RI NABꞌE WUJ RI XUTZꞌIBꞌAJ RI PABLO CHIKE RI KOJONELABꞌ AꞌJ CORINTO
Majibꞌal re
Ri wuj re Hechos kutzijoj jas xubꞌan ri Pablo chukꞌamik bꞌik ri utz laj tzij rech ri Jesús ri Mesías chike ri winaq ri keꞌl pa ri tinimit Macedonia (pa relibꞌal qꞌij rech ri tinimit Grecia) xa kꞌu xanimaj bꞌik xeꞌ je laꞌ pa ri tinimit Acaya (pa uqajibꞌal qꞌij re ri tinimit Grecia) jeriꞌ xubꞌano rumal ri xraj xukol ri ukꞌaslemal.
Ri Pablo xuꞌsolij ri tinimit rech Corinto, jun tinimit ri sibꞌalaj qꞌinom xuqujeꞌ jun kꞌolibꞌal ri ukꞌuꞌx ri kabꞌan wi kꞌayij.
Sibꞌalaj e kꞌi winaq xekojon chilaꞌ rumal riꞌ xkanaj kanoq ri Pablo jun junabꞌ rukꞌ nikꞌaj kukꞌ chuyaꞌik kꞌutuꞌn.
Are xel bꞌik ri Pablo kukꞌ, ri aꞌj Corintios xkitzꞌibꞌaj jun wuj che ri Pablo (jun wuj ri man kꞌo ta chik qukꞌ) xkita sibꞌalaj kꞌi kꞌotoj chiꞌ che.
Ri winaq aꞌj Corinto xkikꞌam uqꞌabꞌ ri kinoꞌjibꞌal ri winaq aꞌj Grecia ri kubꞌij chi ronojel ri jastaq ri kaqil uwach man utz taj, jeriꞌ kakaj kakiqꞌat ri uxlabꞌal che ri kityoꞌjal.
Rumal riꞌ man qas ta chi utz kakil ubꞌanik jujun jastaq jacha ta ne ri kꞌulanem, waꞌim pa ri kinimaqꞌij ri e bꞌanom taq tyox je xuqujeꞌ ri kꞌastajibꞌal re ri Jesús.
Pa ri wuj re nabꞌe Corintios kaqilo chi ri Pablo kutzijoj we jastaq riꞌ xuqujeꞌ kubꞌan kꞌotoj chiꞌ puꞌwiꞌ ri qꞌijilaꞌnem.
Ri Pablo kutzꞌibꞌaj chi we uwachulew ri uj kꞌo wi xa tajin kikꞌowik, are kꞌu ri Corintios kuyaꞌo kakiya kibꞌ chupatanixik ri Ajawxel jeriꞌ rumal ri kichak kakibꞌano man tzaqel taj. Ri kꞌastajibꞌal ke ri kaminaqibꞌ ri kape na xuqujeꞌ ri kꞌakꞌ uwachulew ri kape na are kakꞌutuw na chi qas kꞌo xupatanij ri xkibꞌano. Ri kuchilibꞌej ri Pablo kukꞌut chiqawach jas jeꞌ kakꞌulmataj pa ri ajawarem rech jeriꞌ are kaqilij ubꞌanik ri rajawaxik kaqabꞌano che we qꞌij junabꞌ ri kujriqitaj wi.
1
1 Ri Pablo sikꞌital apanoq rumal ri urayibꞌal ukꞌuꞌx ri Dios, rech kux jun taqoꞌn rech ri Cristo Jesús, rachiꞌl ri alaxik Sóstenes. 2 Kintaq we wuj ri chike ri e tyoxirisatal pa Cristo Jesús, e sikꞌital apanoq rech kꞌuꞌx tyoxalaj taq winaq e kachiꞌl ri kakinaꞌtaj ri ubꞌiꞌ ri Dios xuqujeꞌ ri qabꞌiꞌ uj pa ronojel kꞌolibꞌal ri e kꞌo wi: 3 Chikꞌamawaꞌj toqꞌobꞌ xuqujeꞌ jaꞌmaril che ri Dios, ri qaTat xuqujeꞌ utat ri Ajawxel Jesucristo.
