1 Caw xin matxa chitecha juhan̈ jabenan̈ tzet heyehicoj, yuxin oc yin̈ conabalan̈ cocancanojan̈ cochuquilan̈ bey yul con̈ob Atenas. 2 Janitojan̈ naj juẍta Timoteo quexistucleꞌ, naj ayco ischejabo Comam Dios yin̈ yalnicꞌo Tzotiꞌ cꞌul yet colbanile yin̈ Comam Jesucristo. Jatojan̈ naj quexistucleꞌ yun̈e yanico naj yip heyanma, yeb yun̈e cam hetoholban̈enico heba yin̈ Comam. 3 Haxinwal machi hunojex chicabconcan̈ hecꞌul yu isyaꞌtajil chihul teyiban̈. Wal xin heyohtaxa tato yilal yecꞌyaꞌ janma yu ej isyaꞌtajil chihul jiban̈. 4 Yuxin yet jecꞌan̈ texol, jalcanojan̈ teyet tato yilal yul isyaꞌtajil jiban̈, caw xin cheyila tato hac tuꞌ elicoj. 5 Caw mach chitecha wuhan wabenan hanicꞌ heyecoj, yuxin inchejtojan naj Timoteo quexistucleꞌ, yun̈e yilni naj hanicꞌ yeco heyanma yin̈ Comam bey tuꞌ. Yuto ayco yin̈ incꞌulan cꞌuxantaxca quexyakꞌ subchaho naj matzwalil yin̈ej istxꞌojal, yuto ta hac tuꞌ nabn̈em con̈munlahan̈ texol chal tuꞌ, yaj machoj.

6 Yajaꞌ wal tinan̈ xabeycꞌo juẍta Timoteo quexistucleꞌ, haꞌ naj xin initi tzotiꞌ tato caw huneꞌn̈eticꞌa haꞌ yeco heyanma yin̈ Comam Dios, yebpaxo xin ta caw xahan cheyil heba hununex. Yal naj jetan̈ tato caw chitzala hecꞌul jin̈an̈, chon̈henanitijan̈ yeb xin ta caw cheyoche con̈heyilaꞌan̈, hac tuꞌ heyepaxico yin̈ cocꞌulan̈, caw chijochehan̈ quexjilaꞌpaxojan̈. 7 Wal tinan̈, hex wuẍtaj hex wanab, walca soman biscꞌulal yeb soman isyaꞌtajil jehan̈ caw akꞌlo cocꞌulan̈ yet jabenan̈ tato caw huneꞌn̈e haꞌ yehico heyanma yin̈ Comam Jesucristo. 8 Hayet jabenan̈ tato tohol hebelwi yin̈ yet Comam caw occano janmahan̈ yin̈ tzalahilal. 9 Tinan̈ xin mach chitxumcha juhan̈ tzet chu jakꞌnihan̈ yuchꞌandiosal tet Comam Dios teyin̈ yu huneꞌ icham tzalahilal chijabehan̈ heyu sata Comam Dios. 10 Wal xin, caw hunun tzꞌayic yeb hunun akꞌbal cokꞌannihan̈ tet Comam tato chiyakꞌ Comam cohamanilan̈ cotohan̈ quexjilnojan̈, yun̈e cam hechꞌib yin̈ heyanico heyanma yin̈ Comam Dios.

11 Haꞌojab Comam Dios Mame yeb Comam Jesucristo, chicolwa jin̈an̈ yun̈e chiyu cotohan̈ quexjilnojan̈. 12 Haꞌojab Comam chexakꞌni chꞌiboj, yeb yun̈e cam xahan cheyil heba hununex, cat hexahann̈en sunil anma, hacaꞌticꞌa isxahanil chexjilan̈ han̈on̈tiꞌan̈. 13 Chijochepaxojan̈ tato chiyakꞌ Comam yip heyanma, haxinwal toholn̈e chiyu hebelwi. Machojab hemul chiilchati yul sat Comam Dios Mame yet chihul Comam Jesucristo hunelxa yeb sunil macta yetxa Comam yehi.