IBA GANA.
126.
Anduane Homogohanda ina dindi taraha garabaya hemaria haru dai bialu Yarusalemeni lone helayagoni Ibugua ani biyagonaga iname ogoni henene ndo emaga handarimabe toba harimaya. 
Ina Yarusalemeni daibu howa turuore gibi halu oba hangu haho wiaabo halu turu howa iba ganaru podaga podaga bialu gibiore laho wiaabo harimagoni. Ina ani birimago hondowa wali agali hameigini tara tara paluyu pearume tini dege dege lade̱le̱ bialu au laya. Anduane Homogohanda ibunaga Isaraele wali agali biamogo bule gibiore nabibehe wiagoni biya hendedemini, laya. 
Ogoni heneneore ndobe. Anduane Homogohanda ina biamogo bulenaga biabe gibiore biyagoni. Ibugua ani biyagonaga ina turuore gibi halu ina miniha dunguore lo harimagoni. 
Anduane Homogo-o ina ala turuho dunguore lo haramalidagua holoma̱ya hela dai bibe. Iba hundiragola gana iba piagagoha yobu ngaria dalu lone ibiragola iba piaga wiyadagua lone piaga. Ogonidagua Anduane Homogo í̠na ina áyu kamaru lone mo gumbilo dai bibe. 
Wali agali deiba ibalu howa tomo hangalu karume mani tomo hangaragoni bu ngaria turuore halu bu hanaga bilo hameledo. 
Wali agali dugu bialu tomo egene hongole yalu pialu hangayarume mani tomo uruni bu ngaria bu hombedo hanalu turu hama iba gana lamalama andaga dai bulebira.