelobi i̱ í̠ha maliaho haabo kogome i̱naga de tandaga biragoni. 
Í̠naga gubalini holeneme i̱ dara howa biamogo bialu í̠naga bi mana debene ngeru i̱ lawai habe. 
I̱ í̠naga biabe biahaga kogonigo í̠naga bi mana baya hangu manda buliya mini bayaleru talebu ngibe. 
Anduane Homogo-o wali agalime í̠naga bi mana ngeru angua halu piagaya. Tigua ani bialu karunaga í̠na ti pani nelo mulene tu áyu ogoni. 
I̱na í̠naga bi mana gubaliniore ho ko. I̱na ngolo bayale ngago hameledogobi emene dindiha lowa ogoni bolangua howa í̠naga bi mana ngeru i̱na gubalini timbuniore ho kogoni. 
I̱na í̠naga bi mana ngeru bibahendeore talialu biaiore haruli. Hariga í̠ kegohayagi ndo mendeha pubagi halu polene hame naleore kogoni. 
Anduane Homogo í̠naga bi mana lo ngeru bayaore gibi lo wigi bidegoni. Anidane hondowa i̱na i̱naga gubalinioreme turu howa í̠na bibe lededagua bialu kogoni. 
Í̠nime í̠naga bi mana lo ngeruninaga galonego mo walia halu kegome wali agali tinaga miniha wá laga biragola bu kagoni. wali agali mini timbuni nawi karu í̠naga bi maname mini mo dingi dangia lenego ai miniwi bogabi bu kagoni. 
Í̠naga bi mana lo ngeru gubalini gibiore ho kogome í̠na mbira i̱hondo bia lare alego bia dege bulenaga i̱na i̱naga bu miniha heyuwa manda manda bu kogoni. 
Anduane Homogo í̠na wali agali í̠ gubalini haga karu dara howa biamogo birilidagua i̱ de handaya halu i̱bi dara howa biamogo bibe. 
I̱ mana ko bialu pilolilono de handayaho halu mamage holebero lo wiridagua í̠na i̱ mamage habelo hameledo. Ko buleneme i̱ bope holigo í̠na i̱ yaniho habe. 
Í̠naga bi lo ngerudagua hale halu biaiore holiyanaga wali agali mini kowi karume i̱ hengedope halu mo ko holigo í̠na i̱ yaniho habe. 
Í̠ i̱ kogoria kaware hapara howa í̠naga bi mana lo ngeru i̱hondo lawai halu í̠na i̱ mo gumbila habe. 
Wali agalime Anduane Homogo í̠naga bi mana lo ngedagua nabi puguabo halu kagonaga i̱ dugu dege beroria i̱naga deha deiba iba ale dugualu haabo kogoni. 
Anduane Homogo-o í̠ tigabiore kegoni howa í̠naga bi mana lo ngeruni damenego bibahendeore tigabiore lo ngegoni. 
Í̠na inahondo bi mana ngideruni damenego bibahendeore tigabiorebi bayaorebi hangu ngagoni. 
I̱naga waitigi karume í̠naga bi lo ngeruni ti mitangi nabiagaore kagoni. Ti ani kago handarodagua i̱naga bu habane nigoniha keba gibiore ira daradagua biragola haruli. 
Anduane Homogo í̠na bulebero laga bialu bi lo wigi bideruni heneneore biagayane i̱na haruore handama ibido. Bulebero lo ngedagua heneneore bigi birigo hondowa turuore howa yaniho kogoni. 
I̱ agali mbira abogo ka nalene emene ko dindihaore howa marume i̱ mege biaga kogoyu i̱na Anduane Homogo í̠naga bi mana dege ha do wanaharuli. 
Anduane Homogo í̠naga mana tigabi bulenego wia ai̱ ai̱ bialu í̠naga bi mana lo ngeruni henene hanguore lo wigi bidegoni. 
I̱ kogoria genda bulenebi mini dege dindi holenebi dewaore íbu wia ngagoyu i̱na í̠naga bi lo ngeru hondowa nde turuore bigi biragola haruli. 
Í̠naga bi lo ngeruni tigabi hanguore wia ai̱ ai̱ binigo lo ngegoni. Í̠naga bi lo ngedagua biruyagua i̱ haabo holeberogo lededaguaore baya hangu manda bialu buliyanaga biamogoore bibe. Í̠na ani beregola i̱ bayale dunguleore holebero. 
Anduane Homogo-o i̱na í̠ hongo howaore olarogoni. Í̠na mana bulene nga lalu lo ngeru i̱na talialu holiya i̱na í̠hondo bi larogo hale habe. 
I̱na í̠ olalu kogoni. Í̠naga bi mana lo ngego taluwa bialu holiya i̱ pele ngialu haru dai bibe laro. 
I̱na gao naledaha i̱ biamogo bibelo í̠ olaruli. Í̠na buleore lalu bi lo wigi birirunaga i̱na mini dunubia ho kogoni ndobe. 
Mbiraga i̱ dengala ho wialu í̠naga bi mana debene lo ngeru dege mitangi biaabo haruli. 
