Miti Mande Makiko Nakayáŋaró Mu.
1.
Yesu Kristo, Anutu koro Naŋuní, ŋuro miti mande ŋuko ŋandiro. 
Komo suki, Aisaia, ye-ye uni ŋundo, mande ka ŋande nakayáŋaró, “Iŋo, nondo uni ka mande yesowo yimitoyoweya qu asáŋowe koretero uro keŋo khe qu roŋgaruwoweya. 
Enendo mira wimbímo neko yerero ŋande yimiroweya, ‘Uni Parámimboro khe roŋgaruwoya, eneŋomboro ore roneneŋoyi qembe.’” 
Asa ŋundiro Jon, sono re-re uni ŋundo, mira wimbímo mahero unipare sono re yunoro mande ka yesowo yimitoyara. Mande ŋuko ŋandiro, “Ye quhuríyemboro newonde surumí teya quhurí ŋu se rotoya sono rika Anutuko quhuríye soso se rotoweya.” 
Unipare qambu Judia mira koŋgo qu ko Yerusalem yendé moŋgo qu ŋuno uyaro quhuríye tunomo yi Jotan Sono quroko sono re yunaró. 
Jonko tuwi kamel huímbo toworo kowí punuwaró. Ko makao kowímbo utóŋo toworo weheŋo newondí kusiyaró. Muŋa katu koya siso mindiyómboya neyara. 
Unipare mira wimbímo uyari ŋande yesowo yimitoyara, “Imemoŋgo uni ka wimbímboko nene wimbune takate qundo nohowe maheweya. Nondo eneŋo khe punu-punuyómboro utó orosoyewero owé moré kini. 
Nondo kina sono re yunoteno. Quko enendo Yuqa Surumí sono qembe re yunoweya.” 
Ŋu naruko ŋuno Yesu Galili mira koro yendé ka, owí Nasaret, rotoro uyariní Jotan Sonono Jonko sono re inaró. 
Re inoní sono noŋgo arero koreko toŋetiní sambo kosaŋiní Yuqako nú tero saŋanímo umburó. 
Umbuní maŋgo ka sambo koŋgo ŋande yaró, “Keko neneŋo naŋone, keŋo surumí iŋoyoteno. Keŋo meté kereyoteno.” 
Ŋunde yiníqo, Yuqa ŋundo Yesu re mira wimbímo asáŋaró. 
Asáŋoní naru 40 ŋunde rotoro mira ŋuno yoní Monimbuko towoŋoyaró. Mira wimbímo ŋuno Yesu númbowe koro mirako yoní sambo simómbo samakaŋoyaŋgurí. 
Tukú uni kumimbo Jon rero kusi-kusi yano raŋgurí. Imemoŋgo Yesuko Galili mirako ŋuno uyaro Anutu koro miti mande yesowaró. 
Yesoworo ŋande yimitoyaró, “Itaka naŋge Anutuko unipareyó wiri yereyote naruyó ŋu tunoqewero tete. Ye quhuríyemboro newonde surumí teya quhurí ŋu se rotoya miti mande ŋa iŋoya iŋondutu ti qembe,” yaró. 
Asa Yesuko Galili Sono Towo tapéwore uyareyate yerepasa ka khoyari tero sono qare siyoyori yiyaró. Yerepasa ŋu, owéyari Saimon, Andru, ŋundo tirí-tirí ka re sono towoko raŋoro wosoyariyó. 
Asa yiyoro ŋande yimiraró, “Mahe nohowiri. Nondo kho ka yunowe unipare Anutusina yowosowari,” yaró. 
Yiní waka ta tirí-tiríyari ŋu rotoro howariyó. 
Soŋga ta uyaro Sepeti simó naŋuní irisa yiyaró. Yerepasa ŋu, owéyari Jems, koneyó Jon, ŋundo waŋgo tomó ta quno ŋuno tirí-tirí se roŋgaruwoyariyó. 
Yiyoro ŋande yimiraró, “Mahe nohowiri,” yiní awayari, kho uniyari waŋgo tomó ta ŋuno yorotoro howariyó. 
Asa Kaperneam yendémo uyareŋgurí. Sapat naruko ŋuno Yesuko huru-huru yano oro Anutu koro mandí rondaqe unipare yunaró. 
Ŋunde yunoní unipare iŋoro kondé yukuwaŋgurí. Dokoro mande yaró ŋuko wimbí moré, hutuŋo mande ŋuro iŋo-iŋo unindoro mandeye ŋunde qembe kini. 
