Irọkhasẹ.
18.
Onana ọ dọsẹ se, mhi mẹ agẹni olese khi ọ rọte iloghie ẹ tiemhile. Ọ mhọli afu nofunẹ, ugẹmhi oyọli o ri ekẹ agbọ ọ gẹ nyanyanya. 
Ọ ri uruli oniẹmhi tsẹsẹ leghe, ọ li. “Ẹoli iBabilọ Oniẹmhi, o she de. O she mele ugbebo oyi iyẹmhẹ eyi ọkphaghiẹ-a, ali ashini iyẹmhẹ ọkphaghiẹ e la lese, ashini ipfeli ali elamhakọ ni aa pfuasẹ ni aa ghuẹ, ẹẹ la. 
Irari khi ishishi nya, e she kpọkpọ onyọ, ni o ri ujili ẹ kpha, ikhi onyọ okia oyọli. Ighie na ekẹ agbọ e she kia okia deba li. Eduoki na ekẹ agbọ, e she rọte iliagbọ-tsuakua oyọli mhuẹ ẹpfue.” 
Ighọ mhi suọ uruli olese ni o rọte idane liẹ, “Ẹgbọ eyẹmhẹ, a na li egbe kua, ini a khi mhuẹ okemhi shi olamhẹ eyọli, ini a khi mhuẹ okemhi shi osoli anasẹmhẹ oyọli. 
Irari khi olamhẹ eyọli e she tigbili yagha ramhi idane, Ẹshinẹgba ọ she sato umha-guẹli eyọli. 
Ā li ọli, abi ọ li ẹ, ā fali ọli ota asha eva shi ikanya ni ọ gbe. Onyọ ni o toto ni ọ rọ na ẹ da, a sọ oghọghọ nali da asha eva. 
A ri osoli ali oyala nali ni o guẹ to ufumhi ali ẹpfue ni ọ rọna egbọli. Irari khi eri Ọni Ọkpotso ọ la ekelemhi tono obọ udu liẹ, ‘Mhẹmhẹ mhi khi ọni ọlele! Mhi aa tigbe ya khi ọsamhi-olimhi, mhi aa tigbe ya mẹ oya egbe ghue.’ 
Irarighọ, ogbẹlẹghuo anasẹmhẹ oyọli o rọ ya sha rughu ọli, shi eghuli ali eviẹ ali okiamhi. A ya ri erali tosẹ ọli-a. Irari khi Ẹshinẹgba Ọnọmhuẹ ni ọ ya gue ọli ẹzọ, ọnọfunẹ nya ọ khi.” 
“Ini ighie na agbọ ni e kia okia deba li, ni e nu ọli li agbọ tsua kua, e ya viẹ, e viẹ eviẹ oya na li, ini e mẹ ewọli erali ni ẹẹ tosẹ ọli-a. 
E ya tapfia migha ke viẹ irari ulishi osoli ni a na li, ẹẹ liẹ, “ ‘Eekhue o Eekhue o yẹyẹ ẹoli nofunẹ, iBabilọ ẹoli no mhuẹ ekpabọ! Elemhi iwakati oghuo tsẹ epfua oyẹ o she bhale!’ 
“Eduoki na agbọ e ya viẹ ọli e viẹ oya irari khi ọgbọkhọghuo ọa ke nu wẹ ya dẹ itsua. 
Itsua igolu ali ẹlomho, imiechẹ ni e somhotse ni e ghalẹ, ifẹfẹ ali ema, ide epfopfo na kpishi, ali eni ẹ yilẹ, ghe ena wọnọ, ali ilọlọ eni eyilẹ ali itsua ọdọda ni a ri ọọra ni ẹ pfie khali, ali itsua ọdọda ni a ri ekphali eni khali, ali ẹẹra ni e ghalẹ, idẹ ali ikhuli ali echẹ imabo. 
