Irọkhasẹ.
7.
Ona o dọsẹ sẹ, mhi ke gbo mẹ khi igẹni aane e migha iguabọ enenene na ekẹ agbọ. E mu akpekpeli enenene na iguabọ ekẹ agbọ gba ini akpekpeli o khi ke li ekẹ agbọ, wẹẹ ukhomhi okẹ oniẹmhi wẹẹ ẹẹra. 
Ighọ mhi kẹ mẹ agẹni ọlese khi ọ rọte obini ovọ o te ẹ ngale lasele, ọ tsua akhuli ni a rọ ọ shi emhi ọlẹlẹ oyi Ẹshinẹgba ni ọ la agbọ. Ọ ri uruli na leghe lu eni igẹni aane eghọ ni a ri ekpabọ na ni e rọ yese ekẹ ali okẹ oniẹmhi-a. 
Ọọ wẹ, “A khi yese ekẹ-a wẹẹ okẹ oniẹmhi wẹẹ ẹẹra, sẹ khi awa shi ọlẹlẹ shi eni ẹẹ ga eyi Ẹshinẹgba alukpo se.” 
Ighọ mhi suọ khi eni a rọte elemhi ẹdẹli eyi iZirẹni nya shi ọlẹlẹ, e ya khi ẹgbọ agbẹlẹ egbhuẹshilua ali ene (144,000). 
A rọte unuẹkpẹ oyi iJuda, shi ọlẹlẹ shi ẹgbọ agbẹlẹ igbẹva egbe (12,000). A rọte unuẹkpẹ oyi iRubẹni, shi ọlẹlẹ shi ẹgbọ agbẹlẹ igbẹva egbe (12,000). A rọte unuẹkpẹ oyi iGadi, shi ọlẹlẹ shi ẹgbọ agbẹlẹ igbẹva egbe (12,000). 
A rọte unuẹkpẹ oyi Asha, shi ọlẹlẹ shi ẹgbọ agbẹlẹ igbẹva egbe (12,000). A rọte unuẹkpẹ oyi iNafutali, shi ọlẹlẹ shi ẹgbọ agbẹlẹ igbẹva egbe (12,000). A rọte unuẹkpẹ oyi iManasẹ, shi ọlẹlẹ shi ẹgbọ agbẹlẹ igbẹva egbe (12,000). 
A rọte unuẹkpẹ oyi iSamọ, shi ọlẹlẹ shi ẹgbọ agbẹlẹ igbẹva egbe (12,000). A rọte unuẹkpẹ oyi iLiva, shi ọlẹlẹ shi ẹgbọ agbẹlẹ igbẹva egbe (12,000). A rọte unuẹkpẹ oyi iSaka, shi ọlẹlẹ shi ẹgbọ agbẹlẹ igbẹva egbe (12,000). 
A rọte unuẹkpẹ oyi iZebulọ, shi ọlẹlẹ shi ẹgbọ agbẹlẹ igbẹva egbe (12,000). A rọte unuẹkpẹ oyi iJosẹfu, shi ọlẹlẹ shi ẹgbọ agbẹlẹ igbẹva egbe (12,000). A rọte unuẹkpẹ oyi iBẹjami, shi ọlẹlẹ shi ẹgbọ agbẹlẹ igbẹva egbe (12,000.) 
Ona o dọsẹ se, mhi bino, ghe ebubu ẹgbọ ni ọgbọkhọghuo ọa dobẹ ya leli khẹ! Ishishi khi ishishi ali unuẹkpẹ nya ali ẹgbọ ali ẹmuẹ ọdọda e te bhale. Ighọ e migha odalo oyi oni ukpẹkhomhi oghie, e migha odalo oyi ọni Omi Osumha, e sọnọ itsua epfopfo, e muno eyamhi mhọli abọ. 
E tsẹsẹ leghe, e liẹ. “Ẹshinẹgba ọni ọ shitọ oni ukpẹkhomhi oghie, Ọ mhọli ekpabọ ni ọ rọ mie ẹgbọ eyọli pfuese, ighọ li khi ọni Omi Osumha.” 
Igẹni nya e migha gasẹ ọni ukpẹkhomhi oghie, ali eni egbhali ali elamhakọ aane e de ta alo mu ekẹ odalo oni ukpẹkhomhi oghie e ga Ẹshinẹgba. 
E liẹ, “Atsẹ! Ikuẹghiẹ ali ufumhi, ali ẹgbhẹ ali ikphẹmhi ali ekpẹ, ali ekpabọ ali itoto, e khi eyi Ẹshinẹgba ọyawa, ẹlẹ na agbọagbọ. Atsẹ!” 
Ighọ ọgbhali ọghuo elemhi wẹ ọ nu mhẹ ngme ọ mhẹ, “Eghuo eghọ e khi ni e sọnọ itsua epfopfo? U lẹsẹ obini e tẹ bhale?” 
Mhiẹ ọli, “Ọga, yẹyẹ u ya lẹsẹ.” Ọọ mhẹ, “Ena e khi eni e pfue oni ukpokpomhi ajilimhẹ, e she pfuẹ itsua eyẹwẹ-a, e ri ọlia eyi ọni Omi Osumha rẹwẹ pfuasẹ. 
Irarighọ, “E rọ migha odalo ukpẹkhomhi oghie oyi Ẹshinẹgba. Ni e la elemhi Owa oyi Ẹshinẹgba oyọli ke ga li ẹlẹ ọguota ali ẹliyọsẹ. Ọni ọ shitọ oni ukpẹkhomhi oghie oyọli, ọ ya ri okholo oyọli khukhu wẹ. 
Okiamhi ọa ke gbo ya gbe wẹ ghue, wẹkhi okiamẹ o kẹ ya gbe wẹ ghue. A ya khukhu wẹ ovọ ererẹ, ọa kẹ tosẹ wẹ ghue. 
Irari khi ọni Omi Osumha ni ọ migha odalo oni ukpẹkhomhi oghie, ọ ya ri ẹloe ke khu wẹ. O rẹwẹ je okẹ amẹ ni o ri agbọ a na ọgbọ. Ẹshinẹgba ọ ya shishi wẹ ameviẹ alo-a.”