Dagiti Salmo.
94.
O Yahweh, Dios a mangibales, Dios a mangibales, raniagannakami. 
Tumakderka, ukom ti daga, itedmo kadagiti natangsit dagiti maiparbeng kadakuada. 
O Yahweh, kasano pay kabayag dagiti nadangkes, kasano pay kabayag iti panagragsak dagiti nadangkes? 
Agisawsawangda kadagiti natangsit ken nakarit a panagsasao, ken naparammagda amin. 
Ibaddebaddekda dagiti tattaom, O Yahweh; idadanesda ti nasionmo. 
Pappapatayenda ti balo a babbai ken ti gangannaet, ken papatayenda dagiti ulila kadagiti ammada. 
Kunada, “Saanto a makita ni Yaweh, saan a pagan-ano daytoy ti Dios ni Jacob.” 
Awatenyo, dakayo a nakuneng a tattao, dakayo a maag, kaano kayo pay a makasursuro? Isuna a nangaramid ti lapayag, saanna kadi a mangngeg? 
Isuna a nangaramid ti mata, saanna kadi a makita? 
Isuna a mangisursuro kadagiti nasion, saan kadi isuna a mangilinteg? Isuna ti mangmangted iti pannakaammo ti tao. 
Ammo ni Yahweh a narugit dagiti kapanunotan dagiti tattao. 
Nagasat ti tao a suroam, O Yahweh, ti sursuroam kadagiti lintegmo. 
Ikkam isuna ti inana iti tiempo ti riribuk inggana a makali ti abut a maipaay iti nadangkes. 
Ta saan a baybay-an ni Yahweh dagiti tattaona wenno panawan dagiti tawidna. 
Ta rumingbawto ti hustisia; ket surotento amin daytoy dagiti nalinteg. 
Siasinonto ti tumakder a mangirupir kaniak a maibusor kadagiti managdakdakes? Siasinonto ti mangitakder kaniak a maibusor kadagiti nadangkes? 
No saan a ni Yahweh ti nagbalin a katulongak, nabiitak koman a nakaidda iti lugar ti kinaulimek. 
Idi imbagak, “Maikagkaglis ti sakak,” ti kinapudnom ti tulagmo O Yahweh, iti nangingato kaniak. 
No butbutngennak ket ringbawannak dagiti pakariribukak, paragsakennak ti panangliwliwam. 
Mabalin kadi a makikadua kenka dagiti dakes nga agtuturay, dagiti agar-aramid iti nakillo a paglintegan? 
Agmaymaysada nga agpanggep a mangpapatay kadagiti nalinteg, ken dusaenda dagiti awan ti basolna iti ipapatay. 
Ngem ni Yahweh ti nagbalin a nangato a torek salaknibko, ken ti Diosko ti nagbalin a dakkel a bato a pagkamangak. 
Iyegna kadakuada dagiti nagkuranganda, ket ikisapna ida gapu iti kinadakesda. Ikisap ida ni Yahweh a Diostayo.