Anduane Homogo-o í̠ gubalini haabo ho hariligo i̱naga bi hale habe. Í̠na dara howa biamogo biriligo walia halu i̱ homa nabi bayale holiya handayaho habe. 
Agali marume mini ko wu howa i̱ bo wahole bialu hayaru í̠naga mana mo tene nahaga karubi tini kaware o ibiragoni ndobe. 
Anduane Homogo-o í̠naga bi mana bibahende henene wiaabo haga ngelowa í̠ni i̱ kogoha kaware haabo kegoni. 
Bambaore howa í̠naga bi mana lowiriru mandabi harugoni ndobe. Í̠na bi uruni lo wialu wiaabo helo nge. 
I̱na í̠naga bi mana lo ngeru embeda nahe kogo í̠na i̱ha genda timbuni ngaru de hondowa i̱ biamogo bibe. 
Í̠nime pele nguleore lalu lo wiridagua i̱ pele ngibe. Godi lalu koria i̱ bo waholene nga loligo í̠na i̱naga lahabe. 
Ko biaga karu tigua í̠naga bi mana lo ngeru talialu nabiagaore kago í̠na ti pele mialu haru dai nabule kegoni. 
Anduane Homogo-o í̠naga dara holene timbuniore ngegome í̠na dara howa biamogo bulebero lalu bi lo wiridagua áyu ogoni i̱ biamogo bibelo hameledo. 
Waitigi dewaoreme i̱ baba waitigi ho halu mo ko haga bidagoyu ainde i̱na í̠naga bi mana galoneore lo ngeru yu wahalu nape kogoni. 
Agali ko biaga biarume í̠na mana bayale bulene nga lo wiriruni nabiaga karu hondowa i̱na tihondo turu nahe handabe manga timbuni ho haruli. 
Anduane Homogo-o í̠naga bi mana bulene nga larigo i̱na gubaliniore howa bua haabo kogoni manda bibe. Í̠naga gubalini holene ho haabo haga kegonigo ainde i̱ dara halu pele ngibe. 
Í̠naga bi mana ngerunaga irane henene lolene dege lo nge. Í̠naga bi mana lo ngeruni tigabiore wiaabobo bu wiaga nga. 
Irane nawini agali haguane bu karume i̱ mo ko halu kagoyu i̱na í̠naga bi mana lo ngeru mitangiore bu haga kogoni. 
Mbiralime ngolo dewa handa walia howa turu hagadagua í̠na buleore lalu lo wigi birirunaga mitangi bialu i̱ turu timbuniore ho kogoni. 
Ke̱ hagane mana koorene ko ngago i̱ mangaore ho kogoyu i̱na í̠naga bi mana lo ngeru hangu gubalini timbuniore ho kogoni. 
Í̠na mana tigabini howa bi lolene ngadagua laga kegonaga i̱na horo bibahendengi í̠hondo kahalu ka̱i̱ laruli. 
Wali agali í̠naga bi mana gubalini ho haga karu ti bayale halu mbirale mbirame ti mo pila holene nawulebira. 
Anduane Homogo-o í̠na i̱ pele ngialu haru dai bibelo maliaho howa mana í̠nime bibe lalu lo wirigo i̱na bialu kogoni. 
Í̠naga bi mana lo ngeru i̱na taluwa bialu hagaore kogoni. Bi mana uruni gubaliniore howa bua timbuni ho kogoni ndobe. 
I̱na í̠naga mana lo ngerubi bulene nga lalu bi lederubi bibahendeore talialu biai halu kogoni. I̱na mana ogoni bialu koria í̠ de handai ho kegoni. 
Anduane Homogo-o i̱ biamogo bia lalu olalu kogo hale habe. Abale howa í̠na i̱hondo manda bulene nguleore lalu bi lo wiridagua i̱ manda bulene timbuni mo ngibe. 
Ainde i̱na í̠hondo bi larogo baya hangu hale halu í̠na pele ngialu haru dai bule laridagua áyu i̱ pele ngibe. 
Í̠na í̠naga mana lo ngeru i̱ lawai haabo haga kegonaga i̱na í̠naga mini yaraga haabo halu holebero. 
Í̠naga bi mana damenego bayale tigabi dege ngegonaga i̱na mana ogoni lalu iba gana la halu holebero. 
Í̠naga bi mana damenego bibahende talialu bialu kogonigo ai nde í̠na i̱ biamogo bule manda bu haabo habe. 
Anduane Homogo-o i̱ pele ngialu haru dai bibelonaga ha dege biwane i̱naga bu miniha tandaga bialu i̱ hongo ereba haragoni. Í̠naga bi mana lo ngegome i̱ mo turu haga biaga ngagoni. 
Í̠naga mini yaraga halu holiya í̠na i̱ha holene bayaleore ngibe. Í̠naga bi lo ngegome i̱ biamogo bia helo hameledo. 
I̱ hariga bayale yu wahalu pu tara howa i̱ nogo sibi pu ereba hene ale ko. I̱na í̠naga bi mana lowini ngeru yu wanahagaore kogo manda buwa í̠na í̠naga biabe biahaga i̱ kogonigo i̱ taya bibe.