Tyoxinik che ri Dios
4 Ronojel qꞌij kintyoxin che ri Dios rumal iwe, rumal ri utoqꞌobꞌ ri Dios ri xyaꞌtaj chiꞌwe pa Cristo Jesús. 5 Rumal cher xikꞌamawaꞌj ronojel uwach qꞌinomal pa Areꞌ pa etaꞌmanik xuqujeꞌ pa tzij, 6 jacha ri qꞌalajisanik chirij ri Cristo ri xjeqebꞌax chiꞌwe. 7 Jeriꞌ maj jun sipanik kajawataj chiꞌwe are kiwayeꞌj apanoq are kukꞌut ribꞌ ri Ajawxel Jesucristo. 8 Areꞌ kabꞌanow chiꞌwe chi ko kixkꞌojiꞌk kꞌa pa ri kꞌisbꞌal qꞌij, rech maj mak kariqitaj chiꞌwe pa ri qꞌij are katzalij loq ri Jesucristo. 9 Ri Dios ri kubꞌano ri kubꞌij, areꞌ xixsikꞌin apanoq rech kꞌo iriqoj ibꞌ rukꞌ ri Jesucristo, ri Qajawxel.
Paꞌin ibꞌ pa ri komontyox
10 Wachalal, kinta chiꞌwe pa ubꞌiꞌ ri Ajawxel Jesucristo, chi xa jun ichomanik kꞌoloq, kixkꞌoloq pa riqoj ibꞌ xuqujeꞌ man kiya ta bꞌe che ri paꞌin ibꞌ chiꞌxoꞌl, xane xa jun chibꞌanaꞌ, xa jun ichomanik xuqujeꞌ xa jun jastaq ix bꞌanal rech. 11 Jeriꞌ rumal xbꞌix chwe kumal e jujun rech ri Cloé chi kꞌo chꞌoꞌj chiꞌxoꞌl loqꞌalaj taq wachalal. 12 E kꞌo jujun chiꞌwe kakibꞌij: “In in rech ri Pablo, in in rech ri Apolos, in in rech ri Cefas.” Nikꞌaj chik kakibꞌij: “In in rech ri Cristo.” 13 ¿La xa kꞌu paꞌital ri Cristo? ¿La are kꞌu ri Pablo xrip rumal ri imak? ¿La pa ubꞌiꞌ kꞌu ri Pablo xbꞌan wi iqasanaꞌ? 14 Kintyoxin che ri Dios, man kꞌo ta jun chiꞌwe xinbꞌan uqasanaꞌ, xaq xwi xinbꞌan uqasanaꞌ ri Crispo rachiꞌl ri Gayo, 15 jeriꞌ maj jun kubꞌij chi pa nubꞌiꞌ in xbꞌan wi uqasanaꞌ. 16 Xinbꞌan xuqujeꞌ kiqasanaꞌ konojel ri e kꞌo rukꞌ ri Estéfanas; man kanaꞌtaj ta chi chwe we kꞌo chi jun xinbꞌan uqasanaꞌ. 17 Rumal cher ri Cristo man xinutaq ta loq chubꞌanik qasanaꞌ, xane chutzijoxik ri utz laj taq tzij, man rukꞌ ta kitzij achyabꞌ ri kꞌax uchꞌobꞌik rech man kutzaq taj ri uchuqꞌabꞌ ri xubꞌan ri Cristo cho ri ripbꞌal.
Ri Cristo are etaꞌmabꞌal xuqujeꞌ ukwinem ri Dios
18 Rumal ri utzijoxik ri ukamikal ri Jesús cho ri ripbꞌal xaq konarisabꞌal chike ri kasach kiwach, chaqe uj kꞌut ri kujkoltajik, we tzij riꞌ are ukwinem ri Dios. 19 Ri tzꞌibꞌatalik kubꞌij: Kintukij na ri ketaꞌmabꞌal ri achyabꞌ ri kꞌo ketaꞌmabꞌal, xuqujeꞌ kinwetzelaj na ri kinoꞌjibꞌal ri kꞌo ketaꞌm.✡ 1:19 Isaías 29:14.
