12
Kwamayoku be wayoꞋo fifiwalana kahihidi.
1 KaduꞋe gaꞋenoꞋita tu iyaꞋiyaya lakahina kadu yauyaulowogina lobameya gilakayemu, higa kwamayoku kauwana againe givaigau ada vaikohi tabone gimidimidi. Badau kikaiwabuna ibadibadi tuwelo buye hikivefotadi-ma uꞋune gaꞋitana. 2 Bana wahifugana ada givefahena faꞋina yana aulolo giyemu againe gitatawayana. 3 Au kadu iyaꞋiyaya velugana lobameya gilakayemu, higa wayoꞋo abokakaina yabeyabelina uꞋuna seveni ana siko seveni kadu badau kikaiwabuna seveni meda uꞋuna seveni agaidiya gidadauda-ma gaꞋitana. 4 Giuna againe ibadibadi tufoidi moyaꞋaidi gilukakikakidi be babiya hibeꞋu. Ibadibadi adi tufo tohiye ma adi tufo luhei auwe yamumudi tu adi tufo saꞋeyana ma babiya gihegehobuyena. Bana wayoꞋo-nadi kwamayoku kabisona ginavenatuna-ma wamagigine gimidi be higa kwamana ginatubuga digo auheꞋama ginatonona. 5 Au hivenatuna natudi kaliva, BanaꞋe aimo yana wafuluma kainumula yoꞋo tulina tulina ginaꞋitaveꞋavidi amanadi. WayoꞋo-nadi kwamana gidatonona ma tamo hakwadi gilemana be Yaubada againe kadu yana didigaꞋuꞋu buye againe ginauwena. 6 Badi kwamayoku ma babigaga againe hiꞋota, abaga saꞋeyana badi faꞋidiya boi Yaubada gikidewedewena-ma againe hina. Medede againe aiyeta 1,260 agaidiya ginaꞋitaꞋitaveꞋavidi.
7 Kwamayoku hiꞋota be hina tu gaviya lobameya gilakayemu. Lobama ana tovenuwaꞋata kikaiwabuna ana egana Maikeli yana yoꞋo ginagoyedi be wayoꞋo yana yoꞋo tomiyalobama buye hiveꞋamunumunuga. 8 Lobama ana tovenuwaꞋata Maikeli ginagoyedi-ma wayoꞋo hifaiwalahege-moꞋena, ada Yaubada bana wayoꞋo yana yoꞋo buye yadi abaga lobameya gilemadi be giwavidi. 9 Bana wayoꞋo abokakaina babiya gihegehobuyena, banaꞋe ma oloto tuwaina hivewagana Diyabolo yo Setani, tomiyababi matatabudi koyona againe ginuwaꞋabiyedi-ma kalivai-nadi. E, banaꞋe babiya hihegehobuyena kadu yana yoꞋo tomiyalobama buyeꞋi.
10 Setani babiya hihegehobuyena tu agoꞋago lakahina lobameya ganogalina gikova gigayo,
Adamoya yada Yaubada gikibababaleda,
Yada Tokaiwabu yana faiwala giꞋivemogatalina
be yana itaveꞋavina againe kamimiyami.
Adamoya yana Tovegida Keliso
yana abavehimeya giseyemaunena.
Setani babiya hihegehobuyena,
boi uyadayada be bogi tobohiyadeyao
Yaubada matane gihawavekoyoye-kawowodi.
11 BanaꞋe Sifi kabiꞋona dayagina gimadu faꞋina
tobohiyadeyao Setani hifaiwalahege-moꞋena
Kadu yadi yegayega Yesu dayagine
mali kaliva agaidiya hiꞋawatalatalainena
faꞋina Setani hifaiwalahege-moꞋena,
yawaidi keke hidanuwaloloneni
au alikeya hihawahegedi.
12 Yaubada gifaiwalahegahega-moꞋa faꞋina
omi tomiyalobama wanavemwamwala.
Tu hoiyoi, omi tomiyababi tomiyalehaga
faꞋina Setani agaimiya gihobuꞋela.
IlaꞋa givemagana be vita ginavelemi
faꞋina gihalamanena yana tova a gikaliꞋuho.
Au hidedemi agoꞋago lobameya gigahe.
13 Tu bana wayoꞋo-nadi babiya hihegehobuyena ma tauna giꞋitana againe, kwamayoku kwamana kaliva hivenatunena-ma givenegadi. 14 GidakiveꞋavidi ma Yaubada manubutu ofana luhei kwamayoku giveledi be higa abaga babigaga againe badi faꞋidiya gikidewedewena-ma againe adifaiweya hinamaduꞋota. Medede againe malamala tohiye kadu hafuna agaidiya ginaꞋitaꞋitaveꞋavidi be bana wayoꞋo-nadi keke anafaiweya ginamunudi. 15 Au wayoꞋo awana gilaꞋana ada gufa lakahina giꞋahiwahiwana be higa kwamayoku ginaveꞋalugedi. 16 Tu babi kwamayoku givelugadi. Babi giꞋayavalina be gufa wayoꞋo awane giꞋalahiwagena-ma babi giyuna. 17 Au wayoꞋo kwamayoku agaidiya giꞋagoꞋuga-moꞋa ada gitauya be natudiyao velugadiyao agaidiya ginalulugaviya. Badi kalivai-dina Yaubada yana vehimeya hiꞋitaꞋitaveꞋavina kadu nuwanuwa velemoꞋena Yesu giꞋawatalatalainena-ma againe hiluluveꞋavina. 18 Au wayoꞋo gina taliyeya gimidi tu gibodaboda. Yo 14:30 Sam 2:9 Yu 1:9 Aba 3:1, Ha 20:2-3 Yob 1:9-11, Sak 3:1 Yo 1:7 1Fi 5:8