Ali alagho na lu ikinamọni ali ọshamhi ali ituale afu ẹẹra ali ituale ni a ku ẹ shi olimhi egbe, ali atike ni ọọ pfie ni o ghalẹ ali onyọ ali oili ali ifulawa ali ikpamhi emhi ni a lu ado, ena ali isumha ali ichi ali amọku ni ichi ẹẹ tsua, li shi ẹgbọ ni e khi ighumha. 
“Eni eduoki e ya liẹ ọli, ‘Imọmhi ni u ri ukpẹloe shi ekẹ ẹ khẹ, o she mẹ na. Ẹpfue ali ọsuemhẹ eyẹ nya e she kele-a, ni a ke dobẹ gbolo mẹ ya mie.’ 
Eduoki ni e ri emhi enana dẹ ni e mẹ elele ẹpfue rọte obọ oyi ọni ọkpotso, e ya migha tapfia, ulishi osoli ni ọ mẹ ọọ mu wẹ. E ya viẹ e viẹ oya, 
e viẹ nyogho, ee liẹ, “ ‘Eekhue-o! Eekhue-o, ẹoli Onofunẹ, ni a ri iwulu ichẹ eneyilẹ, ni a ri igolu ali echẹ ni e ghalẹ ali ifẹfẹ khuẹ akhuẹ! 
Aboriẹkhi ighọ, elemhi iwakati oghuo tsẹ, eni ẹpfue eniẹmhi eghọ e li opfu-a.’ “Eni e khi ega ọkọ-okẹ oniẹmhi nya ali eni ẹ lo ọkọ-okẹ oniẹmhi ya asha ali eni ẹ gua li ali eni e rọte okẹ oniẹmhi ẹ mie ifata, e ya tapfia migha. 
Ini e mẹ ewọli eyi utomhi oyọli, e ya liẹ, ‘Ẹoli okhọghuo o la ọ ni o li abi oni ẹoli oniẹmhi?’ 
E yalọ ifufu ku ukhomhi, e ri eviẹ ali oya viẹ leghe, ee liẹ, “ ‘Eekhue-o! Eekhue-o, yẹyẹ ẹoli oniẹmhi, ni eni e mhọli ọkọ-okẹ oniẹmhi nya, e te mhọli ẹpfue eyẹwẹ rọte ọsuemhẹ oyi oni ẹoli! Elemhi iwakati oghuo tsẹ a rọ pfuse ọli-a. 
A ri itobọ li ke ghẹlẹ, iloghie, A ke ghẹlẹ, ẹẹ eni a pfa na ali ighiusomhi na kẹẹ ali emekẹguele! Irari khi Ẹshinẹgba ọ she gue ọli ẹzọ shi abi ọ li nasẹ ẹ.’ ” 
Ighọ agẹni nọfunẹ o rue udumhi ẹchẹ ni o li abi ẹchẹ iko pfilo oni okẹ oniẹmhi, ọọ li, “Ekpabọ na guo a rọ ya guọghọ ẹoli iBabilọ oniẹmhi-a, aa ke gbo ya mẹ ẹ ẹloe ghue. 
Ọgbọ ọa ke gbo ya suọ uruli ẹfa wẹkhi oyi emini áá kpheli wẹkhi oyi ofele, wẹkhi oyi akala elemhi yẹyẹ oni ẹoli ona ghue. Ọgbọ ọa ke ya mẹ ọgbakanya ọkhọghuo elemhi ẹ ghue. Ọgbọ ọa ke ya suọ okeke emini a mhẹli iko, elemhi ẹ ghue. 
Erali ákpá ọa ke gbo ya gẹ elemhi ẹ ghue, wẹkhi eri a ya gbo suọ uruli eni ẹ zu ode elemhi ẹ ghue. Eduoki eyẹ e khi ẹgbọ eni e funẹ na ekẹ agbọ, u ri ogbhọ oyẹ di ishishi nya wasẹ-a. 
Elemhi oni ẹoli a mẹ ọlia eyi emekẹguele ali eyi eni a pfa na, ali eni a gboloa shi ekẹ agbọ nya.”