IBA GANA. 122. Tigua i̱hondo, Anduane Homogonaga anda mali̱ya ma íbu, layagola i̱ turuore haru. Ani layagola ina pialu ai áyu Yarusaleme anda puwa pabe tamuha o kamagoni handadaba. Yarusaleme tano biagoni lone bu aribia hene baya gibiore de hondoabi kagoni. Isaraele hameigini tara tara palu ngaru ti bibahendeme Anduane Homogo ibuhondo ka̱i̱ lole ogoriani íbu ngoai halimu lenedagua ka̱i̱ lole ibugu biaga kagoni. Dindi ogoriani godi anda kago ogoniha Isaraele wali agalinaga kinirume biruwa godi hale halu mo tiga biaga kagoni. Yarusaleme dindini gendabi mbira nawi mo paliaho wilo Anduane Homogohondo bi ogodagua lalu halimu. Wali agali Yarusaleme tano mitangi timbuni ho karu ti bayaleore helo biamogo bibe. Wali agali Yarusaleme tanonaga pabe tamuhayagi bu kamiru tí tíni dege dege ngeke̱ nale gungu nabi bayuwaore mo paliaho helo biamogo bibe. Kinibi ibunaga agali haguane karubi uruni andagahayagi haga karu tibi turuho mo paliaho dege helo biamogo bibe, lalu ani laga bilimu. I̱ damenebi i̱ ariabi igiri yangobi Yarusalemeni íbu karu mitangi bialu bi ogo Yarusalemeni kamiru tíhondo larogoni, Tí ngeke̱ nale gungu nabi bayuwaore mo paliaho halimu, laro. I̱na Anduane Homogo inanaga Ngode Datagaliwabe kago ibunaga anda kagoore i̱na mitangi timbuni ho kogoni. Ngode Datagaliwabehanda Yarusaleme wali agaliore biamogo bialu mo bayale helonaga ibuhondo bi lahalu kogoni.