20 ¿Jawjeꞌ kꞌo wi ri achi ri kꞌo retaꞌmabꞌal? ¿Jawjeꞌ kꞌo wi ri qas kusolij ri tzꞌibꞌatalik? ¿Jawjeꞌ kꞌo wi ri achi ri qas kubꞌan chꞌoꞌj pa tzij? ¿La man kꞌu xukonarisaj ri Dios ri etaꞌmabꞌal kech ri achyabꞌ rech we uwachulew riꞌ? 21 Pa ri retaꞌmabꞌal ri Dios, xubꞌan chike ri winaq aꞌjuwachulew chi man xketaꞌmaj ta uwach rukꞌ ri ketaꞌmabꞌal, xane xuꞌkolo rukꞌ ri tzij ri xkikojo are xtzijox chike.
22 Ri winaq aꞌj Israel kakita mayijabꞌal taq jastaq xuqujeꞌ ri winaq ri man aꞌj Israel kakita etaꞌmabꞌal. 23 Ri uj kꞌut kaqatzijoj ri Cristo ri xripik. We tzij ri topibꞌal aqanaj chike ri winaq aꞌj Israel, xuqujeꞌ konarisabꞌal kech ri winaq ri man aꞌj Israel taj. 24 Chike kꞌu ri e sikꞌital apanoq, ta kꞌu e winaq aꞌj Israel o man aꞌj Israel taj, ri Cristo are ukwinem xuqujeꞌ retaꞌmabꞌal ri Dios. 25 Rumal cher ri sibꞌalaj kon che ri Dios are sibꞌalaj kꞌo retaꞌmabꞌal cho ri ketaꞌmabꞌal ri winaq xuqujeꞌ ri sibꞌalaj man kꞌo ta uchuqꞌabꞌ pa Dios are sibꞌalaj kꞌo uchuqꞌabꞌ chikiwach ri achyabꞌ. 26 Qachalal, qas chiwila na jas ri qas ix sikꞌital wi apanoq: Man ix kꞌi taj ri kꞌo iwetaꞌmabꞌal jetaq ri kakibꞌij ri winaq, man e kꞌi ta chiꞌwe ri e kalkꞌwaꞌl taq ri taqanelabꞌ. 27 Ri Dios kꞌut xuchaꞌ ri man kꞌo ta retaꞌmabꞌal cho ri uwachulew rech kuꞌya pa kikꞌixibꞌal ri achyabꞌ ri kꞌo ketaꞌmabꞌal, xuqujeꞌ xuchaꞌ ri sibꞌalaj maj uchuqꞌabꞌ cho ri uwachulew rech kuꞌya pa kikꞌixibꞌal ri kꞌo taqanik pa kiqꞌabꞌ. 28 Ri Dios xuchaꞌ apanoq ri sibꞌalaj man kꞌo ta kakꞌam che xuqujeꞌ ri etzelatal uwach kumal ri winaq xukꞌamawaꞌj ri man sukꞌ taj xuqujeꞌ xretzelaj ri sukꞌ kunaꞌo. 29 Jeriꞌ xubꞌano rech maj jun kubꞌan nimal cho ri Dios. 30 Xa Tyox che Areꞌ, ix ix kꞌo pa Cristo Jesús, ri Cristo are qetaꞌmabꞌal, pa juleꞌ taq tzij chik are wa ri xbꞌanow sukꞌ chaqe xuqujeꞌ are xujutyoxirisaj, areꞌ xujtorow loq. 31 Rech jetaq ri tzꞌibꞌatalik: We kꞌo jun kunaꞌ nimal, chunaꞌ nimal pa ri Ajawxel Jesús.✡ 1:31 Jeremías 9:24.