Apocalipsis.
11.
Tacahe, te nuvapure, tíjara­ca­nuanapa eta ecutiriqui. Tásiha, máichanupa ema Viya: —Piyanayare tayehe eta Templo te Jerusalén. Pícutichaya tamutu eta peti étapa eta canchón. Pícuti­chavare eta náijuchi­rarehi eta sárareana námava­hu­queneana. Tásiha, pitupa­cha­yareva áyana­na­hipuca ena achaneana téneucha­va­ra­hianahi eta te canchón. 
Váhisera picuicuticha te aneca tamirahuhi eta Templo. Taicha ena apajue­cu­ruhana, nísapa­que­neanapa eta návihairaya éna. Nísapai­na­varepa eta náitaha­siraya eta tayere­ru­vanaini eta avasare tacapi­ca­hu­quenehi Jerusalén. Ichape eta namapa­chi­chi­ji­si­rayare. Cuarenta y dos caje eta náichirayare. 
Nútisera nuvane­ca­va­cainapa ena apinana nuvaneruana profetana. Éna, tiquisa­mui­ri­ha­na­ya­repahi eta namuirihana. Eta juca táicutia­ra­yarehi eta náichuaré­si­rayare náeneuchava ena achaneana. Mil doscientos sesenta sache eta nayere­vayare —macahepa. 
Tásiha, nímahapa te anuma te mamirahu ema Viya eta apina yucuqui olivo étapa eta apina candeleroana te mamirahu ema Viya, ema téchahi tamutu eta juca apaquehe. Eta juca táicutiara eta majanea­si­ravaca ena apinana mavanarana, taicha manere­ji­ruanahi éna, nacame­ta­rai­ruyare eta náeneuchi­ra­vayare ena achaneana. Te natiari­hi­napuca nácani tivara­ha­nayare titupiacana, éna ticatiu­cha­va­nayare. Tiúchucayare eta yucu te najaca. Táijuchayare muraca, tacapa­ca­yareva ena nánara­na­yarehi. 
Éneri­chuvare ena nani, narata­ha­ya­revare náichejica eta tiquiva te jena sácheana nacame­ta­rai­rui­rayare. Étaripa eta une, náepiya­cayare ítiamayare náicha. Nacuchu­ca­yareva eta táiñepa­hiyare nayehe ena achaneana, apana­pa­ne­ne­ji­yarehi náicha, te jácani navara­ha­que­neyare éna. 
Téhesera te táitauchavapa eta nacame­ta­rai­rui­rayare, macana­ra­va­cainapa ema Tíñehi Achane Váinara­jiquene ticaijare Útsutsure. Émaripa ema majupaha ema Satanás. Tásiha, masapi­hainapa ticapa­re­cayare macapa­ca­va­cainapa ena apinana mavanarana ema Viya. 
Tásiha, ema Tíñehi Achane Útsutsure vahi máisapaimahi náecara eta náqueheana. Tanasi­yarehi te aneca. Tacahe, náimahayare namutu ena achaneana te juca apaquehe. Mapana sache y medio eta nacaheyare te calle eta te avasare. Eta juca avasare, étarichuhi eta macaeta­tainehi ema Viáquenu. Eta juca avasare, tétavi­cavahi eta tamauriva tacuti eta avasare Sodoma, étapa eta Egipto. 
Ena achaneana, natiari­hiyare te tamutu avasareana ena tiúrisa­mu­reanaya eta náimairaya ena tépenanahi. Ticapie­sta­ra­nainapa. Tíjara­ca­si­cha­ca­ca­nainapa eta námavahuana. Taicha títava­naripa ena nani profetanaini, énaripa ena tihapa­pi­ri­canahi eta náichira eta tamauri­queneana. 
Tásihasera, te táequenénapa eta mapanaquene sache y medio, macaeche­pu­ca­va­cainapa ema Viya. Tichava­nainapa títare­ca­nayare. Namutu ena achaneana náimahaya. Ichape eta napisi­rayare. 
Tacahe, ena nani apinana profetana nasamainapa eta mahu ema tíchuha­vacahi te anuma. Muraca eta mahu eta máichuira­vacahi: —Yare, íteca, iápana —máichapa. Tacahe, járajapapa eta úcaji táepana­vacapa éna, támapa te anuma. Ena ticana­ranahi náimara­ra­caripa eta nayanirahi. 
Enevanepa tiyaya­carepa eta apaquehe. Muraca eta tayamu­ri­sirahi. Camuri eta pétiana tiáquipai­ca­va­vacahi. Siete mil eta náichape­muriva ena náepena­que­neanahi. Ena achaneana táemachanahi, tétavi­ca­vainehi eta napisirahi. Náimati­nu­mainehi ema Viya. Napiaracapa, nacunachapa eta máitupa­ji­jia­si­ravahi ema Viya tiávihahi te anuma. 
Títauchavapa eta juca apinaquene ecuñaraqui. ¡Váhisera tayere­que­ne­haimahi eta mapanaquene ecuñaraqui! 
Tacahe, ticachujapa ema téqueneha ángele. Tásiha, ticaemapa muraca te anuma. Ánipa tacahehi eta nahu eta nusamirahi: —Títauchavapa puiti eta émaira­yarepa ema Viya técha, ticava­nai­ri­piyare namutu ena achaneana te juca apaquehe. Macaejacapa ema Machicha Cristo, máijara­cainapa eta mávacu­reyare. Acane­va­cainapa eta émairayare techa tamutu —tacahepa eta nahu. 
Tacahe, tépuyu­canapa ena véinticua­tro­queneana víyarahana, ena téjacanahi tayehe eta trono te mamirahu ema Viya. Titsiuca­pai­ri­canapa, nacunachapa ema Viya. 
Tijiranapa, ánipa nacahe: “Vihasu­lu­pa­yachavi, Tata. Tétavi­cavahi eta pítupa­ji­jia­si­ravahi, píturue­queneha tamutu. Píti pitiari­hi­quenehi te tépana­vainapa eta apaquehe. Pinasi­ri­chu­hivare puiti eta viyehe. Puiti péjacapa tayehe eta piávacure ichapequene, pítira­yarepa pecha tamutu. 
Tétavi­cavahi eta nasema­nevahi ena achaneana eta piyehe. Muraca­pa­nai­na­pasera eta pícuña­si­ravaca éna. Puiti ticaya­se­se­re­hia­nainapa te pimirahu ena náepena­queneana. Jéhesare, picami­tie­que­ne­hainapa namutu ena ticami­tie­que­ne­ra­hianaini te juca apaquehe. Puiti pítsiri­ji­ca­vainapa eta nacaema­ta­nea­si­ravihi ena pivanarana ticame­ta­rai­ru­rahiana eta péchaji­riruva. Puiti píjara­cainapa eta náicuchihi ena yátupi­que­neanahi pichicha­na­veanahi tiámanahi eta píjare: nácani ichavicana, araitanana, énapa ena amaperuana” nacahepa. 
Tacahe, téjiacapa eta tapajacura eta Templo tiávihahi te anuma, mapena ema Viya. Ticaecherapa eta sagrario tacaunaiyahi eta echaji­ri­ru­cavana matratu­neanahi ema Viya nayehe ena israelítana. Tásiha, enevanepa téramecahi, ticaemapa, tirurecapa. Témiricapa eta uverequi timítu­tupahi. Tiyamu­ri­ca­varepa eta apaquehe.