Ŋu naruko ŋuno uni ka huru-huru yano areró muko yuqa pusú ka quroko yaró. 
Asa ŋundo kiwero ŋande yaró, “Aine, Yesu Nasaret noŋgo, do nereweya? Kepe nore rowore nerewero mahetepe? No iŋo kunoteno, keko Anutu koro uni meté horé ŋu.” 
Yiní Yesuko ŋande qene yaró, “Ke maŋgoke kusiyoya uni ŋu roto toŋe!” 
Ŋunde yiní yuqa pusú ŋundo uni ŋu riní khí kandí yukuwoní ki parámi tero uni ŋu roto toŋeró. 
Ŋunde tiní unipare soso ŋu newondeye yukuwoní niŋgu-niŋgu tero epe mito-mito taŋgurí, “Ŋa do ka? Mande keta ka wimbí moré yete! Ko enendo yuqa pusú yimironíqo, maŋgó howero waka ta roto toŋete!” 
Ŋunde yiqo, imemoŋgo unipare soso Galili mirako ŋuno waka ta Yesuko o taró ŋuro piŋa mande iŋaŋgurí. 
Asa Yesuko huru-huru ya noŋgo uro Saimon, Andru koro yayarimo oró. Oro Jems, Jon, Saimon, Andru ŋu soso ŋuya oŋgurí. 
Ŋuno Saimon koro koŋgí kowí tiwi riní se khumo tero eteyaró. Asa yano arero pare ŋuro miraŋgurí. 
Miroyi oro kandí toworo samakaŋoní otoqaró. Otoqoní kowí tiwi kini tiní pare ŋundo o qoyemboro roŋgaruwaró. 
Kosa pusuŋiní suwo tiníqo, uni se khumo piyimiye moré mu soso ŋuya uni yuqa piyimi quroyemo yaŋgurí mu, ŋu ŋuya yore Yesuko maheŋgurí. 
Ŋunde ti yendé unipare soso makono kaŋaŋgurí. 
Kaŋi Yesuko unipare qambu se khumo piyimi kate-kate taŋgurí ŋu roŋgaru yiriní meté taŋgurí. Ko yuqa piyimi wata unipare quroko qu yohowiní toŋeŋgurí. Yuqa piyimi ŋundo Yesu qene iŋaŋgurí. Ŋunde ŋuroko mande yewero ŋuro soré yereró. 
Asa ita saraŋowero tiníqo, Yesuko otoqo toŋero mira uni kinimo hariri teyaró. 
Ŋunde tiní Saimon koya topé-topémboya seqayate 
qenero ŋande miraŋgurí, “Uni soso seqa kereteŋgo,” yaŋgurí. 
Yiqo, ŋande yaró, “Nondo unipare qambu mande yesowo yimirowero ŋuro iŋoyoteno. Ŋunde ŋuroko yendé meyowo kutaqe quno ŋuno uyato.” 
Asa ko Galili mira soso ŋuno yendéne-yendéne huru-huru yayemo oro mande yesoworo yuqa piyimi unipare quroko qu yohowaró. 
Naru kano kowí piyimi khumo uni kato mahero Yesu nekoro potoruku te inoro ŋande kirayaró, “Keto ŋu iŋi mepémo tiníqo, no nori sara tewano,” yaró. 
Ŋunde yiní Yesuko sikí te inoro kandí saŋanímo rero miraró, “No ŋuro iŋoteno. Ke sara teweya.” 
Yiní waka ta se khumo ŋuno qu roto toŋiní sara taró. 
Ŋunde tiní Yesuko asáŋoro mande kondé yaró, 
“O ŋa keno tunoqete ŋaro uni ka ma yimirowero. Hutuŋo mande Mosesko yimiraró ŋu howeya o qa-qa uni koweke re witú yereya keto sara tunoqete quro oka Anutu te ino qembe. Ŋunde tiqo, se khumoke kini tete, ye iŋowaŋgo.” 
Yiníqo, uni ŋu toŋero mondó ta kama yora. Kini, sowo mande ŋu yendé soso ŋuno yesowoyaró. Ŋunde ŋuroko ŋu naruko ŋu noŋgo Yesuko yendémo tunomo uyarewero mepémo kini, mira uni kinimo naŋge yoraró. Asa unipareto Yesu koro murí iŋowero quro ŋuno maheŋgurí.